លោក Southgate សម្ដែងក្ដីត្រេកអរ ក្រោយក្រុមអង់គ្លេស ឈ្នះដាណឺម៉ាក ក្នុងវគ្គ ៤ក្រុមចុងក្រោយ កាលពី Euro 2020 កន្លងទៅ។
.jpg)
ក្រុងឡុងដ៍: លោក Gareth Southgate បានប្រាប់ឱ្យដឹងកាលពីថ្ងៃចន្ទថា គាត់មានក្តីរំភើប ដែលបានចុះហត្ថលេខា ក្នុងកិច្ចសន្យាថ្មីរយៈពេល ២ ឆ្នាំទៀត ដើម្បីបន្តធ្វើតួនាទីជាអ្នកចាត់ការក្រុមជម្រើសជាតិអង់គ្លេស បន្ទាប់ពីមាននូវបទពិសោធយ៉ាងពិសេសអស្ចារ្យ ក្នុងអំឡុងពេល ៥ ឆ្នាំរបស់គាត់ ក្នុងការកាន់តំណែងនេះ។
កុងត្រាចាស់របស់គ្រូបង្វឹកវ័យ ៥១ ឆ្នាំ នឹងផុតកំណត់ បន្ទាប់ពីបញ្ចប់ព្រឹត្តិការណ៍ World Cup ឆ្នាំក្រោយ ប៉ុន្តែគាត់ត្រូវបានផ្តល់រង្វាន់ដោយសហព័ន្ធបាល់ទាត់របស់ប្រទេសអង់គ្លេស (FA) ក្រោយពីគាត់បានដឹកនាំក្រុមតោកំណាច ឡើងដល់វគ្គផ្តាច់ព្រ័ត្រ នៅ Euro 2020 ដែលជាទម្រង់ដ៏ល្អបំផុតរបស់ក្រុម នៅក្នុងព្រឹត្តិការណ៍ធំមួយ សម្រាប់រយៈពេល ៥៥ ឆ្នាំ។
លោក Southgate ដែលបានបង្កើតឱ្យមានផងដែរនូវដំណើរផ្លូវឆ្ពោះទៅវគ្គ ៤ ក្រុមចុងក្រោយ នៅ World Cup 2018 នាប្រទេសរុស្ស៊ី បានកែប្រែក្រុមអង់គ្លេសរបស់គាត់ឱ្យក្លាយទៅជាគូប្រជែងដ៏តឹងតែងមួយ ក្រោយពីបរាជ័យម្ដងហើយម្ដងទៀត អស់រយៈពេលជាច្រើនឆ្នាំ។
«ខ្ញុំចង់ប្រាប់ថា តើពួកយើងមានក្ដីរំភើបកម្រិតណា? ពោលគឺរយៈពេល ៥ឆ្នាំចុងក្រោយ ដែលផ្ដល់នូវបទពិសោធយ៉ាងពិសេសអស្ចារ្យ»។ នេះជាការលើកឡើងរបស់អតីតអ្នកចាត់ការក្រុម Middlesbrough លោក Southgate ដែលក្រុមអង់គ្លេសរបស់គាត់ កាលពីសប្ដាហ៍កន្លងទៅ ដណ្ដើមបានកៅអី សម្រាប់ World Cup នៅប្រទេសកាតា។
លោក Southgate បានបន្តថា៖ «យើងអាចមើលឃើញនូវអ្វី ដែលសម្រេចបានជាមួយនឹងក្រុមដែលមានស្រាប់ និងកីឡាករមួយចំនួន តាមរយៈក្រុម ដែលមានអាយុប្រហាក់ប្រហែលគ្នារបស់យើង។ យើងមានការដឹងគុណចំពោះការគាំទ្ររបស់ FA។ យើងដឹងថា វាជារឿងសំខាន់ ក្នុងការដណ្ដើមបានសិទ្ធិ (មុនចុះហត្ថលេខា) ដូច្នេះ គ្មានសំណួរចំពោះការផ្ដោតអារម្មណ៍នោះទេ។ យើងកំពុងសម្លឹងមើលទៅប៉ុន្មានឆ្នាំខាងមុខទៀត ដើម្បីបង្កើតនូវការចងចាំថ្មី»។
លោក Southgate ដែលឥឡូវនេះ នឹងដឹកនាំក្រុមអង់គ្លេស ធ្វើយុទ្ធនាការ សម្រាប់ Euro 2024 បានប្រាប់អ្នកសារព័ត៌មានថា ក្រុមរបស់លោកបានអភិវឌ្ឍកាន់តែប្រសើរឡើងយ៉ាងអស្ចារ្យ។
នាយកប្រតិបត្តិរបស់ FA លោក Mark Bullingham បានថ្លែងថា៖ «លោក Gareth Southgate និងជំនួយការរបស់គាត់ លោក Steve Holland (ដែលបន្តកុងត្រាដែរ) ពិតជាបានបង្កើតឱ្យមានវប្បធម៌ដ៏រឹងមាំជាមួយកីឡាករ និងអ្នកគាំទ្រ ហើយរៀបចំបានយ៉ាងល្អបំផុត ក្នុងការនាំក្រុមក្មេងៗទាំងនេះឱ្យឆ្ពោះទៅមុខ។ ជោគជ័យ កើតមានមកជាមួយនឹងក្ដីរំពឹង ដែលត្រូវបានផ្លាស់ប្ដូរកែប្រែ។ យើងធ្លាប់បានរីករាយនឹងការបានសិទ្ធិហើយ ដូច្នេះ ឥឡូវនេះ យើងរំពឹង ក្នុងការបានឈានដល់វគ្គចុងក្រោយបំផុត»។
លោក Southgate ដែលជាអតីតខ្សែការពាររបស់ក្រុមអង់គ្លេស បានចូលមកធ្វើតួនាទីជាអ្នកកាច់ចង្កូតនាវារបស់ក្រុមជម្រើសជាតិនេះ ក្នុងឆ្នាំ២០១៦ ដោយដឹកនាំបន្តពីលោក Sam Allardyce ដែលបញ្ចប់កុងត្រា ក្រោយដឹកនាំបានតែ ១ហ្គេម បន្ទាប់ពីមានការរិះគន់ពីបណ្ដាញសារព័ត៌មាន៕ AFP/VN
