Hummels (ឆ្វេង) របស់ Dortmund ត្រូវបានអាជ្ញាកណ្ដាលផ្ដល់កាតក្រហម អំឡុងការប្រកួតទល់នឹង Ajax កន្លងមក។
.jpg)
ក្រុងប៊ែរឡាំង: ក្រុម Borussia Dortmund នឹងមិនមានទាំងខ្សែការពារ Mats Hummels និងខ្សែប្រយុទ្ធ Erling Haaland នៅពេលពួកគេត្រូវធ្វើដំណើរឆ្ពោះទៅប្រទេសព័រទុយហ្គាល់ ដើម្បីធ្វើការប្រកួត នៅថ្ងៃពុធ សម្រាប់ក្របខ័ណ្ឌ Champions League ដែលអាចជាហ្គេមកាត់ក្ដី ក្នុងពូល C រវាងក្រុមទៅពីអាល្លឺម៉ង់មួយនេះ និងក្រុមម្ចាស់ផ្ទះ Sporting Lisbon។
ដោយមាន ៦ពិន្ទុស្មើគ្នា ជាមួយនឹងការប្រកួត នៅសល់ ២លើកទៀត ក្រុម Sporting និង Dortmund ត្រូវតទល់គ្នា ក្នុងជំនួបមួយ ដែលអាចជាការសម្រេចថា តើក្រុមមួយណា នឹងអាចចូលរួមជាមួយក្រុមប្រធានពូល Ajax ក្នុងបានឆ្លងទៅវគ្គចាញ់ធ្លាក់។
តែយ៉ាងណា ក្រុម Dortmund នឹងចាញ់ប្រៀបដោយសារអវត្តមានកីឡាករដ៏ល្អបំផុត ២រូប Hummels និង Haaland ខណៈដែលពួកគេ ត្រូវការធ្វើឱ្យយុទ្ធនាការ នៅ Champions League ត្រឡប់មកលើផ្លូវជោគជ័យវិញ បន្ទាប់ពីរងបរាជ័យបន្តបន្ទាប់គ្នា នៅ ២ ហ្គេមមុននេះ។
ខ្សែការពារចាស់វស្សាដ៏រឹងមាំ Hummels ត្រូវជាប់ពិន័យ ក្រោយពីរូបគេ ទទួលបានកាតក្រហមដ៏ចម្រូងចម្រាស ក្នុងបរាជ័យ ៣-១ របស់ក្រុម Dortmund ក្រោមថ្វីជើងរបស់ក្រុម Ajax កាលពី ៣សប្ដាហ៍កន្លងទៅ។ ក្លិបបានឱ្យដឹងថា នឹងប្ដឹងឧទ្ធរណ៍ចំពោះការពិន័យនេះ តែគ្រូបង្វឹកលោក Marco Rose មិនរំពឹងថា កីឡាករជយលាភីពាន World Cup 2014 ជាមួយក្រុមជម្រើសជាតិអាល្លឺម៉ង់រូបនេះ នឹងអាចចូលលេងបាននោះទេ។
«យើងទាំងអស់គ្នាដឹងច្បាស់ថា Mats (Hummels) ត្រូវជាប់ពិន័យមិនអាចចូលលេងបានទេ នៅលីសបោន»។ នេះការលើកឡើងរបស់លោក Rose ដែលបង្ហើបផងដែរថា កីឡាករ Dan-Axel Zagadou អាចនឹងជំនួសកន្លែងតំបន់ការពារកណ្ដាលនេះ។
Haaland កំពុងមើលការប្រកួតរវាង Dortmund និង Ajax នៅ Champions League កន្លងមក។
ចំណែកឯកីឡាករ Haaland បាននៅក្រៅទីលាន ៤ សប្ដាហ៍កន្លងទៅហើយ ដោយសារមានរបួសត្រគាក ហើយក្រុម Dortmund កំពុងរំពឹងថា ខ្សែប្រយុទ្ធសញ្ជាតិន័រវែស ដែលរកបាន ៩គ្រាប់ ពីការបង្ហាញខ្លួន ៦លើក នៅរដូវកាលនេះ នឹងត្រឡប់មកមានសកម្មភាពវិញ សម្រាប់ការប្រកួតជាមួយក្រុម Bayern Munich ដែលកំពុងឈរកំពូលតារាងពិន្ទុនៃក្របខ័ណ្ឌ Bundesliga នៅថ្ងៃទី ៤ ខែធ្នូ។
ក្រុម Dortmund របស់លោក Rose ធ្វើដំណើរតម្រង់ឆ្ពោះទៅកាន់ក្រុងលីសបោន ជាមួយនឹងអារម្មណ៍ល្អ បន្ទាប់ពីបានរំកិលទៅកៀកនឹងក្រុម Bayern ដោយការតាមពីក្រោយតែ ១ពិន្ទុ ដោយសារបានយកឈ្នះក្រុម Stuttgart យ៉ាងប្រកៀកប្រកិត ២-១ កាលពីចុងសប្ដាហ៍កន្លងមក។
សម្រាប់ជំនួប កាលពីជើងទី ១ នៅប្រទេសអាល្លឺម៉ង់ ក្នុងខែកញ្ញា ក្រុម Sporting ចាញ់ ១-០ ហើយកីឡាករ Donyell Malen ដែលទំនងជាមានមុខជំនួសការអវត្តមានរបស់ Haaland នៅយប់ថ្ងៃពុធនេះ គឺជាអ្នកស៊ុតគ្រាប់បាល់ជ័យជម្នះ ក្នុងហ្គេមនោះ ហើយខ្សែប្រយុទ្ធសញ្ជាតិហូឡង់វ័យ ២២ឆ្នាំ កំពុងស្ថិតក្នុងទម្រង់លេងល្អ ដោយរកបានគ្រាប់ដំបូងរបស់ខ្លួន នៅ Bundesliga ជាមួយនឹងការស៊ុតយ៉ាងស្អាត ក្នុងជំនួបទល់នឹងក្រុម Stuttgart នោះ៕ AFP/VN
