ភ្នំពេញ: ការប្រកួតសប្តាហ៍ផ្តាច់ព្រ័ត្រដណ្តើមប្រាក់លានរបស់សហព័ន្ធប្រដាល់សកល នឹងកើតឡើង នៅយប់ថ្ងៃអាទិត្យ ទី ២៨ ខែ វិច្ឆិកា ឆ្នាំ ២០២១ រវាងកីឡាករលំដាប់ជម្រើសជាតិសកល វី សម្ភស្ស និងកីឡាករទូច ដេវីដ ដោយជើងឯក នឹងទទួលបានប្រាក់ចំនួន ៣ លានរៀល រីឯចំណាត់ថ្នាក់លេខ ២ បាន ១ លានរៀល។ ជាមួយគ្នានេះដែរ ក៏មានអមដោយគូប្រដាល់បន្ថែមចំនួន ៥ គូទៀត ខណៈគូឯក ត្រូវបានផ្តល់ជូនទៅកីឡាករ មឿន សុខហ៊ុច មកពីក្លិបនាយកដ្ឋានអង្គរក្សប្រកួតជាមួយអ្នកលេងកណ្តាប់ដៃធ្ងន់ ថៃ រិទ្ធី មកពីសមាគមប្រដាល់កងយោធពលខេមរភូមិន្ទ។
បើតាម លោកស៊ន អេលីត ដែលជាគ្រូបង្វឹកជម្រើសជាតិ បាននិយាយថា ចង់បន្ថែមបទពិសោធថ្មីសម្រាប់សិស្សខ្លួន មឿន សុខហ៊ុច បើល្អអាចប្រឡូកទាំង ២ ប្រភេទ គឺគុនខ្មែរផង និងប្រដាល់សកលផងតែម្ដង ព្រោះវាល្អក្នុងការរកប្រាក់សម្រាប់ដោះស្រាយជីវភាព។
សម្រាប់ប្រដាល់សកលនេះ កីឡាករ វី សម្ភស្ស បានប្រាប់ឱ្យដឹងថា មានទំនុកចិត្តឈ្នះខ្ពស់ ព្រោះបានត្រៀមនិងហ្វឹកហាត់គ្រប់គ្រាន់ ពិសេសឧបសគ្គមួយចំនួន ត្រួសត្រាយបានរួចរាល់។ នៅក្នុងវគ្គជម្រុះចំនួន ៣លើកកន្លងមក វី សម្ភស្ស បានឆ្លងកាត់ និងយកឈ្នះបានទាំង ៣ លើក ដែលក្នុងនោះកីឡាករ ទូច ដេវីដ ត្រូវជួបគ្នាវគ្គបញ្ចប់ផ្តាច់ព្រ័ត្រនេះក៍ធ្លាប់បានចាញ់ពិន្ទុរួចហើយដែរក្នុងវគ្គជម្រុះ។
កីឡាករ វី សម្ភស្ស បាននិយាយថា៖ «ជំនួបប្រកួតនេះ ខ្ញុំរំពឹងខ្ពស់ថា នឹងឈ្នះជើងឯក ពីព្រោះតាមរយៈការហ្វឹកហាត់ ខ្ញុំសម្រកទម្ងន់បានតាមកំណត់ ហើយកម្លាំង និងសុខភាពខ្ញុំធម្មតា ធានាថា ប្រកួតបានល្អ។ ខ្ញុំមានទំនុកចិត្តឈ្នះតែម្តង គឺសង្ឃឹម ៩០ ភាគរយ»។
ចំណែក ទូច ដេវីដ ដែលក្នុងវគ្គជម្រុះប្រកួតចំនួន ៣ លើក ឈ្នះ ២ លើក និងចាញ់ ១ លើក គឺចាញ់ពិន្ទុវី សម្ភស្សនេះតែម្តង និយាយថា៖ «លំបាកសង្ឃឹម ពីព្រោះកម្លាំង និងកណ្តាប់ដៃរបស់វី សម្ភស្ស ល្អជាងខ្ញុំ ហើយគាត់ចាស់វស្សា និងមានបទពិសោធផ្នែកប្រដាល់សកលនេះ គឺសិស្សច្បងមុនខ្ញុំ ហេតុនេះ វាជាការលំបាកណាស់ ក្នុងការឈ្នះគាត់។ ខ្ញុំរំពឹងឈ្នះតែ ៥០ ភាគរយ ប៉ុន្តែធានាវ៉ៃឲ្យអស់ពីសមត្ថភាព»។
ប្រភពពីអ្នកតាមដានភាគច្រើន គេមានជំនឿទៅលើ វី សម្ភស្ស ទទួលបានជ័យជម្នះច្រើនជាង។ ចំណែកលោក ស៊ន អេលីត ដែលជាគ្រូបង្វឹករបស់ វី សម្ភស្ស និងជាគ្រូជម្រើសជាតិផងនោះ និយាយថា វី សម្ភស្ស នឹងឈ្នះក្នុងព្រឹត្តិការណ៍ដណ្តើមប្រាក់លាននេះ។
បន្ថែមពីលើនេះ លោក ស៊ន អេលីត បានឱ្យដឹងថា វត្តមានប្រកួតរបស់កីឡាករ មឿន សុខហ៊ុច វ៉ៃសកលសប្ដាហ៍នេះ គឺជាការសាកល្បង និងចង់តេស្តមើលសមត្ថភាពរូបគេផងថា អាចទៅរួចទេ? ប្រសិនបើធ្វើបានល្អ អាចនឹងឲ្យហ្វឹកហាត់ប្រដាល់សកលផង ហាត់គុនខ្មែរផង ដើម្បីបានលុយច្រើន។
លោក ធន់ សុភា គ្រូបង្វឹករបស់កីឡាករ ថៃ រិទ្ធី បាននិយាយថា៖ «ចំពោះការប្រកួតរវាង សុខហ៊ុច និង ថៃ រិទ្ធី លើកនេះ ខ្ញុំមើលឃើញថា ថៃ រិទ្ធី មានប្រៀបល្អជាង ពីព្រោះកណ្តាប់ដៃធ្ងន់ និងកម្លាំងក៏ល្អជាងដែរ ហេតុនេះ ខ្ញុំរំពឹងឈ្នះដល់ទៅ ៩០ ភាគរយ»។
លោក ប៊ុយ សុភ័ណ្ឌ ដែលជាអគ្គលេខាធិការសហព័ន្ធប្រដាល់សកល និងជានាយក-គ្រប់គ្រងកម្មវិធីឲ្យដឹងថា កម្មវិធីនេះនឹងធ្វើឡើង នៅថ្ងៃអាទិត្យទី ២៨ ខែ វិច្ឆិកា ឆ្នាំ ២០២១ វេលាម៉ោង ៦ល្ងាចតទៅ ខណៈកម្មវិធីនេះនឹងបិទបញ្ចប់មួយ រដូវកាលប្រចាំឆ្នាំ បន្ទាប់មកយើងកំពុងស្វែងរកដៃគូឧបត្ថម្ភគាំទ្របន្តទៀត ដើម្បីរៀបចំបន្តទៅតាមលទ្ធភាព៕