ភ្នំពេញៈ ក្រុមកីឡាករប្រដាល់ឃីកបុកស៊ីងកម្ពុជាចំនួន ៤ នាក់ នឹងត្រូវប្រកួតផ្តាច់ព្រ័ត្រដណ្តើមយកមេដាយមាស តាមប្រភេទទម្ងន់របស់ពួកគេនៅថ្ងៃសុក្រនេះ ចំណែកប្រភេទកីឡា ១៨ ទៀតរបស់កម្ពុជា នឹងចាប់ដំណើរប្រកួតប្រជែងនៅចុងសប្តាហ៍នេះដែរ ហើយក៏ជាពេលដែលវីរកីឡាការិនីជឺជិតស៊ូ ខាន់ ចេសា ត្រូវប្រកួតដើម្បីការពារមេដាយមាសរបស់នាងផងដែរ។
តាមរយៈការប្រកួតនៅស៊ីហ្គេមនេះ ក្រុមកីឡាករឃីកបុកស៊ីងបានបង្កើតឱ្យមានការភ្ញាក់ផ្អើលខ្លាំងជាងគេ ដោយក្នុងនោះ កីឡាករប្រដាល់ជើងខ្លាំង ទូច រ៉ាឆាន់ ដែលគេស្គាល់ថា ជា បឺត សង្ឃឹម ព្រមទាំង លន បញ្ញា និង កាន់ ម៉េងហុង សុទ្ធតែបានទទួលជ័យជម្នះនៅវគ្គពាក់កណ្តាលផ្តាច់ព្រ័ត្រ កាលពីថ្ងៃអង្គារ ចំណែក ឈឿង ល្វៃ ក៏ទើបបានឈ្នះហ្វីលីពីន Antonio ដោយពិន្ទុដាច់ ៣-០ ក្នុងវគ្គនេះ កាលពីថ្ងៃពុធផងដែរ ក្នុងទម្ងន់ ៧១ គីឡូក្រាម។
ជាមួយជ័យជម្នះនេះជើងខ្លាំង បឺត សង្ឃឹម, លន បញ្ញា, កាន់ ម៉េងហុង និង ឈឿង ល្វៃ នឹងត្រូវប្រកួតដណ្តើមយកមេដាយមាសវគ្គផ្តាច់ព្រ័ត្រ នៅថ្ងៃសុក្រនេះ ដោយចាប់ផ្តើមពីយប់ម៉ោង ៧:១៥ តទៅ ហើយការប្រកួតនេះ ត្រូវបានគេមើលឃើញថា អ្នកទាំង ៤ នេះ សុទ្ធតែធ្វើការងារកាន់ធ្ងន់ដូចគ្នា ព្រោះត្រូវប្រឈមជាមួយជើងខ្លាំងរបស់ថៃ និងម្ចាស់ផ្ទះវៀតណាម។
តាមកម្មវិធី បឺត សង្ឃឹម ត្រូវប្រឈមជាមួយថៃ Arunno Sivapan ក្នុងទម្ងន់ ៥៧ គ.ក្រ នៅព្រលប់ម៉ោង ៧:១៥ រីឯ កាន់ ម៉េងហុង ត្រូវជួបថៃ Sungnoi Chaiwat ក្នុងទម្ងន់ ៥៤ គីឡូក្រាម នៅម៉ោង ៨:១៥ ដែលគេម្នាក់នេះ មានសមត្ថភាពខ្លាំង ព្រោះអាចយកឈ្នះលើកីឡាករម្ចាស់ផ្ទះ Duong Danh Hoat ដោយពិន្ទុដាច់ ៣-០។
ចំណែក លន បញ្ញា ត្រូវជួបកីឡាកររបស់ម្ចាស់ផ្ទះវៀតណាម Nguyen The Huong ដែលបានទម្លាក់ម៉ាឡេស៊ី Kiang Athachai ក្នុងវគ្គ ១/២ ផ្តាច់ព្រ័ត្រ ហើយការប្រកួតផ្តាច់ព្រ័ត្រទម្ងន់ ៦៧ គ.ក្រនេះ ត្រូវធ្វើនៅយប់ម៉ោង ៩:១៥ គឺមុនពេលការប្រកួតដណ្តើមមេដាយមាសរបស់ ឈឿង ល្វៃ ជាមួយអ្នកប្រយុទ្ធរបស់ថៃ Thongchai Thapphi ក្នុងទម្ងន់ ៧១ គ.ក្រ ដែលចាប់ប្រកួតពីម៉ោង ១០:៤៥ យប់។
ដោយឡែក ក្រុមអត្តពលិកចំនួន ១៨ ប្រភេទកីឡាទៀតរបស់កម្ពុជា នឹងចាប់ដំណើរការប្រកួតបើកឆាករបស់ពួកគេនៅថ្ងៃសុក្រ ថ្ងៃសៅរ៍ និងថ្ងៃអាទិត្យ ចុងសប្តាហ៍នេះ ដើម្បីប្រជែងស្វែងរកឱកាសដណ្តើមយកមេដាយជូនកម្ពុជាផងដែរ ដោយក្នុងនោះ ក្រុមបាល់បោះលើទម្រង់លេង 3x3 រួមទាំងប្រភេទកីឡាកាយវប្បកម្ម កីឡាអេឡិចត្រនិក គុនដាវ វាយកូនគោល ប៉េតង់ សីដក់ វាយកូនឃ្លីលើតុ វាយកូនបាល់ បាល់ទះលើក្តារ និង វ៉ូស៊ូ នឹងចាប់ផ្តើមប្រកួតនៅថ្ងៃសុក្រនេះ។
ចំណែកក្រុមហែលទឹក អត្តពលកម្ម និងក្រុមកីឡាប្រណាំងកង់ភ្នំ នឹងចាប់ផ្តើមប្រកួតនៅថ្ងៃសៅរ៍ រីឯក្រុមប្រដាល់សកលកម្ពុជា, កីឡារាំ និងក្រុមបាល់ទះឆ្នេរខ្សាច់ ត្រូវប្រកួតនៅថ្ងៃអាទិត្យ ហើយប្រភេទកីឡាទ្រីយ៉ាត្លុង និងជឺជិតស៊ូរបស់វីរនារី ខាន់ ចេសា នឹងប្រើការប្រកួតត្រឹមថ្ងៃសៅរ៍ និងថ្ងៃអាទិត្យ ដើម្បីរកម្ចាស់មេដាយទៅតាមប្រភេទទម្ងន់នីមួយៗតែម្តង ខណៈ វ៉ូស៊ូ ក៏ប្រើការប្រកួតត្រឹម ៣ ថ្ងៃ គឺថ្ងៃសុក្រ សៅរ៍ និងថ្ងៃអាទិត្យ ដើម្បីរកម្ចាស់មេដាយដូចគ្នា។
យ៉ាងណាក៏ដោយ កាលវិភាគប្រកួតដែលត្រូវបានបង្ហោះនៅលើវេបសាយផ្លូវការរបស់ស៊ីហ្គេមនៅហាណូយនេះ មិនទាន់បង្ហាញកម្មវិធីប្រកួតលម្អិត ទាក់ទងទៅនឹងបេក្ខភាពត្រូវជួបគ្នានៅឡើយទេ។ តែទោះបីជាយ៉ាងណា ចំពោះវីរកីឡាការិនី ខាន់ ចេសា នឹងត្រូវប្រកួតលើប្រភេទទម្ងន់ ៤៨ គីក្រាម នាថ្ងៃសុក្រ ហើយកីឡាការិនី ម៉ាប់ សុខហួយ ត្រូវប្រកួតទម្ងន់ ៤៥ គីឡូក្រាម នៅថ្ងៃសៅរ៍ ដោយការប្រកួតនេះ អ្នកឈ្នះនៅវគ្គជម្រុះ ត្រូវឡើងទៅវគ្គ ១/២ ផ្តាច់ព្រ័ត្រ ហើយអ្នកឈ្នះ ត្រូវឡើងទៅប្រកួតផ្តាច់ព្រ័ត្រយកមេដាយមាស ក្នុងថ្ងៃតែ ១ នោះតែម្តង។
ទាក់ទងនឹងការប្រកួតស៊ីហ្គេមលើកនេះ ម្ចាស់មេដាយមាសកីឡាអាស៊ីឆ្នាំ ២០១៨ ខាន់ ចេសា ជឿជាក់នឹងអាចឈ្នះមេដាយមាសជូនកម្ពុជា ជាថ្មីម្តងទៀត បន្ថែមទៅលើការឈ្នះមេដាយមាសស៊ីហ្គេមលើកដំបូងនៅហ្វីលីពីន កាលពីឆ្នាំ ២០១៩។ ចេសា បាននិយាយថា៖ «ខ្ញុំគិតថា ការប្រកួតស៊ីហ្គេមលើកនេះ នឹងមានភាពតានតឹងខ្លាំង ប៉ុន្តែគិតតាំងពីខ្ញុំបានឈ្នះមេដាយមាសស៊ីហ្គេមលើកដំបូងនៅហ្វីលីពីន កាលពីឆ្នាំ ២០១៩ មកដល់ពេលនេះ គឺខ្ញុំទទួលបានបទពិសោធប្រកួតកាន់តែច្រើន ដែលធ្វើឱ្យសមត្ថភាពរបស់ខ្ញុំមានភាពប្រសើរ និងខ្លាំងជាងលើកមុន ហេតុនេះខ្ញុំជឿជាក់ថា ខ្ញុំនឹងអាចឈ្នះបានមេដាយមាស ស៊ីហ្គេមនៅវៀតណាម ជូនកម្ពុជាជាថ្មីម្តងទៀត»៕