កីឡាការិនី ខាន់ ចេសា កាន់ទង់ជាតិកម្ពុជា ក្នុងពិធីបើកការប្រកួតស៊ីហ្គេម លើកទី៣១។ CAMSOC
.jpg)
ភ្នំពេញ: គណៈកម្មាធិការអូឡាំពិកជាតិកម្ពុជា (NOCC) និងប្រធានបេសកកម្ម កាលពីថ្ងៃសៅរ៍ ទី ១៤ ខែឧសភា កន្លងទៅនេះ បានសម្តែងការសោកស្តាយ និងការខកចិត្ត បន្ទាប់ពីកីឡាការិនី ខាន់ ចេសា ដែលជាក្តីសង្ឃឹមរបស់កម្ពុជា លើការដណ្តើមមេដាយមាស ធ្លាក់ក្នុងពេលថ្លឹងទម្ងន់ និងមិនអាចចូលរួមក្នុងការប្រកួតលើវិញ្ញាសាជឺជីតស៊ូ ផ្នែកនារី នាព្រឹត្តិការណ៍កីឡាស៊ីហ្គេម លើកទី៣១ ដែលកំពុងដំណើរការក្នុងទីក្រុងហាណូយ ប្រទេសវៀតណាម។
អំឡុងពេលនៃការថ្លឹងទម្ងន់សម្រាប់ការប្រកួតក្នុងទម្ងន់ ៤៨ គីឡូក្រាម ចេសា មានទម្ងន់លើសចំនួន ២,៤ ក្រាម សម្រាប់ការប្រកួតលើប្រភេទទម្ងន់របស់នាង។ ស្ថិតក្រោមច្បាប់របស់សហព័ន្ធកីឡាជឺជីតស៊ូអន្តរជាតិ និងច្បាប់ច្ចេកទេសក្នុងសៀវភៅណែនាំបច្ចេកទេសកីឡាស៊ីហ្គេម កីឡាការិនីរូបនេះ មិនត្រូវបានអនុញ្ញាតឱ្យ ចូលប្រកួតឡើយ។ នេះបើយោងទៅតាមសេចក្តីប្រកាសព័ត៌មានដែល ភ្នំពេញ ប៉ុស្តិ៍ ទទួលបានកាលពីថ្ងៃសៅរ៍ កន្លងទៅ។
គណៈកម្មាធិការអូឡាំពិកជាតិកម្ពុជា បានឱ្យដឹងក្នុងសេចក្តីប្រកាសរបស់ខ្លួនថា៖ «គណៈកម្មាធិការជាតិអូឡាំពិកកម្ពុជា ពិតជាមានការសោកស្តាយណាស់ក្នុងការជូនដំណឹងថា កីឡាការិនី ខាន់ ចេសា នឹងមិនអាចចូលរួមការ-ប្រកួតកីឡាជឺជីតស៊ូ ផ្នែកនារី ក្នុងព្រឹត្តិការណ៍កីឡាស៊ីហ្គេម នៅទីក្រុងហាណូយ ប្រទេសវៀតណាម ដែលចាប់ផ្តើមនៅថ្ងៃនេះបានឡើយ»។
តារាឆ្នើមកូនកាន់ខ្មែរ-អាមេរិក វ័យ ២០ ឆ្នាំរូបនេះ ដែលត្រូវបានចាត់ទុកថា ជាកីឡាការិនីម្នាក់ និងក្នុងចំណោមកីឡាការិនីជឺជីតស៊ូដ៏ឆ្នើមបំផុតប្រចាំអាស៊ីក្នុងប្រភេទទម្ងន់របស់នាងនោះ ក៏ជាអ្នកកាន់ទង់ជាតិតំណាងឱ្យកម្ពុជាផងដែរ អំឡុងពេលការពិធីបើកការប្រកួតកីឡាស៊ីហ្គេម លើកទី៣១ ជាផ្លូវការ កាលពីថ្ងៃទី ១២ ខែឧសភា កន្លងទៅ។
ស្របពេលជាមួយគ្នានេះ គណៈកម្មាធិការជាតិអូឡាំពិកកម្ពុជា ក៏បានធ្វើការស្នើសុំជាផ្លូវការទៅកាន់គណៈកម្មការរៀបចំកីឡាស៊ីហ្គេមភ្លាមៗផងដែរ ក្រោយពីការថ្លឹងទម្ងន់នេះ ដើម្បីសុំឱ្យ ចេសា ប្រកួតក្នុងទម្ងន់ធ្ងន់ជាងនេះ ពោលគឺ ៦២ គីឡូក្រាម ប៉ុន្តែការស្នើសុំនោះ ត្រូវបានច្រានចោល។
រដ្ឋមន្ត្រីក្រសួងទេសចរណ៍ លោកvថោង ខុន ប្រធានគណៈកម្មាធិការជាតិអូឡាំពិកកម្ពុជា និងជាប្រធានប្រតិភូកីឡារបស់កម្ពុជា ក្នុងព្រឹត្តិការណ៍កីឡាស៊ីហ្គេម លើកទី៣១ បានសម្តែងពីការខកចិត្តរបស់លោក ជុំវិញសេចក្តីសម្រេចរបស់គណៈកម្មការរៀបចំ ប៉ុន្តែគោរពតាមការសម្រេចចិត្តនេះ។
លោកបានឱ្យដឹងក្នុងសេចក្តីប្រកាសដដែលថា៖ «មិនថាលទ្ធផលបែបណាក៏ដោយ យើងត្រូវតែគាំទ្រ និងលើកទឹកចិត្តអត្តពលិករបស់យើងជានិច្ច ដើម្បីបន្តនាំជ័យជម្នះដល់ព្រះរាជាណាចក្រកម្ពុជា»។
ប៉ុន្តែទោះបីជាយ៉ាងណា ប្រធានគណៈកម្មាធិការជាតិអូឡាំពិកកម្ពុជារូបនេះ ក៏ស្នើសុំឱ្យប្រជាពលរដ្ឋកម្ពុជា មាន ការអត់ឱន និងយល់យោគលើព័ត៌មានដ៏សោកស្តាយនេះ។ ជាមួយគ្នានេះ NOCC បានបញ្ជាក់ថា កីឡាការិនី ចេសា ពិតជាខកចិត្ត ចំពោះការរក្សាទម្ងន់មិនបាននេះ ខណៈដែលរូបនាង បានត្រៀមលក្ខណៈរួចរាល់ដើម្បីប្រជែងយកមេដាយមាស ឱ្យកម្ពុជា។ ចេសា ដែលជាម្ចាស់មេដាយមាសកីឡាអាស៊ី នៅទីក្រុងហ្សាការតា ឆ្នាំ ២០១៨ និងស៊ីហ្គេម នៅទីក្រុងម៉ានីល ឆ្នាំv២០១៩ ក្រោយពីផ្តួលគូប្រកួតក្នុង លទ្ធផល ១០០-០ ដូចគ្នា នៅវគ្គផ្តាច់ព្រ័ត្រនោះ ត្រូវបានចាត់ទុកថា ជាកីឡាការិនីដែលមានក្តីសង្ឃឹមខ្ពស់ក្នុងការឈ្នះមេដាយមាស ក្នុងព្រឹត្តិការណ៍កីឡាស៊ីហ្គេម លើកទី៣១។
នៅមុនពេលធ្វើដំណើរ ទៅកាន់ទីក្រុងហាណូយ តារាឆ្នើមជឺជីតស៊ូរូបនេះ ក៏បានឈ្នះមេដាយមាស ដែលជាពានខ្សែក្រវាត់ខ្មៅជាលើកដំបូងរបស់នាង ក្នុងព្រឹត្តិការណ៍ IBJJF Pan Championships ឆ្នាំ ២០២២ ក្នុងរដ្ឋ Florida កាលពីខែមេសា ផងដែរ៕
វីដេអូ៖
