ម៉ៅ ពិសិដ្ឋ របស់កម្ពុជា បានព្យាយាមអូសបាល់រំលងកីឡាកររបស់ថៃ។ រូប CAMSOC
.jpg)
ភ្នំពេញៈ ក្រុមជម្រើសជាតិបាល់ទាត់កម្ពុជាទាំងផ្នែកបុរស និងនារី បានជួបភាពជូរចត់ ក្នុងរាត្រីតែមួយ ខណៈក្រុមទាំង ២ នេះ សុទ្ធតែបានចាញ់គូប្រកួតយ៉ាងចាស់ដៃ សម្រាប់ការប្រកួត ជម្រុះតាមពូលរៀងៗខ្លួន ហើយលទ្ធផលនេះ បានបញ្ជាក់យ៉ាងច្បាស់ថា មិនមែនតែក្រុមនារីកម្ពុជាប៉ុណ្ណោះទេ ដែលបានធ្លាក់ចេញពីការប្រកួត ជាមួយការចាញ់ទាំង ២ លើក ប៉ុន្តែក្រុមបុរស ក៏បានធ្លាក់ចេញពីការប្រកួត នៅស៊ីហ្គេមនេះ ដោយស្វ័យប្រវត្តិផងដែរ ទោះនៅសល់ ១ ប្រកួតទៀតក្នុងដៃ។
បើទោះបីជា គ្រូបង្គោលក្រុមជម្រើសជាតិបុរសកម្ពុជា លោក Ryu Hirose បានអះអាង មុនការប្រកួតថា ក្រុមកម្ពុជានឹងធ្វើឱ្យបានល្អ ដើម្បីលាងជម្រះភាពហ្មងសៅ ពេលកម្ពុជាចាញ់ក្រុមសិង្ហបុរី ១-០ ទាំងឈឺចាប់ ប៉ុន្តែតាមការប្រកួតជាក់ស្តែង កាលពីយប់ថ្ងៃសៅរ៍ បានបង្ហាញឱ្យឃើញថា កម្ពុជាមិនទាន់មានសមត្ថភាពគ្រប់គ្រាន់ យកឈ្នះលើក្រុមជម្រើសជាតិថៃនោះទេ។
ត្រឹមរយៈពេល ៤ នាទី ខ្សែប្រយុទ្ធ Chonapat របស់ថៃអាចទម្លុះសំណាញ់ទីក្រុមកម្ពុជា បានសម្រេច ដោយមិនពិបាកពេកនោះទេ ហើយ Korawich និង Worachit បានបន្ថែមម្នាក់ ១ គ្រាប់ទៀត នៅនាទីទី៣១ និងទី៤១ ចំណែកប្រធានក្រុម សៀង ចន្ធា, ណារ៉ុង កក្កដា និង ជា សុខម៉េង ក៏មានបង្កើតឱកាសរកគ្រាប់បាល់ដែរ ប៉ុន្តែពួកគេធ្វើមិនបានសម្រេចឡើយ។
សម្រាប់ការប្រកួតនៅក្នុងតង់ទី២ ក្រុមថៃបានបង្កើតឱកាសកាន់តែច្រើន ហើយរកបាន ២ គ្រាប់បន្ថែម ដែលជាការស៊ុតបញ្ចូលទីរបស់ Gustavsson នៅនាទីទី៧២ និងទី៨៨ ខណៈគ្រាប់បាល់ដាច់មាត់ជាច្រើនទៀតរបស់ក្រុមថៃ ត្រូវបានសង្គ្រោះដោយអ្នកចាំទី ហ៊ុល គឹមហ៊ុយ ចំណែក មិន រតនៈ ដែលដាក់ឱ្យចូលលេង នៅតង់ទី២ ក៏គួរណាស់ អាចរកបានគ្រាប់បាល់ឱ្យកម្ពុជាផងដែរ នៅពេលរូបគេ ឆក់បាល់ចេញពីជើងកីឡាករថៃ បានសម្រេចនៅមុខទី ប៉ុន្តែកីឡាកររបស់ក្លិបព្រះខ័នរាជស្វាយរៀងរូបនេះ បែរជាស៊ុតបាល់នោះទៅប៉ះបង្គោលទីទៅវិញ។
តាមរយៈលទ្ធផលនេះ បានបញ្ជាក់ថា ក្រុមកម្ពុជាបានធ្លាក់ចេញពីការប្រកួតនេះ ដោយស្វ័យប្រវត្តិហើយ បើទោះបីជានៅសល់ ១ ប្រកួតទៀត ជាមួយក្រុមម៉ាឡេស៊ី ដែលនឹងត្រូវធ្វើ នៅរសៀលម៉ោង ៤ ថ្ងៃចន្ទនេះក៏ដោយ ចំណែកក្រុមថៃ ត្រូវជួបក្រុមឡាវ នៅយប់ម៉ោង ៧ ហើយនេះក៏ជាការប្រកួតដណ្តើមយកលេខ ១ និងលេខ ២ ដោយប្រយោល រវាងថៃ និងម៉ាឡេស៊ី ដែរ មុនពេលពួកគេដឹកនាំគ្នា ឡើងទៅវគ្គពាក់កណ្តាលផ្តាច់ព្រ័ត្រ តំណាងឱ្យពូល B នេះ។
ដោយឡែកក្រុមនារីកម្ពុជា ក៏ជួបភាពជូរចត់ខ្លាំង សម្រាប់ការបង្ហាញខ្លួនជាលើកដំបូងនៅស៊ីហ្គេមលើកនេះ ដោយក្រុមដ៏ក្មេងខ្ចីមួយនេះ បានបញ្ចប់ការប្រកួតជម្រុះក្នុងពូល ដោយរកមិនបាន ១ គ្រាប់សោះ ព្រោះបានចាញ់ក្រុមនារីហ្វីលីពីន ៥-០ និងបន្តចាញ់ក្រុមលេខ ១ របស់ម្ចាស់ផ្ទះ ៧-០ កាលពីយប់ថ្ងៃសៅរ៍ ហេតុនេះ ក្រុមនារីវៀតណាម និងហ្វីលីពីន ជាអ្នកដណ្តើមបានកៅអី ឡើងទៅវគ្គបន្ត ប្រចាំពូល A នេះ៕
