ការប្រកួតជិះសេះលោតផ្លោះរបារ នៅក្នុងវគ្គបណ្តុះបណ្តាលមន្រ្តីបច្ចេកទេសថ្នាក់ជាតិ ឆ្នាំ ២០២២ កាលពីថ្ងៃអាទិត្យ។ រូបថត ឈន ណន
.jpg)
ភ្នំពេញ៖ ប្រធានសហព័ន្ធកម្ពុជាបង្ហាត់ជិះសេះ អ្នកស្រី ទេព ម៉ូណា បានអះអាងថា ថ្នាក់ដឹកនាំសហព័ន្ធ រួមទាំងក្រុមជម្រើសជាតិ និងភាគីពាក់ព័ន្ធ មិនបានទម្លាក់ដៃ ឬបន្ថយនូវឆន្ទៈ សម្រាប់ការឆ្ពោះទៅរកមេដាយជូនប្រទេសជាតិ សម្រាប់ការប្រកួតស៊ីហ្គេមនោះទេ បើទោះបីជាពេលនេះ ប្រភេទកីឡាជិះសេះ មិនស្ថិតនៅក្នុងប្រភេទកីឡាទាំង ៤០ ដែលត្រូវដាក់ឱ្យចូលរួមប្រកួតស៊ីហ្គេម លើកទី៣២ ឆ្នាំ ២០២៣ នៅក្នុងប្រទេសកម្ពុជា ក៏ដោយ។
អ្នកស្រី ទេព ម៉ូណា បានថ្លែងថា៖ «បើទោះបីជាលទ្ធផលប្រជុំលើកចុងក្រោយ យើងទទួលបានលទ្ធផលយ៉ាងម៉េចក៏ដោយ គឺយើងត្រូវតែត្រៀមខ្លួនឱ្យបានរួចរាល់ ទាំងប្រភេទវិញ្ញាសាលោតផ្លោះរបារ និងវិញ្ញាសារត់ចម្ងាយ លើផ្ទៃរាប ព្រោះបើយើងមិនបានចូលរួមការប្រកួតស៊ីហ្គេម ឆ្នាំ ២០២៣ នៅកម្ពុជា ក៏យើងនៅមានស៊ីហ្គេម ក្រោយៗទៀត ហើយយើងក៏មានការចេញទៅប្រកួត នៅក្រៅប្រទេសផ្សេងៗទៀតផងដែរ ហេតុនេះយើងមិនអាចទម្លាក់ដៃ ឬមិនខំប្រឹងបាននោះទេ»។
គួរបញ្ជាក់ថា នៅក្នុងការដឹកនាំកិច្ចប្រជុំ ក្រុមប្រឹក្សាកីឡាអាស៊ីអាគ្នេយ៍ ជាមួយបណ្តាប្រទេសទាំងអស់ ក្នុងតំបន់អាស៊ាន នៅខេត្តសៀមរាប កាលពីខែមេសា ឆ្នាំ២០២២នេះគណៈកម្មាធិការជាតិរៀបចំការប្រកួតស៊ីហ្គេម លើកទី៣២ ឆ្នាំ ២០២៣ (CAMSOC) ក្នុងនាមជាម្ចាស់ផ្ទះ បានទទួលការគាំទ្រពីអង្គប្រជុំ ក្នុងការដាក់ប្រភេទកីឡាចំនួន៤០ សម្រាប់ការប្រកួតស៊ីហ្គេម ឆ្នាំ២០២៣ ហើយក្នុងនោះ កម្ពុជា ក៏ទទួលបានជោគជ័យ ក្នុងការដាក់ប្រភេទកីឡាប្រពៃណី «គុនល្បុក្កតោ» ទៅក្នុងស៊ីហ្គេម ផងដែរ ប៉ុន្តែនៅក្នុងប្រភេទកីឡាទាំង៤០នោះ មិនមានប្រភេទកីឡាជិះសេះ នោះទេ។
លោកស្រី ទេព ម៉ូណា ប្រធានសហព័ន្ធកម្ពុជាបង្ហាត់ជិះសេះ បានពិនិត្យមើលសេះ បន្ទាប់ពីការប្រកួតលោតផ្លោះរបារ កាលពីថ្ងៃអាទិត្យ។ រូបថត ឈន ណន
តែទោះបីជាយ៉ាងណា លោក វ៉ាត់ ចំរើន អគ្គលេខាធិការ CAMSOC ធ្លាប់បានប្រាប់ ភ្នំពេញ ប៉ុស្តិ៍ថា កម្ពុជាក្នុងនាមជាម្ចាស់ផ្ទះ នឹងបើកកិច្ចប្រជុំជាមួយក្រុមប្រឹក្សាកីឡាអាស៊ីអាគ្នេយ៍ ជាលើកទី២ នាពេលខាងមុខនេះ ដើម្បីធ្វើការពិនិត្យ និងសម្រេចឡើងវិញថា តើនៅក្នុងប្រភេទកីឡាទាំង ៤០ ដែលបានជ្រើសរើស និងដាក់ត្រៀមសម្រាប់ស៊ីហ្គេម ឆ្នាំ ២០២៣ នេះ នឹងត្រូវរក្សាទុកដដែល ឬក៏មានការផ្លាស់ប្តូរខ្លះ ហើយដាក់ប្រភេទកីឡាថ្មីចូល ដែលវាអាស្រ័យទៅលើ ការសម្រេចចុងក្រោយ ក្នុងកិច្ចប្រជុំនោះតែម្តង។
ជាមួយហេតុផលនេះ អ្នកស្រី ទេព ម៉ូណា នៅតែមានការជឿជាក់ និងសង្ឃឹមថា ប្រភេទកីឡាជិះសេះ នឹងត្រូវបានជ្រើសរើសដាក់បញ្ចូលឡើងវិញ សម្រាប់ការប្រកួតស៊ីហ្គេម នៅប្រទេសកម្ពុជា ជាលើកដំបូងនេះ ដែលស្របទៅនឹងការព្យាយាមរបស់សហព័ន្ធកម្ពុជាបង្ហាត់ជិះសេះ ដើម្បីសម្រួចទៅរកការដណ្តើមឱ្យបានមេដាយ នៅក្នុងកម្រិតណាមួយ ពិសេសមេដាយមាស ជូនប្រទេសជាតិ។
អ្នកស្រី ទេព ម៉ូណា បានថ្លែងថា៖ «បើទោះបីជាពេលនេះ ប្រភេទកីឡាជិះសេះ មិនទាន់ត្រូវបានជ្រើសរើស ប៉ុន្តែខ្ញុំនៅតែសង្ឃឹមថា ប្រភេទនេះ នឹងត្រូវបានជ្រើសរើស ដាក់បញ្ចូល នៅក្នុងការប្រកួតស៊ីហ្គេម ឆ្នាំ ២០២៣ អ៊ីចឹងយើងត្រូវតែព្យាយាម និងត្រៀមខ្លួនឱ្យបានរួចរាល់ សម្រាប់ចូលរួមក្នុងព្រឹត្តិការណ៍ជាប្រវត្តិសាស្រ្ត នៅកម្ពុជានេះ ព្រោះទិសដៅរបស់យើង ត្រូវរកមេដាយស៊ីហ្គេម ជូនប្រទេសជាតិ ឱ្យខានតែបាន»។
ជាមួយទិសដៅ ក្នុងការប្រជែងរកមេដាយ ជូនប្រទេសជាតិ នៅស៊ីហ្គេមនេះ សហព័ន្ធកម្ពុជាបង្ហាត់ជិះសេះ បានកំពុងនឹងព្យាយាមអភិវឌ្ឍទាំងកីឡាករ កីឡាការិនី និងសេះ ទាំងលើប្រភេទកីឡាជិះសេះផ្លោះរបា និងការប្រណាំងសេះលើផ្ទៃរាប បែបម៉ារ៉ាតុង គឺធ្វើយ៉ាងណា ឱ្យផ្នែកទាំង ២ នេះ មានគុណភាពខ្ពស់ ទាំងអត្តពលិក និងសេះ ដើម្បីឈានទៅប្រកួតប្រជែងយកមេដាយ។
ជាក់ស្តែង កាលពីថ្ងៃសៅរ៍ និងថ្ងៃអាទិត្យ កន្លងមកនេះ សហព័ន្ធកម្ពុជាបង្ហាត់ជិះសេះ បានបើកវគ្គបណ្តុះបណ្តាលមន្រ្តីបច្ចេកទេសថ្នាក់ជាតិ ផ្នែកកីឡាជិះសេះលោតផ្លោះរបារ នៅក្លិបកីឡា Cambodian Country Club ដើម្បីឱ្យមន្រ្តីបច្ចេកទេស កីឡាករ កីឡាការិនី ក៏ដូចជាសិស្សានុសិស្ស មកពីសាកលវិទ្យាល័យកសិកម្ម បានយល់កាន់តែច្បាស់ អំពីការងារបច្ចេកទេស ការមើលថែទាំសេះ ការរៀបចំសេះ មុនពេលប្រកួត អំឡុងពេលប្រកួត និងក្រោយការប្រកួត ទៅលើប្រភេទកីឡាជិះសេះផ្លោះរបារនេះ។
មិនតែប៉ុណ្ណោះ នៅក្នុងវគ្គបណ្តុះបណ្តាលនោះ ក៏មានការអនុវត្តជាក់ស្តែង ដោយមានការប្រកួតលោតផ្លោះរបាររយៈកម្ពស់ចាប់ពី ៦០ សង់ទីម៉ែត្រ ដល់កម្ពស់ ១ ម៉ែត្រ ផងដែរ ហើយអ្នកស្រី ទេព ម៉ូណា បានអះអាងថា វគ្គបណ្តុះបណ្តាលនេះ ពិតជាមានសារៈសំខាន់ណាស់ ដើម្បីឱ្យក្រុមអត្តពលិក ជាពិសេសក្រុមជម្រើសជាតិ បានយល់កាន់តែច្បាស់ពីបែបបទនៃបច្ចេកទេស ពិសេសការតំហែទាំសេះ ព្រោះសេះ និងអ្នកជិះ ត្រូវតែ មានការយល់ចិត្តគ្នាបំផុត ទើបអាចលោតផ្លោះរបារជាមួយគ្នាបាន។
ប្រធានសហព័ន្ធរូបនេះ បានសង្កត់ធ្ងន់ដែរថា៖ «ការថែទាំសេះ គឺជារឿងសំខាន់បំផុត ទាំងមុនពេលប្រកួត ក្នុងពេលប្រកួត និងក្រោយពេលប្រកួត ដោយត្រូវត្រួតពិនិត្យយ៉ាងយកចិត្តទុកដាក់ ពីក្រុមពេទ្យសត្វ និងអ្នកថែទាំសេះ ជាពិសេសកីឡាករ ដែលថែទាំទៅលើសុខភាព ដូចជាកម្តៅ ចង្វាក់បេះដូង ល្បឿន និងការរងរបួសរបស់សេះ ព្រោះកីឡាករ មិនមែនលោតតែម្នាក់ឯងនោះទេ គឺលោតជាមួយសេះ អ៊ីចឹងក្នុងន័យហ្នឹង យើងត្រូវថែរក្សាសុខភាពរបស់សេះ»។
អ្នកស្រី ទេព ម៉ូណា បានបន្ថែមថា៖ «ជិះសេះលោតផ្លោះរបារ ជាកីឡាពិសេស ព្រោះបើយើងទាត់បាល់ គឺបាល់អត់មានអារម្មណ៍អីទេ ប៉ុន្តែសេះមាន អ៊ីចឹងក្នុងករណីហ្នឹង សេះត្រូវតែស្កប់ចិត្ត ដោយមិនត្រូវមានការខ្លាច នៅពេលគាត់លោតនោះទេ! បើសិនជាមានមនុស្សណា គាត់ខ្លាច នៅលើខ្នងរបស់គាត់ ដឹងតែលោតទៅប៉ះ និងធ្លាក់របងអស់ហើយ ហេតុនេះ ទាំងកីឡាករ កីឡាការិនី និងសេះ ត្រូវមានអារម្មណ៍ស្ងប់ និងស៊ីសង្វាក់គ្នា ក្នុងការលោតផ្លោះរបារទី ពី ១០ ដល់ ១២ ឬ ១៥ របារទី។ ដូច្នេះ វាត្រូវមានការហ្វឹកហាត់សមច្រើនណាស់រវាងកីឡាករ និងសេះ ដើម្បីឱ្យអ្នកជិះ និងសេះ មានការយល់ចិត្តគ្នា ឬអាចនិយាយបានថា ជាមនុស្សតែមួយ ទើបលោតទៅបានល្អ»។
ជាមួយគ្នានេះកីឡាករថ្នាលជម្រើសជាតិកីឡាជិះសេះលោតផ្លោះរបារ រិនដា ម៉េងឡុង ក៏បានចាត់ទុកវគ្គបណ្តុះបណ្តាលនេះ មានប្រយោជន៍ចំពោះរូបគេ និងសេះ ផងដែរ។ កីឡាករ វ័យ១៧ឆ្នាំរូបនេះ បាននិយាយថា៖ «វគ្គបណ្តុះបណ្តាលនេះ វាមានសារៈសំខាន់ណាស់ ព្រោះបានជួយពង្រឹង ដល់សមត្ថភាពរបស់យើងឱ្យកាន់តែខ្លាំង សម្រាប់ឆ្ពោះទៅស៊ីហ្គេម ឆ្នាំ ២០២៣ ហើយវគ្គនេះដែរ វាបានបង្រៀនសេះឱ្យចេះលោត ពិសេសយល់ចិត្តគ្នាជាមួយយើង មានន័យថា ពេលយើងភ័យ វាក៏ដឹងពីអារម្មណ៍យើង អ៊ីចឹងយើងជាអ្នកជិះ និងសេះ ត្រូវបានចិត្តដូចគ្នា ទើបអាចលោតផ្លោះរបារ ជាមួយគ្នាបាន»៕
