ភ្នំពេញៈ ថ្នាក់ដឹកនាំ និងមន្ត្រីជំនាញរបស់គណៈកម្មាធិការជាតិ-អូឡាំពិកកម្ពុជា (NOCC) គ្រោងនឹងកែប្រែទិវារត់ប្រណាំងភ្នំពេញពាក់កណ្តាលម៉ារ៉ាតុងអន្តរជាតិ ដែលមានរយៈចម្ងាយ ២១ គីឡូម៉ែត្រឱ្យក្លាយទៅជាការរត់ប្រណាំងម៉ារ៉ាតុង មានចម្ងាយ ៤២ គីឡូម៉ែត្រវិញ ព្រោះកម្ពុជាចង់ប្រើព្រឹត្តិការណ៍នេះ ដើម្បីផ្សព្វផ្សាយពីរាជធានីភ្នំពេញទៅកាន់ពិភពលោក។
បើទោះបីជា គម្រោងនៃការកែប្រែទិវារត់ប្រណាំងពាក់កណ្តាលម៉ារ៉ាតុងអន្តរជាតិឱ្យទៅជាការរត់ប្រណាំងម៉ារ៉ាតុងនៅរាជធានីភ្នំពេញនេះ មិនទាន់បានកំណត់ពេលវេលាជាក់លាក់ណាមួយ ប៉ុន្តែតាមរយៈការទទួលបានជោគជ័យ ដោយមានអ្នកចូលរួមច្រើននៅក្នុងការរៀបចំឡើងវិញនៃទិវារត់ប្រណាំងភ្នំពេញពាក់កណ្តាលម៉ារ៉ាតុងអន្តរជាតិ លើកទី ១០ ឆ្នាំ ២០២២ នៅខាងមុខព្រះបរមរាជវាំងនៅថ្ងៃទី ១៩ ខែមិថុនា បានធ្វើឱ្យមន្ត្រីជំនាញរបស់ NOCC កាន់តែមានភាពជឿជាក់ថា ទិវារត់ប្រណាំងភ្នំពេញម៉ារ៉ាតុងនឹងអាចរៀបចំឡើងក្នុងពេលឆាប់ៗនេះ។
លោក វ៉ាត់ ចំរើន អគ្គលេខាធិការ NOCC បានថ្លែងនៅក្រោយបញ្ចប់ការប្រកួតរត់ប្រណាំង ភ្នំពេញពាក់កណ្តាលម៉ារ៉ាតុងអន្តរជាតិ នៅថ្ងៃទី ១៩ មិថុនាថា៖ «ការរៀបចំទិវារត់ប្រណាំងភ្នំពេញពាក់កណ្តាលម៉ារ៉ាតុងអន្តរជាតិឡើងវិញ នៅព្រឹកនេះ ឃើញថា មានភាពកុះករ មានបរិយាកាសថ្មី ដែលជាពេលវេលាបង្ហាញពីសន្តិភាព សុវត្ថិភាព និងការរួចផុតពីកូវីដ ១៩ ដោយសារយើងបានទទួលការចាក់វ៉ាក់សាំងទាំងអស់គ្នា ដោយសម្តេចតេជោនាយករដ្ឋមន្ត្រីលោកបានយកចិត្តទុកដាក់ខ្ពស់ក្នុងការស្វែងរកវ៉ាក់សាំង ក៏ដូចជាផ្តល់ និងជំរុញឱ្យមានការចាក់វ៉ាក់សាំងទាំងអស់នេះ គឺជំរុញឱ្យមានការបើកសង្គមសេដ្ឋកិច្ចឡើងវិញ»។
លោកបានបន្តថា៖ «នេះជាខួបទី ១០ ដែលយើងបានរៀបចំព្រឹត្តិការណ៍នេះ ឱ្យមានភាពគគ្រឹកគគ្រេងឡើងវិញ ហើយយើងឃើញថា មានអ្នកចូលរួមចុះឈ្មោះតែជាង ៣ ០០០ នាក់ទេ ប៉ុន្តែទិដ្ឋភាពជាក់ស្តែងនាមិញនេះមានប្រហែល ៥ ០០០ នាក់ ព្រោះអ្នកមកចុងក្រោយ ដោយមិនបានចុះឈ្មោះក៏ពួកគាត់មានទឹកចិត្តសប្បាយរីករាយក្នុងការចូលរួមដែរ ហើយអ្វីដែលសំខាន់ គឺការរៀបចំព្រឹត្តិការណ៍នាពេលនេះយើងទទួលបានការគាំទ្រពីគ្រប់មជ្ឈដ្ឋានទាំងអស់»។
តាមតួលេខផ្លូវការ សម្រាប់អ្នកដែលបានចុះឈ្មោះចូលរួមនៅក្នុងទិវារត់ប្រណាំង ភ្នំពេញពាក់កណ្តាលម៉ារ៉ាតុង អន្តរជាតិ លើកទី ១០ ឆ្នាំ ២០២២ នេះ គឺមានចំនួនសរុប ៣ ៦២១ នាក់ ក្នុងនោះមានកីឡាករ-កីឡាការិនីជាតិ ចំនួន ៣ ២៣៦ នាក់ និងបរទេសចំនួន ៣៨៥ នាក់ ដែលភាគច្រើនជាជនបរទេសនៅកម្ពុជា និងអ្នកមកពីក្រៅប្រទេសប្រមាណ ១០ ភាគរយ ហើយអ្នកទាំងនេះបានចូលរួមប្រកួតនូវវិញ្ញាសាចម្ងាយ ២១ គីឡូម៉ែត្រ, ១០ គីឡូម៉ែត្រ និង ៣ គីឡូម៉ែត្រ រីឯលទ្ធផល និងការរៀបចំគ្រប់យ៉ាងបានដំណើរការទៅយ៉ាងរលូន ដែលធ្វើឱ្យក្រុមអ្នកជំនាញកាន់តែមានសុទិដ្ឋិនិយមក្នុងការកែប្រែព្រឹត្តិការណ៍នេះទៅជាការរត់ប្រណាំង «ភ្នំពេញម៉ារ៉ាតុងអន្តរជាតិ» នៅឆ្នាំក្រោយ។
ប្រធានគ្រប់គ្រងការប្រកួត លោក វ៉ាត់ ចំរើន បញ្ជាក់ថា ការចូលរួមបិទផ្លូវរបស់សមត្ថកិច្ចតាមផ្លូវរត់ ឃើញថាមានសុវត្ថិភាពល្អមិនមានបញ្ហាអ្វីកើតឡើងទាំងអស់ ហើយទាំងអនាម័យការរៀបចំអ្វីផ្សេងៗទៀត គឺទទួលបានជោគជ័យ។ លោកបញ្ជាក់ថា៖ «ហេតុនេះ យើងសង្ឃឹមថា ក្រោយពីវិបត្តិជំងឺកូវីដ-១៩ នេះ គឺគណៈកម្មការរៀបចំរបស់គណៈកម្មាធិការជាតិ-អូឡាំពិកកម្ពុជាតាមអនុសាសន៍ណែនាំរបស់ឯកឧត្ដមបណ្ឌិត ថោង ខុន នឹងប្រែក្លាយទិវារត់ប្រណាំងពាក់កណ្តាលម៉ារ៉ាតុងនេះទៅជាភ្នំពេញម៉ារ៉ាតុងចម្ងាយ ៤២ គីឡូម៉ែត្រវិញ នៅក្នុងរយៈពេលឆាប់ៗខាងមុខ»។
អ្នកជំនាញកីឡារូបនេះបានបន្ថែមថា៖ «បើយើងពិនិត្យឃើញថា យើងអាចធ្វើបាននៅឆ្នាំក្រោយ យើងធ្វើនៅឆ្នាំក្រោយ ដើម្បីផ្សព្វផ្សាយរាជធានីភ្នំពេញទៅពិភពលោកឱ្យបានស្គាល់ដូចជា ប៉ារីសម៉ារ៉ាតុង ប៊ូសស្តុនម៉ារ៉ាតុង និងញូវយ៉កម៉ារ៉ាតុង ជាដើមហើយទាំងអស់នេះជាគោលបំណងធំរបស់យើង។ ហេតុនេះសូមឱ្យប្រជាពលរដ្ឋទាំងអស់មានសុខភាពល្អ និងកាត់បន្ថយសេវាកម្មផ្នែកសុខភាពនេះ ដើម្បីយើងរួមគ្នា ធ្វើព្រឹត្តិការណ៍នេះឱ្យកាន់តែធំ កាន់តែអស្ចារ្យ និងកាន់តែល្បីល្បាញជាបន្តទៀត។
ទោះបីការរត់ប្រណាំងភ្នំពេញពាក់កណ្តាលម៉ារ៉ាតុងអន្តរជាតិនេះមិនផ្តោតខ្លាំងទៅលើលទ្ធផលបច្ចេកទេស ប៉ុន្តែគណៈកម្មាធិការជាតិរៀបចំការប្រកួតកីឡាអាស៊ី-អាគ្នេយ៍ លើកទី ៣២ ឆ្នាំ ២០២៣ (CAMSOC) បានយកព្រឹត្តិការណ៍នេះ ដើម្បីបំផុសចលនាវិស័យកីឡាទៅកាន់មហាជន ជាពិសេសគឺប្រជាជនកម្ពុជា ក្នុងការត្រៀមខ្លួនទាំងអស់គ្នា ទៅធ្វើជាម្ចាស់ផ្ទះស៊ីហ្គេម-អាស៊ានហ្គេមជាប្រវត្តិសាស្ត្រលើកដំបូងនៅឆ្នាំ ២០២៣។
នៅត្រង់ចំណុចនេះ លោក វ៉ាត់ ចំរើន ដែលជាអគ្គលេខាធិការ CAMSOC ផងនោះ បាននិយាយថា៖ «ការរៀបចំ ទិវារត់ប្រណាំងភ្នំពេញពាក់កណ្តាលម៉ារ៉ាតុងអន្តរជាតិនេះដែរ គឺយើងត្រៀមឆ្ពោះទៅស៊ីហ្គេម-អាស៊ានប៉ារ៉ាហ្គេម ឆ្នាំ ២០២៣។ យើងបានបំផុសចលនានេះតាំងពីឥឡូវទៅដោយគ្រប់ព្រឹត្តិការណ៍ទាំងអស់ គឺយើងធ្វើសម្រាប់ការឆ្ពោះទៅឆ្នាំ ២០២៣ ដែលជាព្រឹត្តិការណ៍ប្រវត្តិសាស្ត្រ ៦៤ ឆ្នាំ នៅកម្ពុជា»។
ជាមួយគ្នានេះ ទិវារត់ប្រណាំងភ្នំពេញពាក់កណ្តាលម៉ារ៉ាតុងអន្តរជាតិក៏ត្រូវបានរៀបចំឡើង ដើម្បីអបអរសាទរព្រះរាជ្យពិធីបុណ្យចម្រើនព្រះជន្ម សម្ដេចព្រះមហាក្សត្រី នរោត្តម មុនិនាថសីហនុ ព្រះវររាជមាតាជាតិខ្មែរ ព្រមទាំងដើម្បីទីក្រុងស្អាត និងការងារមនុស្សធម៌ផងដែរ ព្រោះថវិកាទទួលបានពីការប្រកួតនេះ នឹងត្រូវយកទៅជួយដល់មន្ទីរពេទ្យគន្ធបុប្ផា និងអង្គការសប្បុរសផ្សេងៗទៀតនៅកម្ពុជា។
លោក ថោង ខុន ប្រធាន NOCC បានថ្លែង មុនពេលចាប់ផ្តើមរត់ប្រណាំងពីព្រឹកថ្ងៃទី ១៩ មិថុនាថា៖ «សូមស្វាគមន៍យ៉ាងកក់ក្តៅចំពោះវត្តមានបងប្អូនប្រជាពលរដ្ឋ និងកីឡាករ កីឡាការិនីជាតិ-អន្តរជាតិទាំងអស់ ដែលបានចូលរួមគាំទ្រចលនាកីឡាយ៉ាងច្រើនកុះករនាពេលនេះ»៕