កីឡាករ វឿន វាសនា បានលោតបាំងបាល់ ពីការគប់របស់កីឡាករក្រុមក្រសួងមហាផ្ទៃ ក្នុងការប្រកួតមិត្តភាព កាលពីដើមខែមិថុនា នេះ។ រូបថត ឈន ណន
.jpg)
ភ្នំពេញ៖ ជាមួយសមត្ថភាព និងទេពកោសល្យល្អផ្តាច់គេ ប្រចាំក្រុមជម្រើសជាតិបាល់ទះកម្ពុជា វឿន វាសនា បានក្លាយជាកីឡាករដំបូងគេ ដែលបានបំបែកឯតទគ្គកម្មតម្លៃខ្លួន ថ្លៃជាងគេ ប្រចាំនៅស្រុកខ្មែរ សម្រាប់ការផ្ទេរទៅលេងឱ្យក្លិបនៅក្រៅប្រទេស ខណៈសាមីខ្លួនផ្ទាល់ បានបង្ហើបថា មហិច្ឆតាធំបំផុតរបស់គេ គឺការទទួលបានឱកាសទៅលេង នៅប្រទេសឥណ្ឌូនេស៊ី ជាពិសេស ជប៉ុនតែម្តង។
ក្រោមការអនុញ្ញាតតាមផ្លូវច្បាប់របស់សហព័ន្ធកីឡាបាល់ទះអាស៊ី ក្លិបបាល់ទះវិសាខា របស់កម្ពុជា បានឈានទៅដល់ការចុះកុងត្រា ក្នុងការផ្ទេរកីឡាករឆ្នើម វឿន វាសនា ឱ្យទៅលេងនៅក្លិប Long An របស់ប្រទេសវៀតណាម ក្នុងរយៈពេល២សប្តាហ៍ ចំណែកតម្លៃខ្លួនវិញត្រូវបានលោកអាំង សិរីពិសិដ្ឋ អគ្គលេខាធិការសហព័ន្ធកីឡាបាល់ទះកម្ពុជាបង្ហើបថា ខ្ទង់ម៉ឺនដុល្លារ គឺ វឿន វាសនា បានបំបែកឯតទគ្គកម្មថ្លៃខ្លួន ជាប្រវត្តិសាស្រ្ត ក្នុងពិភពបាល់ទះនៅស្រុកខ្មែរ។
លោក អាំង សិរីពិសិដ្ឋ បានថ្លែងនៅក្នុងសន្និសីទកាសែតកាលពីថ្ងៃអង្គារ ទី ១៤ ខែមិថុនាថា៖ «កាលពីឆ្នាំ ២០១៧ កីឡាកររបស់យើងក៏ធ្លាប់បានទៅលេងនៅឥណ្ឌូនេស៊ី និងថៃ ផងដែរ ដោយពួកគេមានទាំងតម្លៃខ្លួន និងប្រាក់បៀរវត្សរ៍ គ្រាន់តែកាលនោះ វារាងតិច ប៉ុន្តែករណី វឿន វាសនា នេះ ការទិញទៅប្រទេសវៀតណាម មានរយៈពេលខ្លី ប៉ុន្តែតម្លៃខ្លួនរបស់គាត់គឺខ្ពស់ដែលខ្ញុំអាចនិយាយបានថាយើងកំពុងបំបែកឯតទគ្គកម្មតម្លៃខ្លួន ដោយគ្មានអ្នកណា មានតម្លៃខ្លួន ច្រើនជាង វឿន វាសនា នោះទេ នៅស្រុកខ្មែរយើងនេះ»។
តាមការអះអាងរបស់លោក អាំង សិរីពិសិដ្ឋ បានឱ្យដឹងថា មិនមែនមានតែ វឿន វាសនា ម្នាក់ទេ ដែលមានក្លិបនៅក្រៅប្រទេសបានទាក់ទងឬចង់ទិញទៅគឺកីឡាករកម្ពុជា ៥ទៅ៦នាក់ទៀតក៏ត្រូវក្លិបនៅក្រៅប្រទេសទាក់ទងមកដែរ ប៉ុន្តែនៅក្នុងកាលៈទេសៈដែលកម្ពុជាកំពុងត្រៀមខ្លួនឆ្ពោះទៅធ្វើម្ចាស់ផ្ទះស៊ីហ្គេមឆ្នាំ ២០២៣ នោះ គឺមានតែ វឿន វាសនា ម្នាក់ទេ ដែលត្រូវបានផ្ទេរទៅលេងនៅក្លិប Long An ដែលស្របទៅតាមការចង់បានរបស់ក្លិបវិសាខានិងស្របតាមការអភិវឌ្ឍកីឡាករបាល់ទះរបស់កម្ពុជាក្នុងការឆ្ពោះទៅប្រមាញយកមេដាយ នៅឆ្នាំ២០២៣។
កីឡាករ វឿន វាសនា និងលោកបណ្ឌិត អាំង សិរីពិសិដ្ឋ អគ្គលេខាធិការសហព័ន្ធកីឡាបាល់ទះកម្ពុជា។ រូបថត សហការី
អគ្គលេខាធិការរូបនេះបានបញ្ជាក់ថា៖ «មិនមែនមានតែក្លិប Long An មួយទៀត គឺក្លិបនៅហូជីមិញក្លិបនៅហាណូយនិងក្លិបជាច្រើនទៀតបានធ្វើសំណើមកខ្ញុំដើម្បីយកកីឡាកររបស់យើងទៅលេង ប៉ុន្តែយើងត្រូវមើលលក្ខខណ្ឌផងដែរថាតើអត្តប្រយោជន៍របស់គាត់បានអ្វីខ្លះ»។
លោកបានបន្ថែមថា៖ «បើសិនជាយើងមិនបានគិតពីអត្ថប្រយោជន៍ឬថ្លឹងថ្លែងជាមួយបណ្តាក្លិបដទៃទៀត អ៊ីចឹងតម្លៃខ្លួនរបស់ វឿន វាសនា គឺទាបដូចគ្នា ហេតុនេះយើងចង់ដឹងថា អ្នកឯងហ៊ានឱ្យតម្លៃខ្លួនប៉ុនណា សម្រាប់គុណផលកីឡាកររបស់ខ្ញុំប៉ុណ្នឹង ហើយយើងក៏បានគិតគូរដល់អត្ថប្រយោជន៍ផ្សេងទៀត និងសុខសុវត្ថិភាពរបស់កីឡាករយើង ដូច្នេះចំពោះ វឿន វាសនា នេះ យើងក៏មានគ្រូជំនួយម្នាក់ ដើម្បីជួយមើលការខុសត្រូវគាត់ផងដែរ»។
គួររំឭកថា សម្រាប់ការប្រកួតស៊ីហ្គេម លើកទី៣១ ឆ្នាំ ២០២១ នៅប្រទេសវៀតណាម កាលពីពេលថ្មីៗនេះ វឿន វាសនា បានក្លាយជាកីឡាករដ៏សំខាន់បំផុតដែលបានជួយឱ្យក្រុមជម្រើសជាតិបាល់ទះកម្ពុជា ឈ្នះមេដាយសំរឹទ្ធ ជាប្រវត្តិសាស្រ្តលើកដំបូង បន្ទាប់ពីកម្ពុជា បានរង់ចាំអស់រយៈពេលជិត ៤០ ឆ្នាំ។
យ៉ាងណាក៏ដោយកីឡាករមានដើមកំណើតនៅខេត្តបាត់ដំបង វឿន វឿន មិនបានបញ្ចប់មហច្ឆិតារបស់ខ្លួនត្រឹមការឈ្នះមេដាយស៊ីហ្គេមឬការបានចេញទៅលេងត្រឹមលីគបាល់ទះនៅប្រទេសវៀតណាមនោះទេគឺកីឡាករកើតនៅឆ្នាំ ២០០១ រូបនេះចង់ប្រើឱកាសនេះ ពង្រឹងសមត្ថភាពរបស់ខ្លួនបន្ថែមទៀតដើម្បីអាចចាប់បានឱកាសកាន់តែពិសេសសម្រាប់ឈានទៅសម្រេចក្តីស្រម៉ៃរបស់ខ្លួន។
ក្រុមជម្រើសជាតិបាល់ទះកម្ពុជា ពេលឈ្នះមេដាយសំរឹទ្ធ ជាប្រវត្តិសាស្រ្ត នៅព្រឹត្តិការណ៍ស៊ីហ្គេម ក្នុងប្រទេសវៀរតណាម កន្លងមកនេះ។ រូបថត សហការី
កីឡាករ វឿន វាសនា បាននិយាយថា៖ «សម្រាប់ការចេញទៅលេងឱ្យក្លិប Long An នេះ ខ្ញុំនឹងពង្រឹងសមត្ថភាពខ្លួនឯងបន្ថែមទៀត និងព្យាយាមបង្ហាញសមត្ថភាព ឱ្យមានភាពលេចធ្លោជាងនេះ។ខ្ញុំគិតថាកាលប្រកួតស៊ីហ្គេមកន្លងមកនេះ សមត្ថភាពរបស់ខ្ញុំមានភាពលេចធ្លោបន្តិចបន្តួច ប៉ុន្តែសម្រាប់ការចេញទៅលេងនៅវៀតណាមរយៈពេល២សប្តាហ៍នេះ ខ្ញុំនឹងព្យាយាមឱ្យមានភាពលេចធ្លោ ដើម្បីខ្ញុំអាចមានឱកាសបានចេញទៅលេង នៅកន្លែងផ្សេងៗទៀត»។
ជាក្មេងប្រុសម្នាក់ ដែលធំដឹងក្តី នៅស្រុកមោងឫស្សី ខេត្តបាត់ដំបង វឿន វាសនា បានប្រើភាពអំណោយផលផ្នែកកាយសម្បទាពីធម្មជាតិដើម្បីកែប្រែខ្សែជីវិតពីក្មេងលេងបាល់ទះ ដាក់លុយតាមភូមិ រហូតត្រូវបានជ្រើសរើសជាកីឡាករម្នាក់លេងតំណាងឱ្យវិទ្យាល័យនិងបន្តលេងតំណាងឱ្យខេត្ត ហើយរូបគេក៏ធ្លាប់ជាសមាជិកម្នាក់របស់ក្លិបបាល់ទះស្នងការដ្ឋាននគរខេត្តបាត់ដំបងផងដែរមុនពេលចូលរួមជាមួយក្លិបវិសាខា នៅភ្នំពេញ ក្នុងឆ្នាំ២០១៧ រួចបន្តបានជាប់ជាកីឡាករជម្រើសជាតិកម្ពុជា។
យ៉ាងណាក៏ដោយគិតមកដល់ពេលនេះ វឿន វាសនា នៅមិនទាន់បានសម្រេចក្តីស្រមៃ សម្រាប់ការចេញទៅលេងនៅប្រទេសដែលមានភាពលេចធ្លោខ្លាំងប្រចាំនៅអាស៊ាននិងអាស៊ី នៅឡើយទេ។
រំឭកដល់រឿងនេះ វាសនា បានបញ្ជាក់ថា៖ «តាំងពីខ្ញុំចេះលេងបាល់មកគឺខ្ញុំមានក្តីស្រមៃចង់ទៅលេងបំផុតនៅប្រទេសឥណ្ឌូនេស៊ី និងជប៉ុន។ នៅឥណ្ឌូនេស៊ី លីគកំពូលរបស់់គេក៏មានកីឡាករបរទេសមកចូលរួមបានដែរហើយបើជប៉ុនវិញគឺកីឡាករអឺរ៉ុបភាគច្រើន នៅទីនោះទាំងអស់ ហើយការប្រកួតប្រជែងរបស់គេខ្លាំងតែម្តង ហេតុនេះក្តីស្រមៃរបស់ខ្ញុំ ចង់ទៅលេងនៅជប៉ុនខ្លាំង»។
ប៉ុន្តែទោះបីជាយ៉ាងណា ការងារនៅចំពោះមុខរបស់ វឿន វាសនា នៅពេលនេះ គឺត្រូវពង្រឹងសមត្ថភាពជួយក្រុមជម្រើសជាតិកម្ពុជាដើម្បីត្រៀមប្រជែងយកឱ្យបានមេដាយជាបន្តទៀតសម្រាប់ស៊ីហ្គេមនៅកម្ពុជាខាងមុខនេះ។
ចំពោះកាតព្វកិច្ចនេះ វឿន វាសនា បានបញ្ជាក់ថា៖ «សម្រាប់ការទៅវៀតណាម លើកនេះ ខ្ញុំមិនទៅត្រឹមតែលេងឱ្យក្លិបរបស់គេនោះទេ ប៉ុន្តែខ្ញុំទៅដកស្រង់បទពិសោធផង ទៅប្រកួតផង ហើយនឹងទៅស្រង់បច្ចេកទេសពីខាងវៀតណាមដើម្បីយកមកអភិវឌ្ឍក្រុមរបស់យើងវិញ អភិវឌ្ឍមិត្តរួមក្រុម ដើម្បីឆ្ពោះទៅស៊ីហ្គេមឆ្នាំ ២០២៣»៕
