ភ្នំពេញៈ លោក យី វាសនា អគ្គលេខាធិការនៃគណៈកម្មាធិការជាតិប៉ារ៉ាឡាំពិកកម្ពុជា បានចាត់ទុតវត្តមាន របស់លោក ហ៊ុន ម៉ានី ក្នុងនាមជាប្រតិភូតំណាងឱ្យកម្ពុជា នាព្រឹត្តិការណ៍កីឡាអាស៊ានប៉ារ៉ាហ្គេម លើកទី១១ ឆ្នាំ ២០២២ ក្នុងប្រទេសឥណ្ឌូនេស៊ី គឺជាឧត្តមភាព ការផ្តល់តម្លៃ និងជាការលើកកម្ពស់សិទ្ធិរបស់ជនពិការ ទាំងនៅក្នុងប្រទេសកម្ពុជា និងនៅលើពិភពលោក។
លោក វាសនា បានបញ្ជាក់បែបនេះ ក្រោយពីលោកនាយករដ្ឋមន្ត្រី ហ៊ុន សែន ដែលជាប្រធានគណៈកម្មាធិការជាតិប៉ារ៉ាឡាំពិកកម្ពុជា បានចាត់តាំងលោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា ជាប្រតិភូតំណាងឱ្យកម្ពុជា ក្នុងអំឡុងការប្រកួតព្រឹត្តិការណ៍កីឡាប៉ារ៉ាហ្គេម នាទីក្រុងសូឡូ ចាប់ពីថ្ងៃទី ៣០ ខែ កក្កដា ដល់ទី ៦ ខែ សីហា ឆ្នាំ ២០២២។
លោក យី វាសនា បានប្រាប់ ភ្នំពេញ ប៉ុស្តិ៍ កាលពីថ្ងៃទី ២២ ខែមិថុនាថា៖ «ការចូលរួមរបស់ថ្នាក់ដឹកនាំ មិនត្រឹមតែឱ្យតម្លៃដល់ជនពិការនៅកម្ពុជាឡើយ ប៉ុន្តែវាបង្ហាញពីឆន្ទៈក្នុងគ្រួសារអាស៊ានទាំងមូលថា គ្រប់ថ្នាក់ដឹកនាំទាំងអស់នៅអាស៊ានត្រូវយកចិត្តទុកដាក់ និងលើកតម្កើងនូវសិទ្ធិរបស់បងប្អូនយើង ទោះបីគាត់មានពិការភាពរួចហើយក៏ដោយ»។
លោកបន្តថា៖ «នេះគឺជាភាពស្មើមុខស្មើមាត់ និងជាការបង្ហាញថា យើងកំពុងតែរស់នៅក្នុងគ្រួសារតែមួយ ទោះបីអ្នកពិការ ឬមិនពិការក៏ដោយ។ វាជាការយកចិត្តទុកដាក់របស់រដ្ឋាភិបាលកម្ពុជា និងជាការឱ្យតម្លៃស្មើៗគ្នា ក្នុងសង្គមជាតិរបស់យើង និងក្នុងគ្រួសារអាស៊ាន ក៏ដូចជានៅលើពិភពលោក។ ការចូលរួមនេះ ក៏ជាការបង្ហាញពីការយកចិត្តទុកដាក់របស់រដ្ឋាភិបាល លើជនពិការផងដែរ ព្រោះយើងគឺជាចំណែកមួយនៃកោសិកាសង្គម»។
ជាមួយគ្នានេះ លោក វាសនា រំពឹងទុកថា វត្តមានរបស់លោក ហ៊ុន ម៉ានី នឹងក្លាយជាការលើកទឹកចិត្តមួយដល់អត្តពលិកពិការកម្ពុជា មួយកម្រិតទៀត ក្នុងការប្រជែងដណ្តើមមេដាយ សម្រាប់ព្រឹត្តិការណ៍កីឡាអាស៊ានប៉ារ៉ាហ្គេមនាពេលខាងមុខ ដែលត្រូវបានពន្យារពេល និងប្តូរសិទ្ធិម្ចាស់ផ្ទះដោយសារតែវិបត្តិកូវីដ ១៩។
គណៈកម្មាធិការជាតិប៉ារ៉ាឡាំពិកកម្ពុជា នឹងបញ្ជូនប្រភេទកីឡាចំនួន ១១ ដើម្បីចូលរួមប្រកួតក្នុងព្រឹត្តិការណ៍កីឡាអាស៊ានប៉ារ៉ាហ្គេម លើកទី១១ ដែលត្រូវបានប្រទេសឥណ្ឌូនេស៊ី ស្នើសុំធ្វើជាម្ចាស់ផ្ទះជំនួស ក្រោយពីម្ចាស់ផ្ទះស៊ីហ្គេមលើកទី៣១ វៀតណាម បានសម្រេចបោះបង់សិទ្ធិ ដោយសារតែវិបត្តិកូវីដ ១៩ ក្នុងប្រទេសរបស់ខ្លួន។
កីឡាទាំង ១១ ប្រភេទនោះ រួមមាន អត្តពលកម្មហែលទឹក បាល់ទះអង្គុយបុរស និងនារី បាល់បោះរទេះបុរស និងនារី បាល់បោះជនពិការភ្នែក បាល់ទាត់ ៧ ម្ខាង (ចលករខួរក្បាល) វាយកូនឃ្លីលើតុ វាយសី លើកទម្ងន់ អុក និងបូស្យា។
ជាមួយគ្នានេះ លោក វាសនា បានបញ្ជាក់ថា គណៈកម្មាធិការជាតិប៉ារ៉ាឡាំពិកកម្ពុជា បានកំណត់គោលដៅលើការដណ្តើមឱ្យបានមេដាយមាសចំនួន ៤ ពីព្រឹត្តិការណ៍កីឡារយៈពេល ២ ឆ្នាំម្តងមួយនេះ ដែលត្រូវបានរៀបចំឡើងបន្ទាប់ពីព្រឹត្តិការណ៍កីឡាស៊ីហ្គេម។
អគ្គលេខាធិការរូបនេះ បានឲ្យដឹងថា៖ «យើងរំពឹងទុកថា កីឡាហែលទឹក អត្តពលកម្ម និងបាល់ទះអង្គុយបុរស នឹងដណ្តើមបានមេដាយមាស។ បន្ទាប់ពីការប្រកួតនេះ យើងនឹងធ្វើការវាយតម្លៃទៅលើសមត្ថភាពអត្តពលិករបស់យើង ក៏ដូចជាស្វែងរកចំណុចខ្វះខាត ដែលត្រូវពង្រឹងបន្ថែម ក្នុងដំណើរឆ្ពោះទៅកាន់ព្រឹត្តិការណ៍កីឡាអាស៊ានប៉ារ៉ាហ្គេម លើកទី១២ ដែលកម្ពុជា ធ្វើជាម្ចាស់ផ្ទះក្នុងឆ្នាំ ២០២៣»។
លោក វាសនា បានប្រាប់បន្តថា អត្តពលិក និងប្រតិភូកីឡាចំនួន ១៥០ នាក់ ដែលត្រូវចេញដំណើរទៅកាន់ប្រទេសឥណ្ឌូនេស៊ី នៅថ្ងៃទី ២៤ ខែមិថុនា ទទួលបានការឧបត្ថម្ភទាំងស្រុងពីលោកនាយករដ្ឋមន្រ្តី និងជាប្រធានគណៈកម្មាធិការជាតិប៉ារ៉ាឡាំពិកកម្ពុជា។
ក្រោយពីព្រឹត្តិការណ៍កីឡាអាស៊ីប៉ារ៉ាហ្គេម ឆ្នាំ ២០២២ នៅទីក្រុង Hangzhou ប្រទេសចិន ដែលគ្រោងធ្វើនៅដើមខែកញ្ញា ត្រូវបានពន្យារពេល ដូច្នេះការប្រកួតកីឡាអាស៊ានប៉ារ៉ាហ្គេម លើកទី១១ នៅទីក្រុងសូឡូ ប្រទេសឥណ្ឌូនេស៊ី នឹងក្លាយជាវេទិកាតែ ១ គត់ សម្រាប់អត្តពលិកដែលមានពិការភាព ដើម្បីបញ្ចេញសមត្ថភាព និងសិទ្ធផលរបស់ខ្លួន ក្នុងការដណ្តើមមេដាយ និងកិត្តិយសជូនជាតិ។
ក្នុងរយៈពេល ៤ ឆ្នាំចុងក្រោយនេះ អត្តពលិកដែលមានពិការភាព ក្នុងតំបន់អាស៊ាន បានបាត់បង់ឱកាសចូលរួមប្រកួតកីឡាថ្នាក់តំបន់ចំនួន៣គឺ អាស៊ានប៉ារ៉ាហ្គេម នៅទីក្រុងម៉ានីល ប្រទេសហ្វីលីពីន ក្នុងឆ្នាំ ២០១៩ ក្នុងឆ្នាំ ២០២២ នាទីក្រុងហាណូយ ប្រទេសវៀតណាម និងកីឡាអាស៊ីប៉ារ៉ាហ្គេម លើកទី៤ នៅទីក្រុង Hangzhou ប្រទេសចិន។
ក្នុងព្រឹត្តិការណ៍អាស៊ានប៉ារ៉ាហ្គេម លើកទី៩ នៅប្រទេសម៉ាឡេស៊ី កម្ពុជាដណ្តើមបានមេដាយសរុប ១០ គ្រឿង គឺប្រាក់ ៥ និងសំរឹទ្ធ ៥។
ព្រឹត្តិការណ៍កីឡាអាស៊ានប៉ារ៉ាហ្គេម លើកទី១១ មានកីឡាចំនួន ១៤ ប្រភេទ និងមានអត្តពលិក ប្រតិភូ គ្រូបង្វឹក មកពីបណ្តាប្រទេសក្នុងតំបន់ជាង ២ ០០០ នាក់ចូលរួម៕