ភ្នំពេញៈ អគ្គលេខាធិការគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ ២០២៣ (CAMSOC) លោក វ៉ាត់ ចំរើន បានបកស្រាយយ៉ាងស៊ីជម្រៅ ទៅលើអត្ថន័យ និងអត្ថប្រយោជន៍ ដែលសង្គមជាតិមួយទទួលបានតាមរយៈកីឡា ដោយលោកថា កីឡាបានដើរតួនាទីជាការទូតយ៉ាងសំខាន់បំផុត និងមានគន្លឹះពិសេស ដែលពេលខ្លះ មិនអាចប្រើនយោបាយ មកជំនួស ឬធ្វើឱ្យបានជោគជ័យក្នុងការផ្លាស់ប្តូរនូវផ្នត់គំនិតរបស់មនុស្សនៅលើពិភពលោក ក្រៅពីការប្រើប្រាស់កីឡាបាននោះទេ។
លោក វ៉ាត់ ចំរើន បានបញ្ជាក់ពីសារៈសំខាន់ ក្នុងការប្រើប្រាស់កីឡាជាការទូត ហើយនេះជាមូលហេតុដែលប្រទេសធំៗនៅលើពិភពលោក ហ៊ានចំណាយលុយរាប់កោដលានដុល្លារ ដើម្បីដណ្តើមគ្នាធ្វើជាម្ចាស់ផ្ទះ ក្នុងព្រឹត្តិការណ៍កីឡាធំៗ ដែលមានប្រទេសស្ទើរតែទាំងអស់ នៅលើពិភពលោក ជាសមាជិក។
លោក វ៉ាត់ ចំរើន បានលើកជាសំណួរ ថា៖ «ហេតុអ្វី បានជារដ្ឋសមាជិកមួយ ឬក៏អូឡាំពិក ជាសមាជិកមួយៗ ត្រូវចំណាយលុយរាប់កោដលានដុល្លារមកដណ្តើមគ្នាធ្វើជាម្ចាស់ផ្ទះព្រឹត្តិការណ៍កីឡា? ហេតុអ្វីបានជា ចិន ហ៊ានចំណាយលុយជាង២កោដលានដុល្លារ ធ្វើជាម្ចាស់ផ្ទះអូឡាំពិកហ្គេម នៅឆ្នាំ ២០០៨? ចុះម៉េចបានជាមិនយកលុយហ្នឹងមកអភិវឌ្ឍ បែរជាយកលុយទាំងនោះ ទៅធ្វើអូឡាំពិកហ្គេម ទៅវិញ?»។
លោកបញ្ជាក់ថា៖ «អ៊ីចឹងបានន័យថា នៅក្នុងកីឡា វាមានគន្លឹះអ្វីមួយ ដែលពិសេស ដែលនយោបាយ មិនអាចធ្វើបាន! មានគន្លឹះអ្វីមួយដែលផ្លាស់ប្តូរឥរិយាបថ ឬក៏មាននយោបាយអ្វីមួយ ដែលគ្មានឱកាសធ្វើ ក្រៅពីធ្វើហ្គេមហ្នឹង ដើម្បីបង្ហាញទៅកាន់ពិភពលោកទេ»។
លោកអះអាងថា ចិនចំណាយលុយជាង ២ កោដលានដុល្លារ ធ្វើអូឡាំពិកហ្គេម នៅឆ្នាំ ២០០៨ គឺចិនចង់ហៅប្រទេសនៅលើពិភពលោក មកស្រុកចិន ហើយប្រើឱកាសនោះ ប្រាប់ទៅកាន់ពិភពលោកថា «ខ្ញុំ(ចិន)ក្លាយជាមហាអំណាចឥឡូវហើយ»។
អ្នកជំនាញកីឡាលោក វ៉ាត់ ចំរើន បានលើកឡើងថា៖ «ចុះបើពាក្យហ្នឹង ចិនប្រើជានយោបាយ តើគេស្តាប់អត់? គឺគេមិនស្តាប់ទេ ប៉ុន្តែពេលធ្វើអូឡាំពិក ចិនផ្សាយតែ ១ ម៉ាត់ ពិភពលោកទាំងអស់ស្តាប់ ហើយបានដឹងឭគ្រប់ៗគ្នា។ អ៊ីចឹងយើងធ្វើស៊ីហ្គេមនេះ ក៏យើងចង់មាននយោបាយមួយ កែប្រែមុខមាត់កម្ពុជានៅលើឆាកអន្តរជាតិដែរ ព្រោះកម្ពុជា នៅមានរូបភាពសេសសល់មិនល្អខ្លះទៀត នៅក្រៅប្រទេស»។
លោកបញ្ជាក់ថា៖ «ពិភពលោកនេះធំ ហើយប្រទេសមួយចំនួនមិនទាន់ស្គាល់កម្ពុជាផង ហើយជនជាតិមួយចំនួននៅមានផ្នត់គំនិតថា កម្ពុជា នៅតែជាប្រទេសដែលខ្ទេចខ្ទាំ ដោយសង្រ្គាម និងនៅតែជាប្រទេស មានមីនច្រើន និងក្រីក្រ គឺគេមិនទាន់បានដឹង ពីស្ថានភាពពិតប្រាកដរបស់កម្ពុជា នៅពេលឥឡូវទេ។ អ៊ីចឹងទាំងអស់ហ្នឹងហើយ ដែលយើងខិតខំធ្វើ ខិតខំបង្ហាញ និងរៀបចំធ្វើម្ចាស់ផ្ទះស៊ីហ្គេម ដើម្បីងាយស្រួលបញ្ជ្រៀតព័ត៌មានទាំងអស់នេះ ទៅកាន់ពិភពលោក និងងាយស្រួលលក់កម្ពុជា ទៅពិភពលោក»។
ការបរិយាយពីគុណប្រយោជន៍របស់វិស័យកីឡានេះ ត្រូវបានលោក វ៉ាត់ ចំរើន ធ្វើឡើង នៅក្នុងវេទិកាជួបជាមួយប្រព័ន្ធផ្សព្វផ្សាយ ស្តីពីដំណើរឆ្ពោះទៅស៊ីហ្គេម-អាស៊ានប៉ារ៉ាហ្គេម ឆ្នាំ ២០២៣ នៅពហុកីឡដ្ឋានជាតិមរតកតេជោ កាលពីថ្ងៃទី ២៣ ខែ មិថុនា ឆ្នាំ ២០២២។
ជាមួយគ្នានោះលោក ខៀវ កាញារីទ្ធ រដ្ឋមន្រ្តីក្រសួងព័ត៌មាន បានគាំទ្រការលើកឡើងរបស់លោក វ៉ាត់ ចំរើន ដោយថ្លែងថា៖ «ដូចឯកឧត្តម វ៉ាត់ ចំរើន បានលើកឡើង គឺនយោបាយត្រឹមប៉ុនណាក៏ដោយ ចាញ់កីឡាមួយភ្លេតទេ! កីឡា បានធ្វើឱ្យគេស្គាល់យើងច្រើនជាងអ្វីទៅទៀត។ កាលពីដើមគេស្គាល់កម្ពុជា តាមរយៈអង្គរវត្ត និង ប៉ុលពត ប៉ុន្តែឥឡូវ ស៊ីហ្គេមនេះ យើងអាចផ្លាស់ប្តូរបានច្រើន។ ដូច្នេះសូមប្រព័ន្ធផ្សព្វផ្សាយទាំងអស់ចូលរួមជួយ ដើម្បីធ្វើឱ្យកីឡា និងប្រទេសជាតិរបស់យើង កាន់តែរីកចម្រើន»។
ចំណែកលោក ថោង ខុន រដ្ឋមន្រ្តីក្រសួងទេសចរណ៍ និងជាអនុប្រធានអចិន្រ្តៃយ៍ CAMSOC ក៏បានលើកឡើងពីអត្តប្រយោជន៍ នៃការប្រើប្រាស់ការធ្វើម្ចាស់ផ្ទះស៊ីហ្គេមនេះ ដើម្បីបង្ហាញពីសក្តានុពលរបស់កម្ពុជា ទៅកាន់ពិភពលោក និងធ្វើឱ្យវិស័យទេសចរណ៍ និងវិស័យផ្សេងទៀត នៅកម្ពុជា មានសម្ទុះឡើងវិញផងដែរ បន្ទាប់ពីវិបត្តិជំងឺកូវីដ១៩ បានធូរស្រាល។
លោក ថោង ខុន បញ្ជាក់ថា៖ «យើងចង់ធ្វើឱ្យព្រឹត្តិការណ៍ស៊ីហ្គេមនេះ ក្លាយជាឱកាសមួយ ក្នុងការរៀបចំឱ្យកម្ពុជាយើងកាន់តែស្អាត និងកាន់តែមានបដិសណ្ឋារកិច្ចល្អ ព្រោះមិនមែនមានតែមនុស្ស ៦០០ លាននាក់នៅក្នុងអាស៊ាន មើលឃើញព្រឹត្តិការណ៍នេះទេ ប៉ុន្តែមនុស្សរាប់លាននាក់ទៀតនៅលើសកលលោក ក៏អាចមើល និងស្គាល់កម្ពុជាបានច្បាស់ តាមរយៈព្រឹត្តិការណ៍កីឡានេះដែរ»។
លោកថោង ខុន រំពឹងថា៖«នៅក្រោយស៊ីហ្គេមនេះ យើងនឹងមានរបត់ថ្មីមួយ ព្រោះគេនឹងស្គាល់យើងកាន់តែច្រើន ហើយកម្ពុជាយើង កាន់តែមានប្រជាប្រិយភាព ប្រជាពលរដ្ឋយើង ក៏ត្រូវបានគេទទួលស្គាល់ថា ជាប្រជាជន ដែលមានស្នាមញញឹមរួសរាយរាក់ទាក់»៕