ភ្នំពេញៈ ប្រទេសកម្ពុជា តាមរយៈក្រសួងអប់រំ យុវជន និងកីឡា, គណៈកម្មាធិការជាតិអូឡាំពិកកម្ពុជា (NOCC) សហព័ន្ធកីឡាប្រដាល់គុនខ្មែររួមទាំងស្ថាប័នឯកជន ដែលជាម្ចាស់ឧបត្ថម្ភ និងដៃគូសហការបានដាក់ក្តីរំពឹងរួមគ្នាថា មរតកក្បាច់គុនរបស់ដូនតា «គុនខ្មែរ» នឹងអាចពង្រីកវិសាលភាព និងភាពល្បីល្បាញរបស់ខ្លួនកាន់តែខ្លាំងទៅកាន់ពិភពលោក តាមរយៈសង្វៀនគុនខ្មែរជើងឯកពិភពលោក ឬ World Fight Tournaments 2022 ហៅកាត់ថា WF ដែលនឹងបើកការប្រកួតជាលើកដំបូងនៅពហុកីឡដ្ឋានជាតិមរតកតេជោនាថ្ងៃទី ៦ ខែកក្កដា ខាងមុខនេះ។
បើទោះបីជា សង្វៀនគុនខ្មែរជើងឯកពិភពលោកទើបតែត្រូវបានបង្កើតឡើងជាលើកដំបូង ប៉ុន្តែការសម្រិតសម្រាំងយកកីឡាករអន្តរជាតិល្បីៗមកប្រកួតនៅលើទឹកដីកម្ពុជា ជាពិសេសការកំណត់គោលបំណងយ៉ាងច្បាស់លាស់របស់ World Fight បានក្លាយជាចំណុចពិសេសក្នុងការជួយលើកកម្ពស់ប្រដាល់គុនខ្មែរ ហើយព្រឹត្តិការណ៍នេះក៏បានរួមចំណែកយ៉ាងសំខាន់ ក្នុងការពង្រឹងធនធានមនុស្ស សម្រាប់កម្ពុជាក្នុងការឆ្ពោះទៅធ្វើជាម្ចាស់ផ្ទះស៊ីហ្គេមជាលើកដំបូង នៅឆ្នាំ ២០២៣ ផងដែរ។
លោក វ៉ាត់ ចំរើន អគ្គលេខាធិការ NOCC បានថ្លែងថា៖ «ពហុកីឡដ្ឋានជាតិមរតកតេជោ ដែលគ្រប់គ្រងដោយ NOCC ស្វាគមន៍ សង្វៀនគុនខ្មែរជើងឯកពិភពលោក ដើម្បីបង្ហាញពីមោទនភាពជាតិយើង ដែលមានពហុកីឡដ្ឋានដ៏ល្អផង និងបង្ហាញពីព្រឹត្តិការណ៍ ដែលនឹងជួយបំផុសឱ្យគុនខ្មែររបស់យើងក្លាយទៅជាក្បាច់គុនមួយមានប្រជាប្រិយភាពនៅលើឆាកអន្តរជាតិផង ហើយព្រឹត្តិការណ៍នេះនឹងក្លាយជាឱកាសមួយសម្រាប់កម្ពុជាក្នុងការជំរុញការគាំទ្រឱ្យទៅដល់ស៊ីហ្គេម ឆ្នាំ ២០២៣។ អ៊ីចឹងអ្វីៗទាំងអស់ គឺដើម្បីឆ្ពោះទៅឆ្នាំ ២០២៣ ដែលកម្ពុជាធ្វើជាម្ចាស់ផ្ទះ បន្ទាប់ពីយើងបានរង់ចាំអស់រយៈពេល ៦៤ ឆ្នាំ»។
លោក TONY ANH ម្ចាស់កម្មសិទ្ធិ និងជាអ្នកបង្កើតព្រឹត្តិការណ៍ World Fight បានអះអាងថា ព្រឹត្តិការណ៍នេះនឹងធ្វើឱ្យអ្វីៗគ្រប់យ៉ាង រួមទាំងសេដ្ឋកិច្ចនៅក្នុងប្រទេសកម្ពុជាផងដែរ មានភាពប្រសើរឡើង ព្រោះ WF ប្រចាំឆ្នាំ ២០២២ នេះ នឹងមានរៀបចំការប្រកួតចំនួន ១១ លើក ដោយចាប់ផ្តើមពីខែកក្កដារហូតដល់ខែធ្នូ ចុងឆ្នាំនេះ។
លោកបានបញ្ជាក់ថា៖ «ការរៀបចំឱ្យមានការប្រកួត World Fight នៅប្រទេសកម្ពុជានេះ យើងមានគោលបំណងលើកស្ទួយវិស័យកីឡាគុនខ្មែរ និងទេសចរណ៍នៅកម្ពុជា អ៊ីចឹងនេះជាព្រឹត្តិការណ៍ប្រចាំឆ្នាំដ៏សំខាន់បំផុត ដែលនឹងធ្វើឱ្យគ្រប់បែបយ៉ាងនៅកម្ពុជា ឬក៏ចរន្តសេដ្ឋកិច្ចទាំងអស់អាចចូលរួមចងក្រងឱ្យក្លាយជាប្រធានបទណាមួយ សម្រាប់ជាមោទនភាពជាតិ ប៉ុន្តែអ្វីៗទាំងអស់អាចកើតឡើងបាន លុះត្រាតែយើងមានការសាមគ្គី និងសហការជួយគ្នា ហេតុនេះខ្ញុំពិតជារីករាយ និងអរគុណដល់ដៃគូសហការទាំងអស់ ដែលបានរួមគ្នាបង្កើតឱ្យមានព្រឹត្តិការណ៍ដ៏ល្អនេះឡើងនៅកម្ពុជា»។
លោក ម៉ិល កាដូ តំណាងឱ្យក្រសួងអប់រំ យុវជន និងកីឡាបានគាំទ្រនូវការលើកឡើងរបស់លោក TONY ANH ដោយបាននិយាយថា៖ «ការប្រកួតនៅសង្វៀនគុនខ្មែរជើងឯកពិភពលោកនេះ មិនមែនមានតែគោលបំណង ១ នោះទេគឺមានគោលបំណងធំ ២ ទី ១ ចូលរួមលើកកម្ពស់ប្រដាល់គុនខ្មែរក្នុងលក្ខណៈបច្ចេកទេសប្រដាល់គុនខ្មែរឆ្ពោះទៅស៊ីហ្គេម ឆ្នាំ ២០២៣ និងទី ២ គឺការចូលរួមចំណែកក្នុងការលើកកម្ពស់បរិស្ថាន ហើយនេះជាចំណុចល្អមួយទៀត ដែលលោក TONY ANH បានបង្ហាញ និងខិតខំរៀបចំឱ្យមានឡើង ហេតុនេះខ្ញុំក្នុងនាមឱ្យក្រសួងអប់រំ សូមគាំទ្រយ៉ាងក្លៀវក្លាបំផុត ចំពោះកិច្ចសហការរបស់គ្រប់ភាគីពាក់ព័ន្ធ ដែលបង្កើតឱ្យមានព្រឹត្តិការណ៍នេះឡើង»។
លោក មាន សំអុល អ្នកគ្រប់គ្រងទូទៅក្រុមហ៊ុនភេសជ្ជៈគោជល់ក៏បានបង្ហាញភាពរីករាយក្នុងការចូលរួមឧបត្ថម្ភដល់ World Fight ផងដែរ។ លោកថា៖ «គោជល់ រីករាយក្រៃលែង ដែលបានក្លាយជាផ្នែកមួយនៃការប្រកួតនេះ ដែលយើងមានទិសដៅស្របគ្នាពោល គឺចង់ផ្សព្វផ្សាយគុនខ្មែរ និងលើកទឹកចិត្តប្រដាល់កីឡាគុនខ្មែរឱ្យត្រៀមខ្លួនបានល្អ សម្រាប់ព្រឹត្តិការណ៍ស៊ីហ្គេម ឆ្នាំ ២០២៣។ យើងរីករាយនឹងរួមចំណែកផ្សព្វផ្សាយគុនខ្មែរទៅកាន់អ្នកគាំទ្រ និងពិភពលោក ដោយកម្មវិធីនេះនឹងក្លាយជាមោទនភាពថ្មីមួយទៀត សម្រាប់ប្រជាជនកម្ពុជា ក្នុងការស្វាគមន៍ជើងឯកលំដាប់ពិភពលោក និងអ្នកគាំទ្រនៅទូទាំងពិភពលោក»៕