ភ្នំពេញៈ អ្នកជំនាញផ្នែកគណនេយ្យមកពីសហរដ្ឋអាមេរិក លោក Casey Barnett បានឱ្យតម្លៃសំខាន់លើបទពិសោធដែលបានពីការលេងកីឡា ដោយលោកអះអាងថា រាល់ឧបសគ្គ សម្ពាធ ភាពឈឺចាប់និងភាពអំណត់អត់ធន់ ដែលកើតមាននៅក្នុងការប្រកួតកីឡាជាមេរៀនជោគជ័យយ៉ាងសំខាន់សម្រាប់ក្រុមនិស្សិតនៅពេលពួកគេចេញធ្វើការឬបើកអាជីវកម្មអ្វីមួយ បន្ទាប់ពីបញ្ចប់ការសិក្សា។
ជាសាស្រ្តាចារ្យម្នាក់ដែលទទួលបានជោគជ័យខ្លាំងទៅលើការបណ្តុះបណ្តាលនិស្សិតនៅវិទ្យាស្ថានខេមអេដ លោក Casey បានអះអាងថា និស្សិតដែលលេងកីឡាភាគច្រើនជាអ្នករៀនពូកែ ហើយមានស្មារតីរឹងមាំនិងមានការតស៊ូខ្ពស់ក្នុងការជម្នះឧបសគ្គនៅចំពោះមុខក្នុងការឆ្ពោះទៅរកការទទួលបានភាពជោគជ័យ។
នាយកវិទ្យាស្ថានខេមអេដលោក Casey បានប្រាប់ ភ្នំពេញ ប៉ុស្តិ៍ថា៖ «ខេមអេដជាវិទ្យាស្ថានបង្រៀនពីការរកស៊ី ពាណិជ្ជកម្ម គណនេយ្យហរិញ្ញវត្ថុ ហើយយើងឃើញការប្រកួតកីឡា ផ្តល់អត្ថប្រយោជន៍ច្រើនដល់ក្រុមនិស្សិតរបស់យើងឱ្យចេះធ្វើការងារជាក្រុម ចេះរៀន ខិតខំធ្វើការដើម្បីជោគជ័យ ចេះធ្វើការងារក្រោមសម្ពាធនិងបង្រៀនពួកគេឱ្យចេះទទួលស្គាល់ការពិតនៅពេលចាញ់ឬឈ្នះ ព្រោះនេះជាមេរៀនសំខាន់សម្រាប់យើងទាំងអស់គ្នា»។
យ៉ាងណាក៏ដោយ លោក Casey បានទទួលស្គាល់ថា ដើម្បីឱ្យនិស្សិតទទួលបានអត្ថប្រយោជន៍ពីការលេងកីឡា លុះត្រាតែយើងចេះរៀបចំកម្មវិធីលេងកីឡា និងកម្មវិធីសិក្សាឱ្យបានច្បាស់លាស់ ហើយអ្នកលេងក៏ត្រូវចេះលៃលកពេលសម្រាប់លេងកីឡាផងដែរ ដើម្បីកុំឱ្យប៉ះពាល់ដល់ការសិក្សាព្រោះការសិក្សាជាអាទិភាពទី១ ហើយការលេងកីឡាជាអាទិភាពបន្ទាប់។
សាស្រ្តាចារ្យរូបនេះបានបន្ថែមថា៖«ខ្ញុំទទួលស្គាល់ពីអត្ថប្រយោជន៍ដែលទទួលបានពីការលេងកីឡា ដោយវាបង្កើនឱ្យមានភាពជោគជ័យ នៅពេលយើងចូលធ្វើការ រកស៊ីឬធ្វើអ្វីមួយ ព្រោះបទពិសោធបានពីការលេងកីឡាវាជាមេរៀនជួយឱ្យយើងមានការប្រកួតប្រជែងដើម្បីឈ្នះ ជួយឱ្យយើងចេះខិតខំដើម្បីមានជោគជ័យ ក្នុងការកំណត់គោលដៅ...»។
ទោះបីជាយ៉ាងណា លោក Casey តែងតែយកចិត្តទុកដាក់ក្នុងការបង្កើតព្រឹត្តិការណ៍កីឡាឱ្យនិស្សិតរៀននៅវិទ្យាស្ថានខេមអេដបានលេងខណៈវិទ្យាស្ថាននេះបានក្លាយជាគំរូលេចធ្លោមួយក្នុងការប្រកួតកីឡាឧត្តមសិក្សានិងមធ្យមសិក្សាបច្ចេកទេសប្រចាំឆ្នាំដែលរៀបចំដោយក្រសួងអប់រំ យុវជននិងកីឡា។
បើតាមលោក Casey ការប្រកួតឆ្នាំ២០២២ដែលទើបបានបញ្ចប់កាលពីថ្ងៃទី២៩ ខែមិថុនា កន្លងមកនេះ ក្រុមអត្តពលិករបស់ខេមអេដទទួលបានលេខ២ ក្នុងនាមជាគ្រឹះស្ថានដែលដណ្តើមបានមេដាយមាសច្រើនជាងគេ(មាស៩ ប្រាក់៩ និងមេដាយសំរឹទ្ធ១៦)នៅក្នុងចំណោមគ្រឹះស្ថានសិក្សាទាំង៣៨ ដែលបានចូលរួមនៅក្នុងការប្រកួតកីឡាឧត្តមសិក្សានេះ។
ដោយទទួលបានសញ្ញាបត្រថ្នាក់អនុបណ្ឌិតមកពីសហរដ្ឋអាមេរិកនិងកំពុងបើកវិទ្យាស្ថាននៅប្រទេសកម្ពុជា លោក Casey ដែលមានការស្រាវជ្រាវច្រើនបានបង្ហាញថា៖«អ្នកដែលបានលេងកីឡា និងមានការហ្វឹកហាត់គេរៀនពូកែជាងអ្នកដែលមិនសូវមានសកម្មភាពកីឡាព្រោះការលេងកីឡាវាផ្តល់នូវអត្ថប្រយោជន៍ដល់ខួរក្បាល ដល់សុខភាព និងដល់អារម្មណ៍ ហើយនៅពេលអារម្មណ៍យើងល្អ សុខភាពយើងល្អនិងមានចរន្តឈាមនៅក្នុងខ្លួនធ្វើដំណើរការល្អដើម្បីផ្តល់អុកស៊ីហ្ស៊ែនដល់ខួរក្បាលក៏យើងនឹងរៀនពូកែដែរ»។
ម្យ៉ាងទៀត លោកថា ការលេងកីឡា ក៏ជួយឱ្យចៀសវាងបាននូវទម្លាប់មិនល្អផងដែរ ព្រោះជួនកាល និស្សិត ពេលទំនេរ គេចាប់ផ្តើមធ្វើអ្វីដែលជាទម្លាប់មិនល្អ ប៉ុន្តែបើគេយកពេលទំនេរនោះមកលេងកីឡាវានឹងទទួលបានអត្ថប្រយោជន៍ច្រើន ព្រោះការលេងកីឡាវានឹងជួយនិស្សិតឱ្យចេះហ្វឹកហាត់ថែរក្សាសុខភាពខ្លួនឯង ហើយពេលគេចាស់ក៏នឹងទទួលអត្ថប្រយោជន៍ពីការលេងកីឡាដែរ។
លោក Casey បានបញ្ជាក់ទៀតថា៖«យើងឃើញនិស្សិតច្រើនដែលជាអតីតកីឡាករ កីឡាការិនីរបស់យើងគឺពេលពួកគេចូលធ្វើការងារគេទទួលបានជោគជ័យនិងឡើងតួនាទីលឿន ព្រោះនិស្សិតលេងកីឡា មានការខិតខំធ្វើការងារ ចេះកំណត់គោលដៅ ចេះវាយតម្លៃខ្លួនឯង និងចេះកែចំណុចខ្សោយខ្លួនឯង ដ្បិតអីការឈ្នះ ចាញ់ នៅពេលលេងកីឡា វាបានបណ្តុះគំនិតឱ្យយើងចេះវាយតម្លៃទៅលើខ្លួនឯង »។
ជាមួយគ្នានេះកីឡាការិនីវាយសី ជឺ ជូឌី ដែលកំពុងសិក្សានៅវិទ្យាស្ថានខេមអេដបានគាំទ្រ ការលើកឡើងរបស់លោក Casey ដោយនាងបានថ្លែងថា៖ «ពិតណាស់ ការលេងកីឡា ពិតជាបានរួមចំណែកជួយដល់ការសិក្សា ព្រោះនៅពេលយើងមានសម្ពាធឬក៏ស្ត្រេសយើងអាចកាត់បន្ថយវាតាមរយៈការលេងកីឡា ហើយខ្ញុំក៏ឯកភាព ១០០ ភាគរយផងដែរថា អ្នកលេងកីឡាភាគច្រើនរៀនពូកែ ព្រោះកីឡាធ្វើឱ្យខួរក្បាលយើងស្រឡះល្អមានសុខភាពរឹងមាំ គ្មានជំងឺអ្វីមកបៀតបៀនបាន អ៊ីចឹងយើងមានពេលគ្រប់គ្រាន់ក្នុងការផ្តោតទៅលើការសិក្សា»។
ចំណែកលោក ម៉ាច សុខមាន ដែលទើបប្រឡងជាប់គ្រូអប់រំកាយនិងកីឡា ហើយកំពុងសិក្សាលើជំនាញនេះនៅវិទ្យាស្ថានជាតិអប់រំកាយនិងកីឡាក៏បានទទួលស្គាល់ដែរថាការលេងកីឡាពិតជាមានប្រយោជន៍។
លោកបានបញ្ជាក់ថា៖ «ការលេងកីឡាពិតជាមានសារៈសំខាន់ព្រោះធ្វើឱ្យយើងមានកាយសម្បទាមាំមួន សុខភាពល្អនិងចៀសឆ្ងាយពីគ្រឿងញៀន ហើយកាលដែលខ្ញុំបានក្លាយជាគ្រូអប់រំកាយនិងកីឡានេះ ក៏ដោយសារការលេងកីឡាផងដែរព្រោះប្រសិនបើយើងមិនឆ្លងកាត់ការលេងកីឡាទេយើងមិនអាចប្រឡងជាប់បានឡើយ ហេតុនេះសូមប្អូនៗជំនាន់ក្រោយចូលរួមលេងកីឡាទាំងអស់គ្នាដើម្បីលើកកម្ពស់វិស័យកីឡានៅកម្ពុជានិងដើម្បីឈានទៅសម្រេចក្តីបំណងរបស់យើងទៅថ្ងៃអនាគត»៕