ភ្នំពេញៈ ព្រឹត្តិការណ៍ប្រកួតកីឡាប្រដាល់គុនខ្មែរ ដណ្តើមខ្សែក្រវាត់ពានរង្វាន់ «សម្តេចពិជ័យសេនា ទៀ បាញ់» ត្រូវបានសហព័ន្ធកីឡាប្រដាល់គុនខ្មែរ រៀបចំបង្កើតឡើង ក្រោមការសហការជាមួយស្ថានីយទូរទស្សន៍ប៉ុស្តិ៍លេខ ៥ ហើយគាំទ្រដោយក្រសួងអប់រំ យុវជន និងកីឡា និងគណៈកម្មាធិការជាតិអូឡាំពិកកម្ពុជា ក្នុងដំណើរឆ្ពោះទៅកាន់ការប្រកួតស៊ីហ្គេម លើកទី៣២ ឆ្នាំ ២០២៣ នៅកម្ពុជា។
កីឡាករឆ្នើមៗ ក្នុងប្រភេទទម្ងន់ ៦០ គីឡូក្រាម ចំនួន៨នាក់ ត្រូវបានជ្រើសរើស មកពីតាមបណ្តាក្លិបផ្សេងៗគ្នា ដើម្បីដាក់ឱ្យប្រកួតដណ្តើមខ្សែក្រវាត់នេះ ហើយទាំងថ្នាក់ដឹកនាំ តំណាងឱ្យលោកឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ ទៀ បាញ់ និងប្រធានសហព័ន្ធកីឡាប្រដាល់កម្ពុជាបានអះអាងថា ព្រឹត្តិការណ៍ដ៏ថ្មីសន្លាងនេះ ត្រូវបានបង្កើតឡើង ដើម្បីពង្រឹងសមត្ថភាពកីឡាករ កីឡាការិនី និងមន្រ្តីបច្ចេកទេស ក្នុងការឈានទៅទទួលបានជោគជ័យ ពេលកម្ពុជា ធ្វើជាម្ចាស់ផ្ទះស៊ីហ្គេម នៅឆ្នាំ ២០២៣ ហើយក៏ដើម្បីអភិរក្ស និងអភិវឌ្ឍវិស័យគុនខ្មែរ នៅលើឆាកអន្តរជាតិ ផងដែរ។
លោក តែម ម៉ឺន បានថ្លែងថា៖ «ការរៀបចំឱ្យមានការប្រកួតនេះឡើង គឺដើម្បីរួមចំណែកផ្សព្វផ្សាយនូវសមិទ្ធផលរីកចម្រើនរបស់រាជរដ្ឋាភិបាល លើគ្រប់វិស័យ ព្រមទាំងចូលរួមលើផែនការអភិរក្ស និងអភិវឌ្ឍវិស័យសិល្បៈក្បាច់គុនបុរាណខ្មែរ ដែលជាសម្បត្តិវប្បធម៌ជាតិ ព្រមទាំងពង្រឹងសមត្ថភាពមន្រ្តីបច្ចេកទេស គ្រូបង្វឹក កីឡាកររបស់យើង ដើម្បីត្រៀមលក្ខណសម្បត្តិឱ្យបានគ្រប់គ្រាន់ ចូលរួមការប្រកួតថ្នាក់ជាតិ អន្តរជាតិ ជាពិសេសស៊ីហ្គេម លើកទី៣២ ឆ្នាំ ២០២៣ ដែលកម្ពុជាធ្វើជាម្ចាស់ផ្ទះ»។
ប្រធានសហព័ន្ធកីឡាប្រដាល់គុនខ្មែរ លោក តែម ម៉ឺន បានប្រាប់បន្ថែម នៅក្នុងសន្និសីទកាសែត កាលពីថ្ងៃទី ១៣ ខែកញ្ញាថា ព្រឹត្តិការណ៍នេះ ក៏ចូលរួមជ្រើសរើសជើងឯកកម្រិតខ្ពស់ និងលើកកម្ពស់ នូវគុណផលកីឡាករជម្រើសជាតិ និងថ្នាក់ជាតិរបស់យើង ដើម្បីឆ្ពោះទៅស៊ីហ្គេម ឆ្នាំ ២០២៣ ព្រមទាំងចូលរួមផ្សព្វផ្សាយ និងគាំទ្រដំណើរឆ្ពោះទៅកាន់ព្រឹត្តិការណ៍នេះផងដែរ។
សម្រាប់បេក្ខភាពទាំង៨នាក់ ដែលត្រូវបានជ្រើសរើសឱ្យចូលរួមការប្រកួតដណ្តើមខ្សែក្រវាត់ ពានរង្វាន់សម្តេចពិជ័យសេនា ទៀ បាញ់ ក្នុងប្រភេទទម្ងន់ ៦០ គីឡូក្រាមនេះ ត្រូវបានបែងចែកការប្រកួតជា២ពូល ដោយក្នុងនោះពូល A មានកីឡាករ ឈុត សេរីវ៉ាន់ថង, ឡុង ជិន, រិន ដេវីត និង សៀវ ង៉ុយ ខណៈពូល B មានកីឡាករ ឃីម បូរ៉ា, សូត្រ វាសនា, ទូច ដេវីត និង គង់ ហ៊ូវ។
លោក ឃឹម ប៊ុនសុង រដ្ឋលេខាធិការក្រសួងការពារជាតិ និងជាប្រធានក្រុមប្រឹក្សាកីឡាកងយោធពលខេមរភូមិន្ទ តំណាងឱ្យលោក ទៀ បាញ់ បានថ្លែងថា៖ «កីឡាករទាំង៨នាក់ ដែលត្រូវបានជ្រើសរើសឱ្យចូលរួមក្នុងការប្រកួតនេះ សុទ្ធតែជាអ្នកឆ្នើមៗ និងជាឈ្នាន់ ដែលត្រូវត្រៀមហ្វឹកហាត់ សម្រាប់ចូលរួមការប្រកួតស៊ីហ្គេម ឆ្នាំ ២០២៣ ហេតុនេះការខិតខំតរៀបចំឱ្យមានការប្រកួតពានរង្វាន់សម្តេចពិជ័យសេនា ទៀ បាញ់ នេះឡើង គឺដើម្បីពង្រឹងសមត្ថភាពកីឡាកររបស់យើង សំខាន់បំផុតលើផ្នែកប្រដាល់គុនខ្មែរ ត្រៀមទៅឆ្នាំ ២០២៣»។
ទន្ទឹមនឹងនេះ លោក ឃឹម ប៊ុនសុង បានបង្ហាញពីមោទនភាព ទៅលើក្រុមជម្រើសជាតិកីឡាប្រដាល់គុនខ្មែរ ដែលបានបង្ហាញភាពខ្លាំង និងដណ្តើមបាននូវកិត្តិយសជូនជាតិជាថ្មីម្តងទៀត តាមរយៈការឈ្នះបានមេដាយមាស ១ និងសំរឹទ្ធ ៦ ពីការប្រកួតស៊ីហ្គេម លើកទី៣១ ឆ្នាំ ២០២១ នៅប្រទេសវៀតណាម កាលពីខែឧសភា ឆ្នាំ ២០២២។
«សម្រាប់ការប្រកួតស៊ីហ្គេម នៅវៀតណាម កន្លងមកនេះ កីឡាករ កីឡការិនីគុនខ្មែររបស់យើង បានបង្ហាញសមត្ថភាពលេចធ្លោ ក្នុងការដណ្តើមបានមេដាយមាស ដែលធ្វើឱ្យកីឡារបស់យើងមានកេរ្តិ៍ឈ្មោះ កាន់តែល្បីរន្ទឺ នៅលើឆាកអន្តរជាតិ ដូច្នេះដើម្បីទទួលបាននូវគុណផលកីឡាកាន់តែខ្លាំង ហើយកេរ្តិ៍ឈ្មោះកីឡាកាន់តែប្រសើរ ពេលកម្ពុជា ធ្វើម្ចាស់ផ្ទះស៊ីហ្គេមនោះ យើងត្រូវតែពង្រឹងគុណភាពកីឡារបស់យើង ឱ្យបានកាន់តែខ្លាំងថែមទៀត»។
បន្ថែមលើនេះ លោក ឃឹម ប៊ុនសុង បានជំរុញឱ្យ គណៈកម្មការរៀបចំការប្រកួត ត្រូវយកចិត្តទុកដាក់ ដោយភាគីពាក់ព័ន្ធទាំងអស់ ត្រូវរួមគ្នាទទួលខុសត្រូវ លើជំនាញរៀងៗខ្លួន ដើម្បីធ្វើឱ្យព្រឹត្តិការណ៍ប្រកួតពានរង្វាន់នេះ ទទួលបានជោគជ័យ ចំណែកមន្រ្តីបច្ចេកទេស ជាអាជ្ញាកណ្តាល ចៅក្រម ក៏ត្រូវយកចិត្តទុកដាក់ លើភារកិច្ចរបស់ខ្លួន ធ្វើយ៉ាងណាយកឱ្យអស់នូវលទ្ធភាព ប្រកបដោយឆន្ទៈ សីលធម៌ វិជ្ជាជីវៈ ជាពិសេសក្នុងពេលកាត់សេចក្តី។
លោកបានបញ្ជាក់ថា៖ «សម្រាប់ការប្រកួតពានរង្វាន់មួយចំនួន កន្លងមក មានការប៉ះពារខ្លះ ធ្វើឱ្យអ្នកគាំទ្រ និងកីឡាករផ្ទាល់ មិនពេញចិត្ត ទៅលើការកាត់សេចក្តី អ៊ីចឹងយើងបានយកបទពិសោធទាំងនោះ ដើម្បីប្រុងប្រៀបធ្វើការងារនេះឱ្យមានយុត្តិធម៌ ដែលបញ្ហានេះវាសំខាន់ខ្លាំងណាស់ ព្រោះពេលណាមានភាពលម្អៀង វានឹងធ្វើឱ្យវិស័យកីឡារបស់យើងទាំងមូល បាត់បង់នូវគុណភាព ហេតុនេះអាជ្ញាកណ្តាល ចៅក្រម ត្រូវកាត់សេចក្តីដោយយុត្តិធម៌ និងតម្លាភាព ដើម្បីរក្សានូវតម្លៃនៃវិជ្ជាជីវៈរបស់យើង»។
ទាក់ទងទៅនឹងការពង្រឹងគុណភាពកាត់សេចក្តីរបស់ក្រុមមន្រ្តីបច្ចេកទេសរបស់សហព័ន្ធកីឡាប្រដាល់គុនខ្មែនេះ លោក តែម ម៉ឺន បានបញ្ជាក់ថា៖ «ក្នុងនាមសហព័ន្ធ និងគណៈកម្មការរៀបចំការប្រកួត ខ្ញុំបាទសូមធ្វើការប្តេជ្ញាចិត្តថា នឹងអនុវត្ត ក៏ដូចជាទទួលខុសត្រូវ នូវភារកិច្ចរបស់ខ្លួន ដោយយកអស់ពីលទ្ធភាព ជាពិសេសលើការកាត់សេចក្តី ការផ្តល់ពិន្ទុឈ្នះចាញ់ ត្រូវប្រកបដោយយុត្តិធម៌ ភាពត្រឹមត្រូវ និងតម្លាភាពខ្ពស់បំផុត»។
ចំពោះរូបមន្តប្រកួតដណ្តើមខ្សែក្រវាត់ ពានរង្វាន់«សម្តេចពិជ័យសេនា ទៀ បាញ់» នេះ គឺកីឡាករ នៅតាមពូលទាំង២ នឹងចាប់ប្រកួតជម្រុះសន្សំពិន្ទុ ពីថ្ងៃទី ១៨ ខែកញ្ញាតទៅ ដើម្បីរកអ្នកបានលេខ ១ និងលេខ ២ ឡើងទៅប្រកួតវគ្គពាក់កណ្តាលផ្តាច់ព្រ័ត្រ និងវគ្គផ្តាច់ព្រ័ត្រនៅថ្ងៃទី ២៤ ខែវិច្ឆិកា។
សម្រាប់ប្រាក់រង្វាន់វិញ ត្រូវបានម្ចាស់ឧបត្ថម្ភលោក ឡាយ សំណាង ម្ចាស់បុរីភូមិឋានសំណាង បានបញ្ជាក់ថា ម្ចាស់ជើងឯក ក្នុងការប្រកួតនេះ នឹងទទួលបានខ្សែក្រវាត់ ១ គ្រឿង អមប្រាក់រង្វាន់ និងផ្ទះវីឡាភ្លោះមួយខ្នង ដែលអាចលក់វិញក៏បាន ទុកសម្រាប់រស់នៅក៏បាន ចំណែកលេខ ២ ទទួលបានប្រាក់រង្វាន់ និងដីឡូត៍ ១០x២០ ម៉ែត្រ ហើយអ្នកលេខ ៣ និងលេខ ៤ ក៏ទទួលបានប្រាក់រង្វាន់ រួមជាមួយដីឡូត៍ ៥x២០ ម៉ែត្រ ដូចគ្នាផងដែរ៕