ភ្នំពេញៈ គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍លើកទី៣២ ឆ្នាំ ២០២៣ (CAMSOC) បានចាប់ផ្តើមបំពាក់ប្រព័ន្ធ Wi-Fi នៅក្នុងបរិវេណពហុកីឡដ្ឋានជាតិមរតកតេជោ ព្រមទាំងភូមិកីឡា និងទីលានប្រកួតផ្សេងៗទៀត ដើម្បីបម្រើដល់ការផ្សព្វផ្សាយ ការប្រកួតស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣ដែលកម្ពុជា ត្រូវធ្វើម្ចាស់ផ្ទះជាប្រវត្តិសាស្ត្រ លើកដំបូង នាខែឧសភា ខាងមុខ។
នៅក្នុងកិច្ចប្រជុំប្រចាំសប្ដាហ៍ ក្រោមការដឹកនាំរបស់លោក ថោង ខុន រដ្ឋមន្ត្រីក្រសួងទេសចរណ៍ និងអនុប្រធានអចិន្ត្រៃយ៍នៃគណៈកម្មាធិការជាតិ CAMSOC នៅមជ្ឈមណ្ឌលប្រតិបត្តិការកីឡា ក្នុងពហុកីឡដ្ឋានជាតិមរតកតេជោ កាលពីថ្ងៃទី៧ ខែមីនា គឺកិច្ចប្រជុំ បានផ្ដោតទៅលើការរៀបចំប្រព័ន្ធ Wi-Fi នេះ ហើយលោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ ក៏បានចាត់ឱ្យលោក ស្រ៊ុន គឹមសាន សមាជិកនិយតករទូរគមនាគមន៍កម្ពុជា ធ្វើជាតំណាង ដើម្បីមកចូលរួមប្រជុំ ដើម្បីពិភាក្សាគ្នាពីរបៀបបំពាក់ប្រព័ន្ធWi-Fi នេះផងដែរ។
ជាខ្លឹមសាររួម ក្នុងអង្គប្រជុំនោះ លោក វ៉ាត់ ចំរើន អគ្គលេខាធិការ CAMSOC បានថ្លែងក្រោយកិច្ចប្រជុំថា៖ «ជាទូទៅ យើងឃើញថា ការយកចិត្តទុកដាក់នេះ គឺបានបំពេញនូវការបំពាក់ Wi-Fi នៅវិមានពហុកីឡដ្ឋានជាតិមរតកតេជោផង នៅភូមិកីឡាផង និងបរិវេណទីធ្លាសាធារណៈផង។ អ៊ីចឹង ការបំពាក់ Wi-Fi នេះ មានសឹងតែគ្រប់ទីកន្លែងទាំងអស់នៅក្នុងទីធ្លាពហុកីឡដ្ឋានជាតិមរតកតេជោ»។
លោកបានបន្ថែមថា៖«នេះជាការយកចិត្តទុកដាក់ ហើយនៅក្នុងវិមានកីឡដ្ឋានមរតកតេជោ ដែលមានមនុស្សប្រមាណ៦ម៉ឺននាក់ ក៏យើងត្រូវមានការបំពាក់ Wi-Fi ផងដែរ។ ដូច្នេះ ទាំងពេលពិធីបើក-បិទ និងការប្រកួតផ្សេងៗទៀត ក្នុងពហុកីឡដ្ឋានជាតិមរតកតេជោ គឺយើងអាចប្រើប្រាស់បាន ដែលធ្វើឱ្យកំណើននៃការផ្សាយចេញរូបភាពទាំងអស់ នៅក្នុងពហុកីឡដ្ឋាន គឺបានទូលំទូលាយ និងជះឥទ្ធិពលទៅខាងក្រៅបានល្អ»។
លើសពីនេះទៀត លោក វ៉ាត់ ចំរើន ដែលជាអគ្គលេខាធិការ NOCC ផងនោះ បានចាត់ទុកការបំពាក់ប្រព័ន្ធ Wi-Fi នេះ គឺជាតម្រូវការចាំបាច់ ដូច្នេះ ទាំងនៅមជ្ឈមណ្ឌលផ្សព្វផ្សាយព័ត៌មានអន្តរជាតិ (International Broadcast Center - IBC) និងមជ្ឈមណ្ឌលអ្នកសារព័ត៌មាន សុទ្ធតែមានការបំពាក់ Wi-Fi ព្រោះទីតាំងទាំងនេះ ជាតម្រូវការចាំបាច់ សម្រាប់ការផ្សព្វផ្សាយព័ត៌មាន ដែលមិនអាចឱ្យមានការរអាក់រអួលឡើយ។
អ្នកជំនាញកីឡា លោក វ៉ាត់ ចំរើន បានឱ្យដឹងទៀតថា តាមរយៈការបំពាក់ប្រព័ន្ធ Wi-Fi ប្រើប្រាស់បែបនេះ នឹងផ្ដល់ភាពងាយស្រួលដល់ទាំងផ្នែកប្រព័ន្ធផ្សព្វផ្សាយជាតិ និងអន្តរជាតិ ក៏ដូចជាមហាជនដែលចូលរួម បានផ្សព្វផ្សាយ និងចែករំលែកពីព្រឹត្តិការណ៍ឱ្យបានកាន់តែទូលំទូលាយ។ ហេតុនេះការបំពាក់ Wi-Fi នេះ បានចែកជា២ដាច់ពីគ្នា។
អគ្គលេខាធិការ CAMSOC និង NOCC រូបនេះ បានបញ្ជាក់ថា៖ «ការបំពាក់ Wi-Fi នេះ យើងបែងចែកចេញជា២ គឺទី១ Wi-Fi ប្រើប្រាស់ សម្រាប់ការងារនៅក្នុងការងារស្នូលរបស់គណៈកម្មាធិការជាតិ CAMSOC ដែលមានរៀបចំការផ្សព្វផ្សាយ ក៏ដូចជាសម្រួលដល់អ្នកសារព័ត៌មានជាតិ-អន្តរជាតិ ភ្នាក់ងារទូរទស្សន៍ ឱ្យមានភាពងាយស្រួលក្នុងការបញ្ជូនព័ត៌មាន»។
លោក ចំរើន បានបញ្ជាក់បន្ថែមថា៖ «ចំណែកមួយទៀត គឺមហាជន អ្នកចូលរួមទស្សនា ដែលគាត់ក៏ជាអ្នកផ្សព្វផ្សាយផងដែរ អ៊ីចឹងគាត់ក៏ទទួលបាន Wi-Fi នេះ ដើម្បីអាចជួយផ្សព្វផ្សាយព្រឹត្តិការណ៍របស់យើង ហើយនេះគេហៅ «កម្លាំងឥទ្ធិលរបស់កីឡា» ឆ្ពោះទៅផ្សព្វផ្សាយមួយប្រកបដោយគុណភាព និងមានឥទ្ធពលមួយទៅលើសង្គម ព្រោះការប្រកួតកីឡា បើគ្មានការផ្សព្វផ្សាយទូលំទូលាយ ក៏បាត់បង់គុណតម្លៃរបស់យើងផងដែរ»៕