ការប្រកួតរវាងក្រុមព្រះខ័នរាជស្វាយរៀង (អាវខៀវ) និងក្រុមទ័ព កាលពីថ្ងៃទី១១ ខែសីហា ដោយម្ចាស់ផ្ទះស្វាយរៀង បានយកឈ្នះ ៧-០។ រូបថត CPL
ក្រុមការពារតំណែងជើងឯកព្រះខ័នរាជស្វាយរៀង នឹងត្រូវធ្វើការប្រកួតជាមួយក្រុមម្ចាស់ផ្ទះ កងយោធពលខេមរភូមិន្ទ (ទ័ព) នៅកីឡដ្ឋានស្តាតចាស់ នាល្ងាចម៉ោង៦ ថ្ងៃចន្ទនេះ ហើយវាក៏ពេលដែលគ្រូបង្គោលលោក ភា សុភ័ត្ត្រា រួចផុតពីការដាក់ពិន័យរបស់គណៈកម្មការវិន័យរបស់សហព័ន្ធកីឡាបាល់ទាត់កម្ពុជា ដើម្បីវិលមកដឹកនាំក្រុមទ័ព នៅលើទីលានសារជាថ្មីផងដែរ។
សម្រាប់ការវិលមកជួបគ្នា នៅក្នុងជើងទី២នៃលីគកំពូលកម្ពុជានេះ លោក ភា សុភ័ត្ត្រា បានដឹងច្បាស់រួចទៅហើយ ពីកម្រិតលេងដ៏មានគុណភាព និងមានគ្រោះថ្នាក់របស់ក្រុមព្រះខ័នរាជស្វាយរៀង ព្រោះក្រុមដឹកនាំដោយគ្រូបង្គោលលោក Jose Munoz មួយនេះ ធ្លាប់បានលត់ក្រុមទ័ព ៧-០ ម្តងហើយ សម្រាប់ការជួបគ្នា ក្នុងជើងទី១ នៅកីឡដ្ឋានខេត្តស្វាយរៀង កាលពីថ្ងៃទី១១ ខែសីហា។
រំឭកដល់ការចាញ់នោះ លោក ភា សុភ័ត្ត្រា បាននិយាយក្នុងសន្និសីទកាសែត កាលពីថ្ងៃអាទិត្យថា៖ «អ្វីដែលយើងបានចាប់ផ្តើមនៅរដូវកាលនេះ គឺយើងបានបន្សល់សុបិនអាក្រក់ ដោយចាញ់ស្វាយរៀងដល់ទៅ ៧-០ ហើយនេះជារឿងមួយ ដែលយើងត្រូវព្យាយាមធ្វើការបន្តទៀត ដើម្បីកែប្រែនូវស្ថានការណ៍ដ៏អាក្រក់មួយនេះ»។
លោកបន្ថែមថា៖ «បើទោះបីជាស្វាយរៀង មានការប្រកួតដ៏មមាញឹកទាំងក្នុងស្រុក និងក្រៅស្រុក ហើយកីឡាករមួយចំនួនក៏មានរបួស ប៉ុន្តែ ស្វាយរៀង នៅតែជាក្រុមខ្លាំងមួយ ហេតុនេះសម្រាប់ខ្ញុំជាគ្រូ ខ្ញុំមិនរំពឹងថា តាក់ទិចនៃការការពារ និងការប្រយុទ្ធរបស់ខ្ញុំ មានប្រសិទ្ធភាពជាមួយស្វាយរៀងទេ ប៉ុន្តែកត្តាស្មារតីរបស់កីឡាករ គឺជារឿងដែលសំខាន់ជាងតាក់ទិច ថាអ្វីៗយើងអាចធ្វើទៅបាន»។
កីឡាករជម្រើស១១នាក់ដំបូងរបស់ក្រុមព្រះខ័នរាជស្វាយរៀង ពេលប្រកួតជាមួយក្រុមបឹងកេត កាលពីថ្ងៃទី៧ ខែវិច្ឆិកា។ រូបថត CPL
ចំណែកគ្រូបង្គោលក្រុមព្រះខ័នរាជស្វាយរៀង លោក Jose Munoz ក៏មិនបានមើលរំលងពីកម្រិតលេងរបស់ក្រុមទ័ពនោះដែរ។ បើទោះបីជា ១០ប្រកួតកន្លងមកនេះ ទ័ព ឈ្នះបាន៤ ស្មើ២ និងចាញ់ដល់៤ដង ប៉ុន្តែការយកឈ្នះក្រុមគិរីវង់សុខសែនជ័យ ៧-១ និងឈ្នះក្រុមណាហ្គាវើលដ៍ ៣-២ របស់ក្រុមទ័ព សម្រាប់ការប្រកួត២លើកចុងក្រោយមកនេះ ត្រូវបានលោក Jose Munoz យល់ថា វាជាការលើកទឹកចិត្តដ៏សំខាន់របស់ក្រុមទ័ព ក្នុងការស្វាគមន៍ក្រុមស្វាយរៀង ល្ងាចនេះ។
លោក Jose Munoz បាននិយាយថា៖ «ពួកយើងលេងដើម្បីបាន៣ពិន្ទុបន្ថែមទៀត តែពួកគេក៏កំពុងធ្វើបានលទ្ធផលល្អនៅពេលនេះ និងមានកីឡាករដ៏គ្រោះថ្នាក់ម្នាក់បន្ថែមទៀត គឺ Josemar Balanga ហើយពួកគេក៏កំពុងលេងដោយទំនុកចិត្ត បន្ទាប់ពីលទ្ធផលប៉ុន្មានប្រកួតចុងក្រោយ»។
ជាមួយការមើលឃើញពីភាពរីកចម្រើនរបស់ក្រុមទ័ពនេះ លោក Jose Munoz បានជំរុញកូនក្រុមរបស់លោក ត្រូវផ្តោតខ្លាំងលើគូប្រកួត ហើយត្រូវបញ្ឈប់ការលេងបាល់វែងរបស់ពួកគេ និងការពារប្រអប់ទីពីការវាយបករបស់ក្រុមទ័ពផងដែរ។ ទន្ទឹមនឹងនេះ លោកយល់ថា បញ្ហារបួសកីឡាករមួយចំនួន និងការអវត្តមានរបស់កីឡាករជប៉ុន Ryo Fujii ក្នុងការប្រកួតនេះ ក៏ជារឿងលំបាកមួយផងដែរ។
ទោះបីជាយ៉ាងណា លោកគ្រូបង្វឹកសញ្ជាតិអេស្ប៉ាញរូបនេះ បានបញ្ជាក់ថា៖ «គំនិតចម្បងរបស់យើង គឺតែងតែគ្រប់គ្រងការប្រកួត បង្កើតឱកាស និងស៊ុតបាលបញ្ចូលទី។ នេះជាការប្រកួតមួយ មុនពេលសម្រាក FIFA Day អ៊ីចឹងយើងចង់ផ្តល់ការប្រកួតបាល់ទាត់ដ៏ល្អមួយដល់អ្នកគាំទ្ររបស់យើង និងធ្វើឱ្យពួកគេរីករាយជាមួយនឹងគំនិតច្នៃប្រឌិតនៃការលេងរបស់យើង និងទទួលបាន៣ពិន្ទុ»។
ខ្សែប្រយុទ្ធពាក់លេខ៩ Josemar Balanga ពេលបង្ហាញខ្លួនក្នុងជម្រើស១១នាក់ដំបូងរបស់ក្រុមទ័ព ពេលយកឈ្នះក្រុមណាហ្គាវើលដ៍ ៣-២ កាលពីថ្ងៃទី២ វិច្ឆិកា។ រូបថត Tiffy Army
គួរបញ្ជាក់ថា សម្រាប់ការប្រកួត៨លើកកន្លងមកនេះ ក្រុមព្រះខ័នរាជស្វាយរៀង បានឈ្នះ ៦ ចាញ់ ២ដង មាន ១៨ពិន្ទុ ហើយកំពុងឈរនៅលេខ ៥ ជាបណ្តោះអាសន្ន ខណៈក្រុមកំពុងឈរនៅលេខ ១ ភ្នំពេញក្រោន បានបញ្ចប់ការប្រកួតទាំង ១១ដងរបស់ខ្លួន ដោយមិនទាន់ស្គាល់ការចាញ់សោះ បន្ទាប់ពីពួកគេបានប្រកួតស្មើ ៣-៣ ដោយចម្រូងចម្រាសជាមួយក្រុមវិសាខា កាលពីថ្ងៃសៅរ៍ ធ្វើឱ្យពួកគេមាន ៣១ពិន្ទុ តាមពីក្រោយដោយក្រុមវិសាខា មាន ២៥ពិន្ទុ និងណាហ្គាវើល មាន២១ពិន្ទុ ខណៈក្រុមអង្គរថាយហ្គឺរ បានឈរនៅលេខ ៤ ដោយមាន ១៩ពិន្ទុ តែទើបប្រកួតបាន ១០ដងទេ៕
