ខ្សែប្រយុទ្ធ Teerasil Dangda របស់ក្រុម BG Pathum បានព្យាយាមអូសបាល់រំលងខ្សែការពារ សារ៉េត គ្រីយ៉ា និង Takashi Odawara របស់ក្រុមស្វាយរៀង។ រូបថត BG Pathum
គ្រូបង្គោលក្រុមព្រះខ័នរាជស្វាយរៀង លោក Jose Munoz បានបង្ហាញមោទនភាពទៅលើការរៀបចំផែនការលេងរបស់ក្រុមទាំងមូល ក្នុងការប្រកួតជាមួយក្រុមម្ចាស់ផ្ទះ BG Pathum United របស់ថៃ នៅក្នុងការប្រកួតជម្រុះពានរង្វាន់ ASEAN Club Championship Shopee Cup កាលពីយប់មិញ។
បើទោះបីជា ការប្រកួតជម្រុះប្រចាំពូលA នៅពហុកីឡដ្ឋាន Pathum Thani កាលពីយប់ថ្ងៃពុធម្សិលមិញនេះ ក្រុមស្វាយរៀង បានចាញ់ម្ចាស់ផ្ទះ BG Pathum ២-១ ប៉ុន្តែតាមរយៈការប្រកួតពេញ៩០នាទី លោក Jose Munoz បានមើលឃើញថា កូនក្រុមរបស់លោកធ្វើបានយ៉ាងល្អ ក្នុងការបង្ហាញពីទម្រង់លេង ដែលអ្នកខ្លះមិនធ្លាប់បានឃើញ។
គ្រូបង្វឹកសញ្ជាតិអេស្ប៉ាញរូបនេះ បាននិយាយក្រោយការប្រកួតថា៖ «យើងតែងចង់ឈ្នះរាល់ការប្រកួតទាំងអស់របស់យើង ហើយប្រហែលជាអ្នកមួយចំនួនមិនទាន់ស្គាល់ពីរបៀបលេងរបស់យើងទេ ពីមុនមក ប៉ុន្តែសម្រាប់ការប្រកួតនេះ អ្នកបានឃើញពីរបៀបលេងរបស់យើងហើយ។ ថ្វីដ្បិតថា មិនអាចមានអ្វីផ្សេងបានកើតឡើងក្នុងជំនួបនេះ ប៉ុន្តែរបៀបលេងរបស់យើង គឺត្រូវលេងបែបហ្នឹង ដើម្បីបង្កើតឱកាសឱ្យបានច្រើន»។
លោក Jose Munoz បានទទួលស្គាល់ថា ការបរាជ័យវាតែងតែកើតមានឡើង នៅក្នុងការប្រកួតបាល់ទាត់ ប៉ុន្តែលោកបានអះអាងថា ក្រុមស្វាយរៀង តែងព្យាយាមគ្រប់គ្រងការប្រកួត និងព្យាយាមរក្សាបាល់ ដើម្បីបង្កើតឱកាសឱ្យបានច្រើន នៅមុខទីគូប្រកួត ហើយលោកបានបង្ហាញពីមោទនភាព ចំពោះការបង្ហាញរបៀបលេងបែបនេះ ពេលជួបក្រុមខ្លាំង BG Pathum។
លោកបញ្ជាក់ថា៖ «សម្រាប់ខ្ញុំជាគ្រូបង្វឹក គឺពេលឃើញការប្រកួតបែបនេះ ខ្ញុំមានអារម្មណ៍ថា មានមោទនភាពសម្រាប់ផែនការរបស់ពួកយើង និងរបៀបលេងរបស់កីឡាករខ្មែរ និងបរទេស គឺខ្ញុំមានមោទនភាពចំពោះពួកគេ។ កីឡាតែងមានឈ្នះ មានចាញ់ ប៉ុន្តែសម្រាប់ផែនការរៀបចំរបស់យើងនៅដដែល គឺយើងធ្វើតាមផែនការ ដែលយើងបានរៀបចំទុក ហើយវាជាហេតុធ្វើឱ្យមានមោទនភាពសម្រាប់ក្រុមរបស់យើង»។
តាមរយៈការប្រកួត កាលពីយប់ថ្ងៃពុធនោះ ខ្សែប្រយុទ្ធ Raniel Santana De Vasconcelos បានស៊ុតបាល់បញ្ចូលទីជួយឱ្យក្រុម BG Pathum នាំមុខ ១-០ នៅនាទីទី៣១ ប៉ុន្តែការព្យាយាមវាយបកជាច្រើនលើកជាមួយការបង្ហាញទម្រង់លេងយ៉ាងល្អរបស់ ក្រុមស្វាយរៀង បានផ្តល់ឱកាសឱ្យខ្សែប្រយុទ្ធប្រេស៊ីល Pablo Augusto Servo De Carvalho អាចស៊ុតបាល់ទម្លុះទីក្រុមម្ចាស់ផ្ទះបាន១គ្រាប់វិញ នៅនាទីទី៦១។
តែទោះបីជាយ៉ាងណា ភាពរីករាយក្រុមស្វាយរៀងនេះ បានរលាយបាត់ទៅវិញយ៉ាងលឿន នៅពេលខ្សែប្រយុទ្ធរបស់ថៃ Teerasil Dangda បានស៊ុតបាល់បញ្ចូលទីបាន១គ្រាប់ទៀត នៅនាទីទី៦៣ បន្ទាប់ពីកីឡាកររបស់ក្រុម BG Pathum រត់ទៅបុកខ្សែប្រយុទ្ធរបស់ស្វាយរៀង Christian Roque Silveira Dos Santos ឱ្យដួលទាំងជំហរ ដើម្បីដណ្តើមយកបាល់ពីការបញ្ជូនរបស់ មិន រតនៈ ប៉ុន្តែលោកអាជ្ញាកណ្តាល Faisal Sulaiman Albalawi មិនបានពិន័យលើហេតុការណ៍នេះទេ។
ក្រោយការចាញ់ប្រៀប ២-១ នេះ ក្រុមស្វាយរៀង បានព្យាយាមវាយលុកទៅលើក្រុម BG Pathum ជាបន្តបន្ទាប់ ហើយក៏បានបង្កើតឱកាសជាច្រើនលើកផងដែរ ប៉ុន្តែពួកគេធ្វើមិនបានសម្រេច និងបានចាញ់ ២-១ ដ៏គួរឱ្យសោកស្តាយ ខណៈស្ថិតិនៃការប្រកួតនេះបានបង្ហាញថា ក្រុមស្វាយរៀង មានឱកាសគ្រប់គ្រងបាល់ច្រើនជាងក្រុមម្ចាស់ផ្ទះរបស់ថៃ គឺ៥៤% ទល់នឹង៤៦% និងមានឱកាសស៊ុតបាល់ដល់២០ដង គឺច្រើនជាង BG Pathum ដែលស៊ុតបានត្រឹម១២ដង។
ជាមួយស្ថិតិប្រកួត និងស្ថានភាពជាក់ស្តែងនេះ បានធ្វើឱ្យអ្នកគាំទ្របាល់ទាត់របស់ថៃភាគច្រើន បានបង្ហាញការមិនពេញចិត្ត និងនាំគ្នារិះគន់ទៅលើទម្រង់លេងរបស់ក្រុម BG Pathum ទោះបីជាក្រុមនេះបានឈ្នះ៣ពិន្ទុ ជាលើកដំបូង នៅលើទឹកដីខ្លួនឯងក៏ដោយ ព្រោះការប្រកួតបើកឆាក នៅលើទឹកដីប្រទេសឥណ្ឌូនេស៊ី កាលពីថ្ងៃទី២១ ខែកញ្ញា ក្រុម BG Pathum បានស្មើ ០-០ ជាមួយក្រុមម្ចាស់ផ្ទះ PSM ស្របពេលក្រុមព្រះខ័នរាជស្វាយរៀង បានយកឈ្នះក្រុមម្ចាស់ផ្ទះ Terengganu FC របស់ម៉ាឡេស៊ី ៣-២។
ចំណែកលោក Makoto Teguramori គ្រូបង្គោលក្រុម BG Pathum ក៏បានទទួលស្គាល់ថា ក្រុមរបស់លោកលេងមិនបានល្អ ដែលត្រូវតែត្រឡប់ទៅធ្វើការងារវិញ ដើម្បីត្រឡប់មកខ្លាំងជាងមុន។ រីឯខ្សែប្រយុទ្ធ Teerasil Dangda ដែលរកបានគ្រាប់បាល់ជ័យជម្នះឱ្យក្រុម BG Pathum ក៏បានលើកឡើងស្រដៀងគ្នានេះផងដែរ ប៉ុន្តែនេះគ្រាន់ជាភាសាលួងលោមផ្លូវចិត្តដល់អ្នកគាំទ្រប៉ុណ្ណោះ ព្រោះ BG Pathum បានប្រឹងប្រែងអស់ពីលទ្ធភាពហើយ ហើយបានយកឈ្នះក្រុមស្វាយរៀង ទាំងលំបាកបំផុត។
ម្ចាស់អាវលេខ១០ Teerasil បាននិយាយថា៖ «ខ្ញុំរីករាយដែលទទួលបាន៣ពិន្ទុនៅក្នុងដី ទោះបីជាយើងធ្វើមិនបានល្អក៏ដោយ ប៉ុន្តែវាមិនមែនជារឿងងាយស្រួលទេ ក្នុងការទទួលបាន៣ពិន្ទុនេះ។ យើងត្រូវតែទទួលស្គាល់ថា គូប្រកួតរបស់យើង គឺធ្វើបានល្អ ហើយយើងប្រហែលជាបានលេងក្រោមស្តង់ដារ ឬពេលខ្លះវាពិបាកលេង ប៉ុន្តែខ្ញុំត្រូវអរគុណដល់មិត្តរួមក្រុម គឺទោះបីជាពេលវេលាលំបាក ក៏ពួកគេបានជួយគ្នាទៅវិញទៅមកតាមដែលអាចធ្វើទៅបាន ហើយទទួលបាន៣ពិន្ទុ សម្រាប់ឱកាសឡើងទៅជុំបន្ទាប់»៕
