ភ្នំពេញ: ស្ថិតក្នុងចំណោមយុវជន ២០០ ក្រុម មកពី ៦៥ ប្រទេស ចូលរួមការប្រកួតរ៉ូបូតអូឡាំព្យ៉ាដពិភពលោក (World Robot Olympiad) ក្រុមកម្ពុជា Energific មានសមាជិក ៣ នាក់ បានទទួលចំណាត់ថ្នាក់លេខ ១២ ក្នុងការបង្កើតរ៉ូបូត អនាគតនៃថាមពលស្អាត តាមរយៈការជាន់ ឬសង្កត់ដែលអាចបង្កើតជាអគ្គិសនី។
រ៉ូបូតអូឡាំព្យ៉ាដ គឺជាការប្រកួតជាសកលផ្ដោតលើបច្ចេកវិទ្យាវិទ្យាសាស្ត្រ និងការអប់រំ ដែលផ្តល់ឱ្យសិស្សចាប់ពីអាយុ ១២-១៩ ឆ្នាំ នូវឱកាសអភិវឌ្ឍន៍ភាពច្នៃប្រឌិត និងជំនាញដោះស្រាយបញ្ហាតាមរយៈការបង្កើតមនុស្សយន្ត ដើម្បីជំរុញអនាគតនៃវិស្វករ និងអ្នកច្នៃបង្កើតថ្មី។
ឆ្នាំនេះការប្រកួតរ៉ូបូតលំដាប់ពិភពលោកត្រូវបានធ្វើអនឡាញចន្លោះថ្ងៃទី ១៨ ដល់ ២១ ខែវិច្ឆិកា។
កញ្ញា សោម តុលា គ្រូបង្វឹកក្នុងកម្មវិធី Juniper និងអ្នករៀបចំព្រឹត្តិការណ៍ក្នុងការប្រកួត រ៉ូបូតអូឡាំព្យ៉ាដ ប្រាប់ ភ្នំពេញ ប៉ុស្តិ៍ថា សិស្សជាច្រើនបានទទួលជំនាញទាំងនេះ ក្នុងអំឡុងពេល ដែលស្ថានទូតអង់គ្លេសបានបង្កើតវគ្គបណ្ដុះបណ្ដាល រ៉ូបូតទិកអនឡាញ «រ៉ូបូត អនាគតនៃថាមពល» ដែលធ្វើឡើងកាលពីខែកក្កដា-កញ្ញា ឆ្នាំ ២០២១។
គ្រូបង្វឹក និងអ្នករៀបចំព្រឹត្តិការណ៍ក្នុងការប្រកួត រ៉ូបូតអូឡាំព្យ៉ាដរូបនេះក៏បានបង្ហាញពីភាពរីករាយ ដែលថា៖ «ដំណើរការកម្មវិធីនេះជិត ៤ ខែ ខ្ញុំបានឃើញសិស្ស ចង់ស្វែងយល់ និងបង្កើនចំណេះដឹងផ្នែកបច្ចេកវិទ្យា។ បន្ទាប់ពីការប្រកួតនៅជុំកម្ពុជា អ្នកចូលរួមមួយចំនួនបានបង្កើត ក្លិបសរសេរកូដ ហើយចែករំលែកអ្វី ដែលពួកគេបានរៀន»។
ក្រុម Energific មានសមាជិក ៣ នាក់ ក្នុងនោះមាន ពុន សូលីតា, ហូ ច័ន្ទពន្លឺសោភា និង កែប ស្រីណាច។
ពួកគេបានប្រាប់ ភ្នំពេញ ប៉ុស្តិ៍ ពីភាពរីករាយ និងមានមោទនភាពចំពោះលទ្ធផលល្អនៃការងារគម្រោងរបស់ខ្លួនឈ្មោះថា Energific ដោយតាមរយៈកម្លាំងសង្កត់នៃជំហានរបស់ពួកគេទៅលើសេនស័រ វានឹងបង្កើតបានថាមពលអគ្គិសនីក្នុងការបំភ្លឺ អំពូលភ្លើង ២០ តូចៗ តាមអគារគំរូដែលពួកគេរចនាឡើង។
យុវតីវ័យ ១៨ ឆ្នាំ សូលីតា បានថ្លែងថា៖ «ខ្ញុំសប្បាយចិត្តហើយរំភើប ព្រោះមិនបានរំពឹងថានឹងជាប់។ ខ្ញុំឃើញ គម្រោងរបស់គេ ល្អជាងពួកយើងច្រើនណាស់។ យើងមិនរំពឹងអីច្រើន យើងគ្រាន់តែចង់បញ្ចប់អ្វី ដែលយើងចាប់ផ្ដើម។ ប៉ុន្តែនៅពេល យើងទទួលលទ្ធផលលេខ ១ ជុំកម្ពុជា វាហាក់ហួសពីអ្វី ដែលយើងរំពឹងទុក»។
ដោយសប្បាយចិត្តនឹងឱកាសបានបង្ហាញការប្រឹងប្រែងនៃក្រុម សូលីតា បន្តថា៖ «សម្រាប់ជុំអន្តរជាតិ យើងគិតថាយើងអាចធ្វើបានល្អជាងហ្នឹង បើយើងស្ដាប់សំណួរពីគណៈកម្មាធិការដាក់ពិន្ទុបានច្បាស់»។
ក្រុម Energific មកពីសាលារៀន E2stem Education, Cambodia និងបង្វឹកដោយលោកគ្រូ រិទ្ធ ឧត្តម ដែលបានតំណាងប្រទេសកម្ពុជា ចូលរួមក្នុងការប្រកួតអនឡាញ រ៉ូបូតអូឡាំព្យ៉ាដ ជុំអន្តរជាតិ។
ក្នុងនាមជាគ្រូបង្វឹក លោកបានប្រាប់ ភ្នំពេញ ប៉ុស្តិ៍ថា លោកផ្ទាល់ក៏រំភើប នៅពេលដែលបានឃើញការខិតខំរបស់កូនសិស្សទទួលបានផល ទាំងរូបលោកបានចំណាយពេលតិចតួចណាស់ក្នុងការជួយពួកគេ។
លោកគ្រូ ឧត្តម បានលើកឡើងថា៖ «ពួកគេមានភាពឯករាជ្យ និងមានសមត្ថភាពធ្វើការ និងដោះស្រាយបញ្ហាដោយខ្លួនឯងបាន។ ពួកគេមករកខ្ញុំតែនៅពេលពួកគេជួបបញ្ហា ឬត្រូវការយោបល់ទិញឧបករណ៍សម្រាប់គម្រោងប៉ុណ្ណោះ»។
នៅពីក្រោយភាពជោគជ័យ គឺជាគំនិតផ្តួចផ្តើមគម្រោងក្រៅរដ្ឋាភិបាល STEMEOC ដែលមានគោលបំណងជួយយុវជនកម្ពុជា ក្នុងការចាប់អាជីពផ្នែកវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា បានចូលរួមសហការនឹងរ៉ូបូតអូឡាំព្យ៉ាដ ពីឆ្នាំ ២០១៨។
លោក អ៊ុ ចាន់ចំណាន នាយក STEMEOC បានឱ្យដឹងថា វាគឺជាកម្មវិធីមួយ ដើម្បីលើកទឹកចិត្តយុវជនឱ្យប្រើជំនាញមនុស្សយន្តរបស់ពួកគេ ដើម្បីដោះស្រាយបញ្ហាពិភពលោកពិតប្រាកដ ដែលកើតចេញពីការប្រើប្រាស់ថាមពលកកើតឡើងវិញ។
សមាជិកទាំងអស់ក៏គិតពីអ្វី ដែលគេបញ្ចេញរាល់ថ្ងៃឱ្យចេញជាកម្លាំង ឬសម្ពាធយកមកប្រើប្រាស់ ដើម្បីបង្កើតថាមពលមិនប៉ះពាល់បរិស្ថាន។
ជាមួយមោទនភាពដែលយុវជនបានបំផុសគំនិតគួរឱ្យចាប់អារម្មណ៍ជាច្រើនទាក់ទងការបង្កើតថាមពលក្នុងសហគមន៍ពួកគេ លោកបានរៀបរាប់ថា៖ «ពួកគេផ្ដោតលើការជួយដល់ទីជនបទឆ្ងាយៗ ជាមួយនឹងថាមពលសូឡា ដើម្បីសម្រួលសិស្ស ដែលរៀនអនឡាញ។ បង្កើតចរន្តពីជំហាន ឆ្លងផ្លូវមមាញឹកដោយសុវត្ថិភាព ជាមួយនឹងដំណោះស្រាយ ដែលចំណាយតិច និងប៉ះពាល់តិចបំផុតដល់បរិស្ថាន»។
សមាជិកក្រុម Energific ស្រីណាច មានតួនាទីខាងសាងសង់ និងឌីហ្សាញអគារនៃគម្រោង។
យុវតីអាយុ ១៧ ឆ្នាំរូបនេះលើកឡើងថា៖ «យើងក៏នឹកឃើញដល់ជំហាន ក៏សម្រេចយកវាដើម្បីបង្កើតថាមពល។ ការបំផុសគំនិតយើងបានពី វីដេអូរបស់ជប៉ុនមួយ ដែលគេប្រើប្រាស់ជំហានដែរ តែគេប្រើម៉ូទ័រ ខណៈដែលយើងប្រើសេនស័រ»។
រីឯសមាជិក ច័ន្ទពន្លឺសោភា បានឱ្យដឹងថា ពួកគេមានពេល ៣ សប្ដាហ៍ ដើម្បីឱ្យរ៉ូបូតចេញជារូបរាង ហើយពេលជាប់ពីថ្នាក់ជាតិ ពួកគេបានព្យាយាមដំឡើងរូបឱ្យធំជាងមុន។
យុវជនរូបនេះថា៖ «ឥឡូវអ្វី ដែលយើងអាចធ្វើបានគឺបង្កើតចរន្តអគ្គិសនី ពេលជាន់ ឬសង្កត់លើវា។ ថ្ងៃអនាគត យើងមានគម្រោងដាក់ថាមពល ដែលយើងបង្កើតបាននៅក្នុងថ្ម ឬអាគុយដូចជា សូឡា ដើម្បីស្ដុកទុក»។
បញ្ហាដែលក្រុម Energific ជួបច្រើនបំផុត គឺកូដ ដោយពួកគេត្រូវរកដំណោះស្រាយ ដើម្បីទាញយកថាមពលអគ្គិសនីចេញពីសេនស័រ និងបញ្ជាឱ្យសេនស័រ ធ្វើការដូចអ្វី ដែលពួកគេចង់បាន។ យ៉ាងណាមិញ ដោយមានការឱ្យយោបល់ពី លោកគ្រូ ជាមួយសិស្សច្បង និងស្រាវជ្រាវតាមអ៊ីនធឺណិត ពួកគេក៏អាចជម្នះកិច្ចការស្មុគស្មាញនេះបាន។
លោកគ្រូ ឧត្តម សរសើរថា ពួកគេខ្លាំងក្នុងការធ្វើការរួមគ្នា ដោះស្រាយបញ្ហាបានរហ័ស ធ្វើបទបង្ហាញងាយយល់ និងមានគំនិតច្នៃប្រឌិត។ ប៉ុន្តែលោកក៏សម្គាល់ពីចំណុចខ្សោយនៃក្រុម ដែលទាមទារការស្រាវជ្រាវថែមទៀតលើគ្រឿងអេឡិចត្រូនិកទំនើប ដើម្បីឱ្យគម្រោងនេះកាន់តែប្រសើរ។
លោក ចាន់ចំណាន នាយកកម្មវិធី STEMEOC ដែលជំរុញយុវជនប្រើជំនាញមនុស្សយន្ត បង្ហាញទស្សនៈថា ប្រជាជនកម្ពុជាទាំងអស់មាន STEM ក្នុងហ្សែ៊នរួចហើយ។
លោកបានបញ្ជាក់ថា៖ «STEMEOC នឹងព្យាយាមអស់ពីសមត្ថភាព ដើម្បីដោះសោសក្តានុពលនោះនៅក្នុងប្រជាជនខ្មែរ។ ក្នុងនាមជាអង្គការមិនរកប្រាក់កម្រៃអព្យាក្រឹតរបស់កម្ពុជា យើងរីករាយក្នុងការសហការជាមួយគ្រប់គ្នា ដែលអាចបើក និងនាំយកបច្ចេកវិទ្យាទំនើប ជឿនលឿនមកកម្ពុជា»។
ព័ត៌មានបន្ថែមមាននៅទំព័រហ្វេសប៊ុក @STEMCambodia៕