ក្រុងប៉ារីស៖ មនុស្ស ៦ លាននាក់ បានទៅលេងប្រាសាទ ខ្ចប់ «Arc de Triomphe» ពេលសំណង់និមិត្ដរូបក្រុងប៉ារីស ត្រូវបានខ្ចប់ក្រណាត់ជាការឧទ្ទិសដល់សពសិល្បករ គ្រីស្ដូ និង ចេននេ ក្លោដ។ នេះបើយោងតាមការប៉ាន់ប្រមាណដែលចុះផ្សាយកាលពីថ្ងៃអង្គារ។
សំណង់ស្ថិតនៅលើវិថីហ្សង់ស៍ អេលីហ្ស៊េស៍ (Champs Elysees) ត្រូវបានស្រោមក្រណាត់នីឡុងកែច្នៃពណ៌ទឹកប្រាក់បែកខៀវប្រមាណ ២៥ ០០០ ម៉ែត្រការ៉េរយៈពេល ៣ សប្ដាហ៍ចាប់ពីខែកញ្ញាដល់ដើមខែតុលា។
វាជាក្ដីសុបិនតាំងពីយូរយាររបស់សិល្បករសញ្ជាតិប៊ែលហ្ស៊ិកគ្រីស្ដូ ដែលបានស្លាប់កាលពីឆ្នាំមុនក្នុងអាយុ ៨៤ ឆ្នាំ ហើយភរិយារបស់លោកឈ្មោះ ជេននេ ក្លោដ ក៏បានជួលអាផាតមិននៅក្បែរនោះក្នុងទសវត្សរ៍ឆ្នាំ ១៩៦០ ផងដែរ។
ពួកគេទាំង២ មានឈ្មោះល្បីល្បាញខាងសិល្បៈរុំខ្ចប់សំណង់សាធារណៈនានាជុំវិញពិភពលោក។ ជនទី៣ ដែលមកទស្សនាសំណង់ខ្ចប់ Arc de Triomphe គឺជាជនបរទេស ហើយវាជាសញ្ញាបញ្ជាក់ពីការវិលត្រឡប់របស់ភ្ញៀវទេសចរបន្ដិចម្ដងៗមកកាន់ទីក្រុងជាប់ចំណាត់ថ្នាក់លេខ ១ ដែលទទួលភ្ញៀវទេសចរច្រើនបំផុតក្នុងលោក។
ការប៉ាន់ប្រមាណនេះអាស្រ័យលើទិន្នន័យទូរស័ព្ទ និងទិន្នន័យដឹកជញ្ជូនប្រមូលដោយអាជ្ញាធរក្រុង និងទេសចរណ៍។ តួលេខសរុបបានផ្ដួលចំនួនភ្ញៀវទៅទស្សនាសំណង់ខ្ចប់ «Wrapped Reichstag» ក្នុងក្រុងប៊ែរឡាំងក្នុងឆ្នាំ ១៩៩៥ ដែលមានភ្ញៀវ ៥ លាននាក់។
ប្ដីប្រពន្ធនេះក៏បានខ្ចប់ស្ពានចំណាស់បំផុតក្នុងក្រុងប៉ារីស Pont-Neuf ក្នុងឆ្នាំ ១៩៨៥ តែអ្នកទស្សនាមិនត្រូវបានរាប់ចំនួននាគ្រានោះទេ។ គម្រោង Arc ត្រូវបានរៀបចំឡើងដោយក្មួយប្រុសលោកគ្រូ ស្ដូ ឈ្មោះ វ្លាឌីមៀរ ចាវ៉ាឆែហ្វ ដោយមានការសម្របសម្រួលពីសារមន្ទីរ Pompidou និងអាជ្ញាធរបារាំង។
ប្រធានាធិបតីបារាំងលោក អេមម៉ានូអែល ម៉ាក្រុង បាននិយាយពេលលោកបង្ហាញវត្ថុដ៏ចម្លែកនេះនៅក្នុងខែកញ្ញាថា៖ «វាជាក្ដីសុបិនដ៏ចម្លែកហើយពេលនេះលោកបានសម្រេចបំណងហើយវ្លាឌីមៀរ។យើងដឹងគុណដល់លោកខ្លាំងណាស់»។
ការចំណាយ ១៦ លានដុល្លារ ត្រូវបានផ្ដល់មូលនិធិពីការលក់ស្នាដៃដើមរបស់លោក គ្រីស្ដូ។
សម្រាប់លោក គ្រីស្ដូ ដែលបន្សល់ទុកនូវពង្រាងនិងរូបភាពគំនូរស្ដីពីគម្រោងរបស់លោកលោកមានចក្ខុវិស័យថាសំណង់ Arc នឹងក្លាយជា «វត្ថុរស់ ដែលធ្វើឱ្យរស់រវើកដោយខ្យល់ និងចាំងឆ្លុះពន្លឺ»៕ AFP/HR