វាលស្រែជម្រាលភ្នំភាគច្រើនជារបស់កុលសម្ព័ន្ធម៉ុង នៅវៀតណាម។ រូបថត AFP
.jpg)
ក្រុងហាណូយ: ពេលព្រះសុរិយាចាំងជះលើផែនពសុធា បំភាយអ័ព្ទផ្សែង បំភ្លឺវាលស្រែលើជម្រាលភ្នំនៃប្រទេសវៀតណាម ប្រជាកសិករដឹកក្របីចុះងូតទឹក។ ទិដ្ឋភាពដ៏ស្រស់ត្រកាលនេះ បានកន្លងផុតទៅពីមួយថ្ងៃទៅមួយថ្ងៃ ដោយគ្មានវត្ដមានភ្ញៀវទេសចរបានគយគន់។
ស្ថិតនៅចម្ងាយប្រមាណ ៣០០ គីឡូម៉ែត្រភាគពាយព្យក្រុងហាណូយ ស្រុកមូសាងឆៃ ភាគខាងជើងខេត្ដយេនបៃ បានក្លាយជាគោលដៅទេសចរណ៍ពេញនិយមសម្រាបភ្ញៀវបរទេស និងក្នុងស្រុកមុនពេលជួបវិបត្ដិសុខុមាលភាពសកល។
វាលស្រែជម្រាលភ្នំដ៏ត្រកាល ដែលស្ថិតនៅលើកម្ពស់ ១ ពាន់ម៉ែត្រនៃនីវ៉ូទឹកសមុទ្រ ជាកម្មសិទ្ធិភាគច្រើនរបស់កុលសម្ព័ន្ធម៉ុង ដែលរស់នៅយ៉ាងច្រើនបំផុតក្នុងតំបន់នោះ។
ស្ដ្រីម៉ុងធ្លាប់ជួលឈុតប្រពៃណីដ៏ស្រស់ឆើតឆាយដល់ភ្ញៀវទេសចរ ខណៈកុលសម្ព័ន្ធបុរសៗអាចរកចំណូលបានល្បាក់ ៣០ ដុល្លារ ក្នុង ១ ថ្ងៃ ដោយការជូនដំណើរភ្ញៀវឡើងភ្នំ។
វាលស្រែវាលស្រូវពិតជារំលេចនូវទស្សនីយភាពស្រស់ស្អាតអំឡុងខែកញ្ញា និងតុលា ពេលដំណាំស្រូវប្រែពណ៌លឿងទុំដូចកម្រាលព្រំមាស។
កសិករ ធី ឡូន បានប្រាប់ AFP ថា៖ «យើងធ្លាប់ទទួលភ្ញៀវយ៉ាងច្រើនសន្ធឹកសន្ធាប់។ ប៉ុន្ដែឆ្នាំនេះ វាលស្រែទាំងអស់មានភាពទទេស្អាត ដោយសារតែការរឹតបន្ដឹងទប់ស្កាត់កូវីដ»។
អ្នកស្រីបានបន្ថែមថា៖ «ជាក្ដីប្រាថ្នារបស់យើង ដែលចង់ឱ្យវីរុសតិរច្ឆាននេះរសាយបាត់ទៅ ហើយយើងអាចបន្ដជីវិតប្រចាំថ្ងៃយើងវិញ»។
ថ្មីៗនេះ វៀតណាមចាប់ផ្ដើមបើកទ្វារប្រទេសស្វាគមន៍ពិភពលោកឡើងវិញ ហើយភ្ញៀវអន្ដរជាតិមួយ-ចំនួនបានមកដល់កោះទេសចរណ៍ ភូគុក និងគោលដៅទេសចរណ៍មួយចំនួនទៀតនៅភាគខាងត្បូង។
មិនច្បាស់ថាពេលណាវៀតណាមនឹងបើកទ្វារពេញលេញ ខណៈប្រទេសនេះកំពុងប្រឆាំងនឹងការផ្ទុះជំងឺកូវីដ ១៩ ធ្ងន់ធ្ងរផងដែរ៕ AFP/HR
