កោះកុង: វេលាព្រឹកព្រលឹមស្រាងៗ លោក នៅ វាសនា ជាទេសចរនិយមដើរត្រាច់ចរតាមតំបន់អេកូទេសចរណ៍ បានក្រោកពីដំណេក និងរូតតង់ចេញគយគន់ទេសភាពនៃសម្រស់ធម្មជាតិលើជ្រោះអូរកី ស្ថិតនៅចន្លោះសហគមន៍ជីផាត់ និងអារ៉ែង។
លោក វាសនា បាននិយាយថា បរិយាកាសនៅទីនោះល្អមែនទែន។ បើសិនជាខែខ្នើត នៅពេលយប់ មានព្រះចន្ទបំភ្លឺមេឃា ខណៈពេលរនោច ក៏មានហ្វូងតារារះបញ្ចេញសម្រស់។ ពេលព្រឹកព្រហាម ងើបមកញ៉ាំកាហ្វេ មើលសត្វកេងកងហើរ និងចុះលេងទឹកនៅខាងក្រោម។
ភូមិតង់អូរកី ជាឈ្មោះរីសតទើបបង្កើតថ្មី ដែលមានសំណង់ភោជនីយដ្ឋានធ្វើពីឈើ សម្រាប់គន់ទេសភាពភ្នំអូរកីនៃជួរភ្នំក្រវាញ និងចំទើតលើជ្រោះអូរកី គឺជាចំណុចទាក់ទាញដំបូង។
ដោយសារតែស្ថានភាពទីតាំងនៅឆ្ងាយពីទីប្រជុំជន ការកសាងផ្ទះលម្ហែក្នុងរីសតភូមិតង់អូរកី នៅមិនទាន់ចេញជារូបរាង ដោយមានសេវាកម្មត្រឹមតែការបោះតង់ស្នាក់ប៉ុណ្ណោះ។
ជាមួយគម្រោងសមិទ្ធផលផ្ទះលម្ហែនៅរយៈពេល ៦ ខែទៀត ចំពោះភូមិតង់អូរកី ដែលមានផ្ទះបាយ កន្លែងអង្គុយលេងមើលទេសភាព និងកូនអាងហែលទឹកមួយអាចមានតម្លៃពី ១៥០ ទៅ ២០០ ដុល្លារ សម្រាប់ការស្នាក់នៅរហូតដល់ភ្ញៀវ ១០ នាក់។
លោក ទុយ វណ្ណៈ អាយុ ៣១ ឆ្នាំ បានឱ្យដឹងថា រីសតមានចម្ងាយប្រមាណ ១២ គីឡូម៉ែត្រពីទីប្រជុំជនជីផាត់ ដែលអាចបររថយន្ដទៅដល់រីសតលម្ហែយ៉ាងងាយស្រួល។
បច្ចុប្បន្ននេះ រីសតទទួលភ្ញៀវស្នាក់នៅជារបៀបការបោះតង់សិន តម្លៃ ១៥ ដុល្លារសម្រាប់មនុស្ស ២ នាក់ ដែលមានបរិក្ខារពូក ខ្នើយ កង្ហារ និងទឹកសុទ្ធ ២ ដប។
លោក ទុយ វណ្ណៈ ជាម្ចាស់រីសតភូមិតង់អូរកី បានបង្ហាញផែនការដើរកម្សាន្ដនៅជីផាត់ និងអារ៉ែងត្រួសៗថា បើសិនជាល្អសម្រាប់ការដើរកម្សាន្ដ ភ្ញៀវគួរតែចំណាយពេល ២ យប់នៅជីផាត់ ឬភូមិតង់នេះ។ ពេលភ្ញៀវមកដល់ជីផាត់ខ្ទង់ម៉ោងប្រមាណ ១១ ឬ ១២ ថ្ងៃត្រង់ ពួកគេអាចលេងទឹកជ្រោះលើជីផាត់នោះ ដែលមានឆាយច្រេះ និងឆាយខ្ពស់។ នៅពេលល្ងាច ភ្ញៀវអាចសម្រាកនៅភូមិតង់អូរកី។
ម្ចាស់រីសត ដែលសម្បូរផ្លែផ្ញៀវសម្រាប់ទទួលភ្ញៀវបានបន្ដថា៖ «នៅថ្ងៃទី២ ពួកគាត់អាចទៅលេងនៅជ្រោះអូរម្លូ អារ៉ែង ដោយពីអូរកីទៅអារ៉ែងមានចម្ងាយប្រហែល ៣០ គីឡូម៉ែត្រ ដែលប្រើថេរវេលា ១ ម៉ោង។ យើងមានម៉ូតូជួលដែលមានតម្លៃ ៤ ម៉ឺនរៀល (១០ ដុល្លារ) សម្រាប់ ១ ថ្ងៃ។ បើពួកគាត់ត្រូវការអ្នកជូន គាត់គិត ១ ថ្ងៃ ៦ ម៉ឺនរៀល (១៥ ដុល្លារ)»។
ភ្ញៀវចេញដំណើរពីភូមិតង់អូរកី ម៉ោង ៧:៣០ ព្រឹក ភ្ញៀវទៅដល់អារ៉ែងល្បាក់ម៉ោងជាង ៨ រួចដើរលេងជុំវិញភូមិ ហើយខ្ទង់ម៉ោង ៣ ឬ ៤ រសៀល ពួកគេមកដល់ភូមិតង់វិញ នៅម៉ោង ៥ ល្ងាច និងត្រៀមទទួលទានអាហារ និងការស្នាក់នៅ ១ យប់ទៀតល្មម។
លោកបន្ថែមថា៖ «នៅពេលយប់ យើងអាចមានកម្មវិធីដុតដំឡូងញ៉ាំជុំគ្នា ឬស្ទូចត្រី ដោយយើងមានអន្លង់ ១ ដែលយើងអាចស្ទូចត្រីបាន»។
សម្រាប់អ្នកមិនចង់បោះតង់នៅបរិវេណភូមិតង់អូរកី ពួកគេអាចធ្វើដំណើរថយក្រោយបន្ដិច មកកាន់ទីប្រជុំជនឃុំជីផាត់ និងស្នាក់នៅក្នុងរីសត Sunbear Ecolodge ដែលលោក វណ្ណៈ បានបើកដំណើរការអស់រយៈពេល ៧ ឆ្នាំមកហើយ។
ស្ថិតនៅលើផ្ទៃដី ២ ហិកតា Sunbear Ecolodge មាន ១០ បាងហ្គាឡូ ដែលមានចម្ងាយឃ្លាតពីគ្នា ដោយសង់ពីឫស្សីប្រក់ស្បូវ នៅកណ្ដាលភូមិជីផាត់ ឃុំជីផាត់។
ផ្ទះគ្រែ ១ មានតម្លៃ ២០ ដុល្លារ គ្រែ ២ ២៥ ដុល្លារ និង ៣ លក្ខណៈគ្រួសារ ៤០ ដុល្លារ ដោយបំពាក់កង្ហារ បន្ទប់ទឹក ទឹកក្ដៅ ទឹកត្រជាក់ ដែលមិនខុសពីបាងហ្គាឡូទូទៅនោះទេ។
លោក វណ្ណៈ បានប្រាប់ថា៖ «យើងធ្វើផ្ទះនីមួយៗដាច់ឆ្ងាយពីគ្នា ជាលក្ខណៈឯកជនដោយមានគម្លាតពីគ្នាចន្លោះពី ១០ ទៅ ១៥ ម៉ែត្រ និងភ្ជាប់ដោយស្ពានឈើទាបៗ។ អ្វីដែលកាន់តែពិសេស ផ្ទះបាងហ្គាឡូទាំងនេះ សង់ជ្រកក្នុងចម្ការចន្ទន៍ក្រស្នា និងព័ទ្ធជុំវិញដោយចម្ការទុរេន តាមបែបកសិទេសចរណ៍»។
ភូមិតង់អូរកី ស្ថិតនៅក្នុងភូមិជីផាត់ ឃុំជីផាត់ ស្រុកថ្មបាំង ខេត្ដកោះកុង ទំព័រហ្វេសប៊ុក O''Key Camping ភូមិតង់អូរកី និងទំនាក់ទំនងទូរស័ព្ទលេខ ០៧៧ ៨៣៤ ៣៣៣៕