ក្រុងវ៉ាស៊ីនតោន: ទ្វារចូលទីផ្សារទេសចរណ៍អវកាសថ្មីបានសន្យាផ្ដល់ទស្សនីយភាពកំណោងភពផែនដីពីកាប៊ីនដ៏ប្រណីតបំផុត ដែលត្រូវបានបង្ហោះទៅបរិយាកាសខាងលើដោយបាឡុងយក្ស។
Space Perspective សប្ដាហ៍មុន បានលាតត្រដាងពីរូបភាពកាប៊ីនដ៏ប្រណីត ដែលខ្លួនរំពឹងថា នឹងចាប់ផ្ដើមបង្ហោះចេញពីមជ្ឈមណ្ឌលអវកាសឃេនណេឌី ក្នុងរដ្ឋ Florida ពីចុងឆ្នាំ ២០២៤ ជាមួយគម្រោងហោះហើរ ២៥ ដង ក្នុង ១ ឆ្នាំដំបូង។
សំបុត្រជាង ៦០០ សន្លឹក ត្រូវបានលក់អស់ក្នុងតម្លៃ ១២៥ ០០០ ដុល្លារ ក្នុង ១ សន្លឹក។ អ្នកដំណើរមិនតម្រូវឱ្យមានការបណ្ដុះបណ្ដាលនោះទេ។
ដោយមានបង្អួចកម្ពស់ ១,៥ ម៉ែត្រ កៅអីជ្រៅ បន្ទប់រំលេចដោយពន្លឺភ្លើងពណ៌ស្វាយដ៏ស្រទន់ បរិយាកាសនៅទីនោះផ្ទុយស្រឡះពីកាប៊ីនពណ៌សរបស់ក្រុមហ៊ុនគូប្រជែង។
ការភ្ជាប់ប្រព័ន្ធអ៊ីនធឺណិត WiFi និងបារ៍បម្រើភេសជ្ជៈនៅបរិវណ «Space Lounge» ខាងក្នុងកាប៊ីន Neptune របស់ក្រុមហ៊ុន។
បាឡុងស្ថិតនៅរយៈកម្ពស់ ៣០ គីឡូម៉ែត្រ នៅទាបជាងសមត្ថភាពយានអវកាសរបស់គូប្រជែង Virgin Galactic ដែលហោះកម្ពស់ ៨០ គីឡូម៉ែត្រ ឬ Blue Origin ដែលឆ្លងខ្សែបន្ទាត់ Karman Line នៅរយៈកម្ពស់ ១០០ គីឡូម៉ែត្រ ជាព្រំដែនអវកាសទទួលស្គាល់ជាអន្ដរជាតិ។
បាឡុងហោះក្នុងល្បឿន ១៩ គីឡូម៉ែត្រដល់កម្ពស់ ៣០ គីឡូម៉ែត្រ ខណៈកម្ពស់កម្រិតការហោះហើររបស់យន្ដហោះពាណិជ្ជកម្មត្រឹមកម្ពស់ ១០ គីឡូម៉ែត្រប៉ុណ្ណោះ។
សហស្ថាបនិក Jayne Poynter បានប្រាប់ AFP ថា៖ «យើងមានស្ថិតនៅខ្ពស់ជាងបរិយាកាសនៃភពផែនដី ៩៩ ភាគរយ ដែលមានន័យថា អ្នកដំណើរនឹងមើលឃើញបរិយាកាសពណ៌ខ្មៅនៃអវកាស»៕ AFP/HR