កំពត៖ Climbodia គឺជាកីឡាទេសចរណ៍ឡើងភ្នំដ៏ព្រឺព្រួច ដែលភ្ញៀវទេសចរ អាចមកកម្សាន្ត ជម្រុះការភ័យខ្លាច បណ្តុះចិត្តក្លាហាន និងភ្លក្សពិសោធន៍ថ្មីៗផ្សងព្រេងក្នុងរូងភ្នំ ទស្សនាទិដ្ឋភាពដ៏ស្រស់ស្អាតប្លែកភ្នែក និងកម្របានជួបដូចជា ថ្មដុះ ថ្មរូបសត្វ សំណង់ប្រាង្គប្រាសាទបែកបាក់ ទីសក្ការៈបូជា រុក្ខជាតិដុះព័ទ្ធផ្ទាំងថ្មដា និងទិដ្ឋភាពខេត្តកំពតទាំងមូល ពីលើកំពូលភ្នំ។
លោក អោក សីហា អ្នកចាត់ការទូទៅរបស់ Climbodia បានប្រាប់ភ្នំពេញប៉ុស្តិ៍ ពីមូលហេតុនៃការបង្កើតកីឡាទេសចរណ៍ឡើងភ្នំនេះថា៖ «ដំបូងមេខ្ញុំ គាត់ជាជនបរទេស មកដើរលេងនៅខ្មែរ គាត់បានមកលេងនៅរួងភ្នំបុរេប្រវត្តិក្បាលរមាសនេះ ពេលនោះគាត់បានឃើញភ្នំនេះមានលក្ខណៈល្អ បែបធម្មជាតិ ត្រូវជាមួយកីឡាឡើងភ្នំ ដែលកីឡានេះនៅប្រទេសផ្សេងក្នុងពិភពលោកគេស្គាល់ ហើយគេចួលចិត្តណាស់ អញ្ចឹងគាត់មានគំនិតមួយបង្កើតកីឡាទេសចរណ៍ឡើងភ្នំនេះ ព្រោះវាថ្មីប្លែក អត់ទាន់មានទេនៅកំពត ស្របពេលដែលកំពតមានតំបន់ទេសចរកម្សាន្តជាច្រើន»។
អ្នកចាត់ការវ័យ ២៥ ឆ្នាំរូបនេះ បានឲ្យដឹងពីប្រវត្តិភ្នំបុរេប្រវត្តិក្បាលរមាសថា បើតាមចាស់ៗនិយាយប្រាប់ថា កន្លែងនេះជាតំបន់សមរភូមិ ចំណែកភ្នំនេះជាកន្លែងលាក់កាំភ្លើងធំ ហើយប្រជាជនមួយចំនួនបានភាសខ្លួន ឬ លាក់ខ្លួនមកនៅក្នុងរូងភ្នំនេះ ដើម្បីរកទៅកន្លែងសុវត្ថិភាព ព្រោះទីតាំងនេះនៅជិតបន្ទាយខ្មែរក្រហម ប៉ុន្តែបច្ចុប្បន្នទីនេះ បានប្រែក្លាយជាទីកម្សាន្តសម្រាប់ប្រជាជនខ្មែរ និងបរទេសដែលខុសឆ្ងាយកាលពីមុន។
អ្នកចាត់ការទូទៅសម្បុរស្រអែមរួបនេះ បន្តថា Climbodia បង្កើតនៅក្នុងឆ្នាំ ២០១៣ និងដាក់ឈ្មោះថា Climbodia បែបនេះ ព្រោះចង់បង្ហាញថា កីឡាឡើងភ្នំនេះ ស្ថិតនៅក្នុងប្រទេសកម្ពុជា។ ចំណែកភ្នំនេះមានលក្ខណៈពិសេស ដោយសារជាភ្នំកំបោរ និង មានជាតិទឹក ដែលត្រូវជាមួយកីឡាឡើងភ្នំ ព្រោះថ្មកំបោរ ងាយស្រួលក្នុងការរៀបចំបំពាក់ឧបករណ៍នៃការឡើងភ្នំ ប្រកបដោយសុវត្ថិភាព និងរឹងមាំ ដែលខុសពីប្រភេទថ្មដ៏ទៃដែលស្រួយ និងមិនមានសុវត្ថិភាព។
បង្កើតឡើងដំបូង Climbodia មានសមាជិកតែ ២ នាក់ប៉ុណ្ណោះ ដោយត្រូវសហការគ្នារៀបចំបំពាក់ឧបករណ៍ ក៏ដូចជាខ្សែកាបជាប់ទៅនឹងភ្នំ និងត្រូវពិនិត្យមើលការខុសត្រូវដើម្បីធានាសុវត្ថិភាព និងត្រូវផ្សព្វផ្សាយកីឡាថ្មីមួយនេះ ឲ្យភ្ញៀវទេសចរបានដឹង បានស្គាល់។
លោក សីហា រំលឹកពីការរៀនឡើងភ្នំដំបូងថា៖ «ខ្ញុំក៏អត់ចេះឡើងភ្នំទេ តែមេខ្ញុំ គាត់បង្រៀន ឲ្យឡើងដើមឈើ បន្ទាប់មកគាត់ឲ្យខ្ញុំរៀនឡើងភ្នំតែម្តង ខ្ញុំឡើងទាំងភ័យផង ខ្លាចផង ហើយជាពិសេសពេលទម្លាក់ខ្លួនមក ចង់យំផង ស្រែកផងទៀត តែយូរៗទៅលែងខ្លាច ហើយឡើងភ្នំសប្បាយណាស់។ បើកដំណើរការបាន ៣ ឆ្នាំដំបូង អត់សូវមានភ្ញៀវទេ មានអ្នកស្គាល់ពីកីឡាឡើងភ្នំនេះតិចតួចណាស់ តែទើបប៉ុន្មានឆ្នាំនេះភ្ញៀវចាប់ផ្តើមស្គាល់ និងចាប់អារម្មណ៍មកលេងច្រើន ដោយសារតែមានការផ្សព្វផ្សាយតាមស្ទីកគ័រ បណ្តាញសង្គម និងហ្វេសប៊ុក»។
ឧបករណ៍ដែលបំពាក់លើផ្ទាំងថ្ម និងសម្រាប់ប្រើប្រាស់ក្នុងការឡើងភ្នំ សុទ្ធសឹងជាផលិតផលរបស់ប្រទេសបារាំង ដែលមានគុណភាពខ្ពស់ និងសុវត្ថិភាព បន្ថែមពីអ្នកក្រុមការរបស់ Climbodia តែងតែធ្វើការពិនិត្យមើលឧបករណ៍ទាំងនេះយ៉ាងហ្មត់ចត់ មុននឹងធ្វើការឡើង ដើម្បីប្រាកដថា គ្មានបញ្ហា ឬ ឧបសគ្គ និងធានាសុវត្ថិភាពជូនដល់ភ្ញៀវទេសចរ។
Climbodia មានសេវាកម្មសម្រាប់អ្នកឡើងភ្នំដូចជា The Discovery Tour តម្លៃ ៤០ដុល្លារ Khmer highlight Tour តម្លៃ ២៥ ដុល្លារ Initiation Climbing តម្លៃ ២៥ ដុល្លារ Rock Climbing តម្លៃ ៤០ ដុល្លារ The Mix តម្លៃ ៤០ ដុល្លារ និង lead climbing course តម្លៃ ៤៥ ដុល្លារ។
សេវាឡើងភ្នំកម្សាន្តរួមមាន ការឡើងភ្នំដែលមានខ្សែពួរជំនួយកម្ពស់ ៣០ ម៉ែត្រ ការឡើងភ្នំដោយប្រើខ្សែកាបកិប ការទម្លាក់ខ្លួនចុះមកដីពីលើភ្នំដោយប្រើខ្សែពួរ និងខ្សែកាបកិប ការកម្សាន្តក្នុងរួងភ្នំ និងការឡើងភ្នំដោយប្រើខ្សែកាបកិប និង សេវាកម្មបង្រៀនជំនាញឡើងភ្នំ។ កញ្ចប់សេវាកម្មនីមួយៗ បានបែងចែកពីការកម្សាន្ត និងចំនួនពេលវេលាខុសគ្នា អាស្រ័យលើការជ្រើសរើសកញ្ចប់សេវារបស់ភ្ញៀវ។
លោក សីហា និយាយថា៖ «មុននឹងឲ្យភ្ញៀវឡើងភ្នំ ក្រុមការងារខ្ញុំ ពន្យល់ភ្ញៀវពីរបៀបប្រើប្រាស់ឧបករណ៍ ដើម្បីធានាសុវត្ថិភាព ហើយពេលឡើងភ្នំ យើងក៏នៅជាមួយពួកគាត់ដែរ ដើម្បីមើលការខុសត្រូវ ជាពិសេស យើងលើកទឹកចិត្តពួកគាត់ឲ្យក្លាហាន ព្រោះអ្នកខ្លះខ្លាច ខ្លះភ័យ តែពេលគាត់អាចធ្វើបាន គាត់សប្បាយចិត្ត គាត់មិននឹកស្មានថា គាត់អាចធ្វើបាន អាចតាំងពីដំណើរមកអត់ដែលមានបញ្ហាទេ ហើយម៉្យាងទៀតពេលឡើងមកដល់លើភ្នំ យើងរៀបរាប់ពីទីតាំងស្អាតៗ ហើយភ្ញៀវអាចថតរូប ឬវីដេអូទុកជាអនុស្សាវរីយ៍បានទៀត»។
សីហា បន្ថែមថា៖ ការកម្សាន្តមួយបែបទៀតដែលភ្ញៀវចូលចិត្ត គឺការកម្សាន្តក្នុងរូងភ្នំ ដែលជាទីតាំងពិសេស និងសម្បូរទៅដោយទេសភាព និងទិដ្ឋភាពស្អាតៗ ដូចជា ថ្មដុះ ថ្មសើម ថ្មរូបសត្វ សំណង់ប្រាង្គប្រាសាទបែកបាក់ ទីសក្ការៈបូជាស័ក្កសិទ្ធ ផ្ការាំទឹករាំដ៏កម្របានឃើញ វល្លិ៍ឈើចាក់ឬសពីលើកំពូលភ្នំចុះមកដី ការដើររុកតាមរូងភ្នំតូចធំ ត្រជាក់កាយ និងការឡើងតាមរួងទៅកាន់កំពូលភ្នំម្តងទៀតដែលអាចមើលឃើញភ្នំបូកគោក កោះត្រល់ ស្រែអំបិល វាលស្រែស្អាតៗ និងសមុទ្រខេត្តកែប។
អ្នកចាត់ការរូបនេះ បានបញ្ជាក់ថា៖ «ខ្ញុំស្គាល់ទីតាំងរូងភ្នំនេះ ដោយសារខ្ញុំរស់នៅម្តុំនេះស្រាប់ ហើយកាលពីក្មេង ខ្ញុំចេញពីរៀន គឺដឹងតែមកតាមបងៗ ដែលជាអ្នកនាំភ្ញៀវ ហើយពួកគាត់ប្រាប់ខ្ញុំថា កន្លែងនេះគេហៅអី កន្លែងនោះគេហៅអី ក្នុងហ្នឹងមានអីខ្លះ តែខ្ញុំក៏អត់ស្គាល់រូងទាំងអស់ក្នុងហ្នឹង ទាំងអស់ដែរ ស្គាល់តែកន្លែងបងៗ និងចាស់ៗប្រាប់ទេ ហើយខ្ញុំក៏អត់ហានទៅដែរ ព្រោះជំនឿខ្មែរយើងខ្លាចប៉ះពាល់ដល់អ្នកតា ឬសត្វអីចឹង ហើយក្រោយមកខ្ញុំក៏បានធ្វើជាអ្នកនាំភ្ញៀវនៅទីនេះ តាំងពីក្មេង គ្រាន់បានលុយទៅរៀនដែរ រហូតបានជួបមេ បានធ្វើជាអ្នកនាំភ្ញៀវប្រចាំ Climbodia នេះតែម្តង»។
ភ្នំក្បាលរមាសមានប្រវែង ២ គីឡូម៉ែត្រ ដោយត្រូវបានវាស់ដោយជនជាតិអាល្លឺម៉ង់ម្នាក់ជាអ្នកជំនាញខាងដើរតាមរូងភ្នំ និងបានធ្វើផែនទីសម្រាប់ Climbodia ផងដែរ ប៉ុន្តែការកម្សាន្តរបស់កីឡាឡើងភ្នំមានត្រឹមតែ ១ គីឡូម៉ែត្រតែប៉ុណ្ណោះ។
Climbodia ស្ថិតនៅភ្នំបុរេប្រវត្តិក្បាលរមាស ភូមិត្រពាំងព្រីង ឃុំត្រពាំងព្រីង ស្រុកទឹកឈូ ខេត្តកំពត។ ទំនាក់ទំនងទូរស័ព្ទ៖ ០៧០ ២៥ ៥២ ១០/ ០៩៦ ៩៨ ៦៤ ០២១ ឬ ហ្វេសប៊ុក៖ Climbodia និង Email: www.climbodia.com ៕
