លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ពិនិត្យមើលស្លាកលេខពិសេសផ្ទាល់ខ្លួននាពេលកន្លងមក។ រូប ក្រសួងសាធារណការ
ភ្នំពេញៈ ចាប់ពីថ្ងៃទី ៧ ខែមករា រហូតដល់ថ្ងៃទី ៤ ខែកុម្ភៈក្រសួងសាធារណការបានលក់ស្លាកលេខពិសេសផ្ទាល់ខ្លួនសម្រាប់រថយន្តដល់ប្រជាពលរដ្ឋនៅភ្នំពេញ និងតាមបណ្ដាខេត្ដមួយចំនួនបានចំនួន ៤៦៨ ស្លាក គិតជាប្រាក់បានប្រមាណ ២ លានដុល្លារ។ នេះបើតាមលោក ឈួន វន់ អគ្គនាយកដឹកជញ្ជូនផ្លូវគោក និងជាអ្នកនាំពាក្យក្រសួងសាធារណការ និងដឹកជញ្ជូន។
លោក ឈួន វន់ បានថ្លែងកាលពីថ្ងៃពុធថា ចាប់តាំងពីថ្ងៃបើកដំណើរការលក់ស្លាកលេខពិសេសផ្ទាល់ខ្លួនជូនប្រជាពលរដ្ឋដំបូងនៅពីថ្ងៃទី ៧ ខែមករា រហូតដល់ថ្ងៃទី ៤ ខែកុម្ភៈ ពលរដ្ឋដែលចង់បានលេខពិសេសផ្ទាល់ខ្លួនភាគច្រើននៅរាជធានីភ្នំពេញ និងមួយចំនួនមកពីតាមបណ្ដាខេត្ដបាននាំគ្នាមកទិញស្លាកលេខផ្ទាល់ខ្លួនជាបន្ដបន្ទាប់នៅអគ្គនាយកដ្ឋានដឹកជញ្ជូននៃក្រសួងសាធារណការ និងដឹកជញ្ជូន។
លោកថ្លែងថា៖ «នេះជាផ្នែកមួយនៃការបង្កើនថវិកាជូនជាតិ ហើយអ្វីដែលសំខាន់នោះគឺយើងគិតពីតម្រូវការរបស់បងប្អូនប្រជាពលរដ្ឋតែម្ដង បើគាត់ចង់បានស្លាកលេខដែលអាចដាក់ឈ្មោះបាន ឬចង់ដាក់អក្សរ និងលេខផ្ទាល់ខ្លួនក៏បានគឺតម្រូវតាមដែលគាត់ចង់បាន ដោយអាចរក្សាលេខពិសេសនេះទុកប្រើជារៀងរហូតបាន»។
.jpg)
លោក វន់ ឲ្យដឹងថា ពលរដ្ឋអាចទិញស្លាកលេខពិសេសផ្ទាល់ខ្លួនក្នុងតម្លៃទាបបំផុតចាប់ពី ២ លានរៀលឡើងទៅ ខណៈបើជ្រើសយកលេខពិសេសដែលមានលេចតិច ឬខ្លីនឹងមានតម្លៃថ្លៃ ហើយលេខពិសេសដែលមានលេខ ឬអក្សរវែងគឺមានតម្លៃធូរថ្លៃស្របពេលដែលក្រសួងបានកំណត់លេខ ឬអក្សរវែងបំផុតគឺត្រឹម ៨ ខ្ទង់ប៉ុណ្ណោះ។
ស្លាកលេខគំរូ ផ្ទាល់ខ្លួនពិសេសដែលត្រូវបានបង្ហាញនៅក្នុងពិធីប្រកាសលក់ស្លាកលេខនេះកាលពីថ្ងៃទី ៧ ខែមករា។ រូបថត MPWT
ក្រសួងសាធារណការកាលពីថ្ងៃទី ៦ ខែមករា ឆ្នាំ ២០២០ បានប្រកាសការដាក់ដំណើរការជាផ្លូវការ «ការលក់លេខចុះបញ្ជីពិសេសផ្ទាល់ខ្លួនសម្រាប់រថយន្ត» ក្រោយទទួលបានការអនុញ្ញាតពីលោកនាយករដ្ឋមន្ដ្រី ហ៊ុន សែន។
ក្រសួងបញ្ជាក់ថា ការលក់ស្លាកលេខចុះបញ្ជីពិសេសនេះអនុញ្ញាតឲ្យសាធារណជន និងក្រុមហ៊ុនសហគ្រាសដែលជាម្ចាស់រថយន្តទាំងអស់អាចធ្វើការស្វែងរកលេខដែលខ្លួនពេញចិត្ដរួចធ្វើការទិញស្នើទិញ ឬដេញថ្លៃតាមរយៈប្រព័ន្ធស្វ័យប្រវត្ដិកម្មចុះបញ្ជីយានយន្តរបស់ក្រសួង ខណៈប្រព័ន្ធស្វ័យប្រវត្ដិកម្មនេះក៏នឹងអនុញ្ញាតឲ្យម្ចាស់រថយន្តធ្វើការដាក់ពាក្យត្រួតពិនិត្យលក្ខណៈបច្ចេកទេស និងចុះបញ្ជីរថយន្ត អនឡាញ (Online) ដោយខ្លួនឯងតាមរយៈវេបសាយរបស់ក្រសួងផងដែរ។
កាលពីថ្ងៃទី ២៤ ខែធ្នូ ឆ្នាំ ២០១៩ រដ្ឋមន្ដ្រីក្រសួង សេដ្ឋកិច្ច និងហិរញ្ញវត្ថុ និងរដ្ឋមន្ដ្រីក្រសួងសាធារណការ និងដឹកជញ្ជូនបានចេញសេចក្ដីប្រកាសអន្តរក្រសួងស្ដីពីការលក់ស្លាកលេខចុះបញ្ជីពិសេសផ្ទាល់ខ្លួនសម្រាប់រថយន្តនេះ ដោយបានសម្រេចអនុញ្ញាតឲ្យអគ្គនាយកដ្ឋានដឹកជញ្ជូនផ្លូវគោកនៃក្រសួងសាធារណការ ប្រមូលចំណូលពីការលក់ស្លាកលេខចុះបញ្ជីពិសេសផ្ទាល់ខ្លួនសម្រាប់រថយន្តដើម្បីប្រមូលប្រាក់ចូលថវិកាជាតិ។
សេចក្ដីប្រកាសនេះបញ្ជាក់ថា ស្លាកលេខចុះបញ្ជីពិសេសផ្ទាល់ខ្លួនសំដៅលើប្រភេទលេខចុះបញ្ជីដែលផ្នែកខាងលើសរសេរអក្សរខ្មែរ «កម្ពុជា» ផ្នែកកណ្ដាលជាលេខចុះបញ្ជីមានលេខ ឬអក្សរឡាតាំងមិនលើសពី ៨ ខ្ទង់ និងផ្នែកខាងក្រោមសរសេរអក្សរឡាតាំង «CAMBODIA» នៅបន្ទាត់ផ្ដេក៕
