ក្រុងប៉េកាំង៖ ប្រធានក្រុមអ្នករៀបចំព្រឹត្តិការណ៍កីឡាអូឡាំពិករដូវរងា ឆ្នាំ ២០២២ នាទីក្រុងប៉េកាំង របស់ប្រទេស ចិន បាននិយាយថា ពួកគេកំពុងតែប្រឈមជាមួយនឹងស្ថានការណ៍ដ៏ពិសេស ក្រោយពីមានការពន្យារពេលសម្រាប់កីឡាអូឡាំពិករដូវក្តៅ ឆ្នាំ ២០២០ នៅទីក្រុងតូក្យូ ប្រទេស ជប៉ុន ដែលមានន័យថា វាមានរយៈពេលឃ្លាតគ្នាតិចជាង ៦ ខែ រវាងការប្រកួតកីឡារដូវក្ដៅ និងរងា។
ដូចគ្រប់គ្នាបានដឹងហើយថា កីឡាអូឡាំពិក ឆ្នាំ ២០២០ នេះ ក្រុងតូក្យូរបស់ប្រទេស ជប៉ុន ជាអ្នកដេញថ្លៃបានសិទ្ធិធ្វើជាម្ចាស់ផ្ទះ ហើយដំបូងឡើយ ត្រៀមរៀបចំពីថ្ងៃទី ២៤ ខែកក្កដា ដល់ថ្ងៃទី ៩ ខែសីហា ឆ្នាំ ២០២០ តែត្រូវប្ដូរទៅនៅឆ្នាំ ២០២១ វិញ ដោយសារការរាលដាលនៃវីរុសកូរ៉ូណា គឺពន្យារពេល ១ ឆ្នាំពេញ។
ទោះជាយ៉ាងណាក៏ដោយ ដោយសារតែព្រឹត្តិការណ៍អូឡាំពិក រដូវរងា ក្នុងឆ្នាំ ២០២២ នាទីក្រុងប៉េកាំង ចាប់ផ្ដើមនៅថ្ងៃទី ៤ ខែ កុម្ភៈ ឆ្នាំ ២០២២ គឺបានធ្វើឲ្យមានបញ្ហាប្រឈមដ៏កម្រនៃការប្រកួតប្រជែងកីឡាអូឡាំពិក ដែលកើតឡើងបន្តបន្ទាប់គ្នាយ៉ាងកៀកបំផុត។
តំណាងឲ្យក្រុមមន្ត្រីអ្នករៀបចំព្រឹត្តិការណ៍អូឡាំពិក Beijing- 2022 បានប្រាប់ទីភ្នាក់ងារព័ត៌មាន Xinhua ថា៖ «ការកំណត់កាលបរិច្ឆេទថ្មី សម្រាប់កីឡាអូឡាំពិក និងប៉ារ៉ាឡាំពិក នាទីក្រុងតូក្យូ ធ្វើឲ្យពួកយើង ត្រូវប្រឈមជាមួយនឹងស្ថានការណ៍ពិសេសមួយ ដោយការប្រកួតកីឡា សម្រាប់រដូវក្ដៅ និងរងា ត្រូវបានរៀបចំឡើងមានគម្លាតពីគ្នាតែកន្លះឆ្នាំប៉ុណ្ណោះ»។
មន្ត្រីតំណាងរូបនោះ បាននិយាយបន្តថា៖ «យើងនឹងធ្វើការវាយតម្លៃលម្អិតថ្មីពីការកំណត់កាលវេលាថ្មីសម្រាប់ព្រឹត្តិការណ៍កីឡា Tokyo 2020 ថាតើនឹងជះឥទ្ធិពលបែបណាខ្លះដល់ Beijing 2022 Games។ ពេលនេះ យើងនឹងបន្តមានទំនាក់ទំនងយ៉ាងជិតដិត ជាមួយគណៈកម្មាធិការកីឡាអូឡាំពិកអន្តរជាតិ (IOC) និងគ្រួសារកីឡាអូឡាំពិក ដើម្បីដោះស្រាយស្ថានការណ៍នេះឲ្យបានត្រឹមត្រូវ និងបន្តគម្រោងរៀបចំគ្រប់រូបភាពទាំងអស់»។
ប្រទេស ចិន ដែលមានលេចឡើងនូវវីរុសកូរ៉ូណា កាលពីខែធ្នូ បាននិយាយថា ការរៀបចំត្រៀមសម្រាប់ឆ្នាំ ២០២២ កំពុងគ្រោង បើទោះបីជាមានប្រទេសជាច្រើន កំពុងបិទទ្វារតាំងពីខែកុម្ភៈមក ក្នុងគោលបំណងបញ្ឈប់ការរាលដាលនៃជំងឺនេះក៏ដោយ។ ក្រុងប៉េកាំង នឹងក្លាយជាទីក្រុងដំបូងគេ ដែលទទួលបានសិទ្ធិរៀបចំព្រឹត្តិការណ៍កីឡាអូឡាំពិក ទាំងរដូវក្ដៅ និងរងា បន្ទាប់ពីធ្លាប់ធ្វើជាម្ចាស់ផ្ទះម្ដងហើយ កាលពីឆ្នាំ ២០០៨៕ AFP/VN