ក្រុងលូសាន៖ ការជជែកគ្នាពីអនាគតនៃក្របខ័ណ្ឌ Champions League នៅតែបន្តធ្វើកាលពីថ្ងៃចន្ទ និងអង្គារ នៅពេលសមាគមក្លិបបាល់ទាត់អឺរ៉ុប (ECA) បានជួបប្រជុំគ្នានៅទីក្រុងហ្ស៊ឺណែវ ប្រទេស ស្វ៊ីស ខណៈថ្នាក់ដឹកនាំបានប្រឈមមុខដាក់គ្នាជាមួយសមាជិករបស់ខ្លួន។
សមាគម ECA ដឹកនាំដោយប្រធានក្លិប Juventus លោក Andrea Agnelli បានគាំទ្រពេញទំហឹងចំពោះការផ្លាស់ប្ដូរទម្រង់ប្រកួតតាមក្លិបសំខាន់ៗនៅតំបន់អឺរ៉ុបចាប់ពីឆ្នាំ ២០២៤ តទៅ។
សំណើនេះត្រូវបានបង្កើតឡើងដោយសហភាពនៃសមាគមបាល់ទាត់អឺរ៉ុប (UEFA) កាលពីខែឧសភា ប៉ុន្តែព័ត៌មានលម្អិតទើបតែលេចឮនៅពេលថ្មីៗនេះប៉ុណ្ណោះ។
កំណែទម្រង់នេះរួមមានការបង្កើតការប្រកួតចុងសប្ដាហ៍ ៤ ក្រុមក្នុងចំណោម ៨ ក្រុម និងប្រព័ន្ធដែលកាត់ចេញ និងចេញផុតពីបាតតារាងដែលនឹងធ្វើឲ្យក្រុមកំពូលទាំង ៦ អាចមានឱកាសជាស្វ័យប្រវត្តិសម្រាប់ការប្រកួតតាមឆ្នាំជាបន្តបន្ទាប់។
សមាគម ECA មាន «សមាជិកជាង ២៣០ ក្លិប» នោះ បានប្រឈមនឹងការរិះគន់ពីសមាជិកក្លិប និងលីកជាតិជាច្រើន ដែលនឹងរងគ្រោះដោយសារកំណែទម្រង់ថ្មីនេះ។
លោក Javier Tebas ប្រធានក្របខ័ណ្ឌ La Liga បាននិយាយថា៖ «លីកដែលមានការប្រកួតច្រើននោះបានគំរាមកំហែងដល់លីកអេស្ប៉ាញនេះយ៉ាងខ្លាំង»។
ក្របខ័ណ្ឌ Premier League របស់អង់គ្លេសបានចេញរបាយការណ៍និយាយថា៖ «ការប្រកួតក្នុងស្រុកគួរតែបន្តជាអាទិភាពសម្រាប់ក្លិបវិជ្ជាជីវៈមួយចំនួន»។
ក្រុមក្លិបជំទាស់បាននិយាយថា ផែនការនេះត្រូវបានបង្កើតឡើងដើម្បីធានាឲ្យមានប្រាក់ចំណូលកាន់តែច្រើនសម្រាប់ក្លិបធំៗមួយចំនួន។
លោក Wanja Greuel ប្រធានក្លិប Young Boys of Berne ជាម្ចាស់ជើងឯកប្រទេស ស្វ៊ីស បាននិយាយថា៖ «កំណែទម្រង់នេះនឹងធ្វើឲ្យប៉ះពាល់ជាពិសេសដល់ក្លិបតូច និងមធ្យមតែម្ដង»។
លោក Greuel បានបន្ថែមថា៖ «វានឹងបំបាត់ឱកាសឡើងដល់កម្រិតកំពូលនៃការប្រកួតអឺរ៉ុបតាមរយៈលីកក្នុងស្រុក ហើយអ្នកគាំទ្រនឹងបាត់ទំនុកចិត្តបន្តិចម្ដងៗទៅលើលីកក្នុងស្រុក ហើយលីកទាំងនោះនឹងបាត់បង់សេដ្ឋកិច្ចថែមទៀត»។
កាលពីខែមុន សហភាព UEFA បានប្រកាសថា ខ្លួននឹងលុបចោលកិច្ចប្រជុំជាមួយសមាគម ECA និងលីកអឺរ៉ុបដែលជាស្ថាប័នធំមួយតំណាងឲ្យក្លិបអឺរ៉ុបជាង ៩០០ ក្លិប ដែលគ្រោងនឹងធ្វើនៅថ្ងៃទី ១១ ខែ កញ្ញា នេះ។
ប្រធានសហភាព UEFA លោក Aleksander Ceferin បាននិយាយថា គាត់ចង់ «ប្រមូលមតិរិះគន់» ពី សហព័ន្ធសមាជិកទាំងអស់។
លោក Bernard Caiazzo ប្រធានក្លិប Saint Etienne លេងនៅក្របខ័ណ្ឌបារាំង Ligue 1 ដែលជំទាស់នឹងផែនការនេះបាននិយាយថា ការលុបចោលកិច្ចប្រជុំនេះ «បានបង្ហាញឲ្យឃើញពីការជំទាស់ជាខ្លាំង»។
លោក Caiazzo បានបញ្ជាក់ថា៖ «នៅពេលអ្នកបិទការប្រកួតក្របខ័ណ្ឌកំពូលរហូតដល់ ៩០ ភាគរយ អ្នកនឹងសម្លាប់ក្ដីសុបិនសម្រាប់ក្លិបមធ្យមដែលឡើងដល់ការប្រកួតនេះ»។
លោក Michele Centenaro អគ្គលេខាធិការសមាគម ECA បាននិយាយថា៖ «យើងត្រូវពិចារណាចំពោះមតិរិះគន់របស់ក្លិបព្រោះគេត្រូវតែការពារលីកក្នុងស្រុក ហើយយើងត្រូវតែព្យាយាមផ្ដល់ពានរង្វាន់អឺរ៉ុបឲ្យកាន់តែប្រសើរជាងមុន»។
នាយករៀបចំការប្រកួតរបស់សហភាព UEFA លោក Giorgio Marchetti បាននិយាយថា គ្មានការរងសម្ពាធឲ្យធ្វើការសម្រេចចិត្តនោះទេ ហើយការពិភាក្សានឹងបន្តធ្វើរហូតចូលដល់ឆ្នាំ ២០២០៕ AFP/SN