Luis Suarez លោតទៅគ្រប់គ្រងបាល់ពីការរារាំងរបស់ខ្សែការពារ Lindelof ហើយគេជាកីឡាករដ៏សំខាន់ជួយឲ្យក្រុម Barcelona ឈ្នះ Man United ១-០។ AFP
.jpg)
អង់គ្លេសៈ លោក Ole Gunnar Solskjaer គ្រូបង្វឹកក្លិប Man United បាននិយាយថា ក្រុម Manchester United ប្រឈមនឹងភារកិច្ចកាន់តែធ្ងន់ឡើង ក្នុងការតាមយកឈ្នះក្រុម Barcelona វិញ បន្ទាប់ពីពួកគេបានចាញ់ក្រុមអ្នកមានបុណ្យមួយនេះ ១-០ ក្នុងការប្រកួតជើងទី ១ វគ្គ ៨ ក្រុមចុងក្រោយពាន Champion League កាលពីរាត្រីថ្ងៃពុធ ហើយលោកបានចាត់ទុកជំនួបនេះជាការប្រកួតដែលមានការលំបាកជាងការយកឈ្នះដោយជោគជ័យនៅក្រៅទឹកដីជាមួយក្រុម PSG ក្នុងវគ្គ ១៦ ក្រុមចុងក្រោយកន្លងមក។
ក្រុម Man United គឺជាក្រុមទី ១ ហើយដែលបានយកឈ្នះលើគូប្រកួតខ្លួនវិញ គឺ PSG នៅក្រៅទឹកដីក្នុងលទ្ធផល ៣-១ នៅទីក្រុងប៉ារីសកាលខែមុន ដើម្បីលុបចោលការចាញ់ ២-០ ក្នុងការប្រកួតជើងទី ១ នៅក្នុងទឹកដីខ្លួនឯង និងបានឡើងកាន់វគ្គ ៨ ក្រុមចុងក្រោយនេះ។
ប៉ុន្តែលោក Solskjaer ដែលធ្លាប់បានជួយក្រុម Man United លើកពាន Champions League នៅកីឡដ្ឋាន Camp Nou នៅឆ្នាំ ១៩៩៩ នោះគិតថាការប៉ះជាមួយម្ចាស់ជើងឯងអេស្ប៉ាញ Barcelona នៅក្រៅទឹកដីខ្លួនខាងមុខនោះគឺលំបាកជាងការជួបជាមួយក្រុម PSG ទៅទៀត ព្រោះក្រុមនេះមានប្រវត្តិលើកពាននៅអឺរ៉ុបជាច្រើនសម័យកាល។
លោក Solskjaer បាននិយាយថា៖ «ជាការពិតទម្រង់លេងរបស់ក្រុម PSG នៅក្រៅទឹកដីធ្វើឲ្យយើងសង្ឃឹម និងជឿថាយើងអាចយកឈ្នះវិញបាន ប៉ុន្តែពេលនេះយើងដឹងថា យើងនឹងលេងជាមួយក្រុមល្បីឈ្មោះមួយសម្រាប់ការប្រកួតនេះ។ ទោះបីជាយ៉ាងណាវានឹងកាន់តែប្រសើរឡើងថែមទៀតបើយើងឈ្នះក្រុម Barcelona ដែលមានប្រវត្តិដ៏អស្ចារ្យមួយនេះ ព្រោះពួកគេមិនធ្លាប់ចាញ់នៅក្នុងទឹកដីខ្លួននោះទេ»។
ជោគជ័យរបស់ក្រុម Barcelona ដែលបានកើតឡើងនៅពេលខ្សែការពារ Luke Shaw ភ្លាត់ធ្វើឲ្យបាល់ចូលទីខ្លួនឯងនៅនាទីទី ១២ នោះបានធ្វើឲ្យក្រុមនេះមានក្ដីសង្ឃឹមកាន់តែខ្លាំងឡើងក្នុងការបន្តទៅវគ្គពាក់កណ្ដាលផ្ដាច់ព្រ័ត្រ ក្នុងរយៈពេល ៤ ឆ្នាំជាប់គ្នា ខណៈក្រុម Man United មិនធ្លាប់មានប្រវត្តិបែបនេះនោះទេ។
លោក Ernesto Valverde គ្រូបង្វឹកក្រុម Barcelona បាននិយាយថា៖ «វាធ្វើឲ្យមានរសជាតិឆ្ងាញ់នៅក្នុងមាត់ដែលបានឈ្នះនៅទីនេះ ប៉ុន្តែយើងដឹងថាវាមិនមែនជាគ្រាប់បាល់ដ៏ធំមួយសម្រាប់អ្វីដែលបានកើតឡើងចំពោះក្រុម Man United នៅក្នុងការប្រកួតចុងក្រោយនេះទេ»។
តាមពិតខ្សែប្រយុទ្ធ Suarez ជាអ្នកតែតបាល់នេះបញ្ចូលទី តែត្រូវបានអាជ្ញាកណ្ដាលចាត់ទុកថាជាការធ្វើឲ្យចូលទីខ្លួនរបស់ខ្សែការពារ Luke Shaw ព្រោះរូបគេបានប៉ះបាល់នេះបន្តិច មុនពេលចូលទី ហើយការកំណត់នេះជាហេតុធ្វើឲ្យកីឡាករសញ្ជាតិអ៊ុយរ៉ាហ្គាយ Suarez នៅតែមិនទាន់អាចរកគ្រាប់នៅក្រៅទឹកដីតាំងពីខែកញ្ញាឆ្នាំ ២០១៥ ប៉ុន្តែ Suarez នៅតែជាអ្នកនាំជ័យជម្នះដល់ក្រុម Barcelona។
លោក Valverde បាននិយាយជុំវិញលទ្ធផលនេះថា៖ «តម្លៃនៃការបញ្ចូលទីនេះគ្មានអ្វីផ្លាស់ប្ដូរទេ បើទោះជាមាន ឬគ្មានកីឡាករណាមួយមកប៉ះបាល់ចុងក្រោយក៏ដោយ។ វាពិបាកខ្លាំងណាស់នៅក្នុងវគ្គប្រកួតដណ្ដើមឡើងទៅកម្រិតខ្ពស់បំផុតនេះ ហើយដើម្បីឈ្នះនៅក្រៅទឹកដីនៅក្នុងក្របខ័ណ្ឌ Champions League នេះគឺអ្នកត្រូវរងគ្រោះបន្តិចហើយ»៕ SN
