វ៉ា ខ្វីនទីន អូសបាល់រំលង សុះ ស៊ូហាណា ពេលលេងឲ្យភ្នំពេញក្រោន តែលើកនេះ គេក៏មិនបានជួយណាហ្គាវើល។
.jpg)
ភ្នំពេញ៖ ក្រុមមិនទាន់ស្គាល់ការចាញ់ដូចគ្នា គឺណាហ្គាវើល និងភ្នំពេញក្រោន នឹងត្រូវវិលមកជួបគ្នានៅថ្ងៃអាទិត្យ ហើយនេះជាការប្រកួតដ៏ធំប្រចាំសប្តាហ៍ទី៧ នេះ ចំណែកលោក សុក វាសនា នឹងដឹកនាំក្រុមអាស៊ីអឺរ៉ុប ទៅជួបក្រុមកំពុងឈរនៅលើកំពូលតារាង ព្រះខ័នរាជស្វាយរៀង នៅថ្ងៃសៅរ៍ ទាំងមានទុក្ខជាប់ខ្លួន។
នៅក្នុងការប្រកួតដ៏សំខាន់ ជាមួយក្រុមទើបធ្លាក់មកឈរនៅលេខ ២ ភ្នំពេញក្រោន លើកនេះ ណាហ្គាវើល បានជួបក្តីកង្វល់ផងដែរ ខណៈកីឡាករជម្រើសដំបូងរហូតដល់ទៅ ៣ នាក់ សុទ្ធតែមិនអាចជួយក្រុមបាននោះ ក្នុងនោះខ្សែប្រយុទ្ធជប៉ុន Naruse Yuta នៅមានរបួសជាប់ខ្លួន ឯខ្សែប្រយុទ្ធ វ៉ា ខ្វីនទីន ដែលទើបចាកចេញពីភ្នំពេញក្រោន នៅឈឺត្រគាក ចំណែកខ្សែការពារកណ្តាល រៀម ស៊ឹង មានរបួសពេលហ្វឹកហាត់ ដេរអស់ ៥ ថ្នេរ។
លោក មាស ចាន់ណា គ្រូបង្វឹកក្រុមណាហ្គាវើលបានប្រាប់ថា៖ «ការត្រៀមលើកនេះ អាចពិបាកបន្តិច ព្រោះកីឡាកររបស់ខ្ញុំឈឺ ៣ នាក់ ហើយយើងក៏មានកីឡាករជំនួស ដែលមានកម្រិតលេងប្រហាក់ប្រហែលដែរ។ មួយវិញទៀត យើងមានតែមក្រោមគេដែរ ដោយសារយើងមានកីឡាករបរទេសតែ ៤ នាក់ទេ ហើយដល់ពេលឈឺ ១ យើងនៅសល់តែ ៣ នាក់ទេ លេងលើទីលាន»។
គ្រូបង្វឹករូបនេះ បានបន្ថែមថា៖ «បើសិនជាខ្ញុំអត់មានបាត់បង់កីឡាករទេនោះ ខ្ញុំអត់តានតឹងទេ ប៉ុន្តែដល់ពេលបាត់កម្លាំងសំខាន់ដល់តែ ៣ នាក់បែបនេះ វាអាចនឹងមានការតានតឹងដែរ។ ចំណែកការលេងរបស់ភ្នំពេញក្រោន នៅរដូវកាលនេះ មានការប្លែកដែរ ព្រោះពីមុនគាត់ចុះទៅការពារ ដើម្បីវាយបក តែពេលនេះគាត់ចាប់លេងពីលើមកវិញ គឺលេងប្រយុទ្ធច្រើន អ៊ីចឹងការលេងរបស់យើង អាចនឹងមានការប្រែប្រួល ទៅតាមស្ថានភាពជាក់ស្តែង»។
ចំណែកលោក ស៊ុំ វណ្ណា គ្រូបង្គោលក្រុមភ្នំពេញក្រោន មិនអាចសុំការពន្យល់ពីការរៀបចំក្រុម ដើម្បីត្រៀមជួបណាហ្គាវើល លើកនេះបានទេ ដោយលោកបានប្រាប់ថា លោកជាប់រវល់។ យ៉ាងណាក៏ដោយ ក្រុមភ្នំពេញក្រោន ដែលទើបធ្លាក់ពីកំពូលតារាង មកឈរនៅលេខ ២ មាន ១៤ ពិន្ទុ ក្រោយស្មើ ២-២ ជាមួយក្រុមវិសាខា កាលពីសប្តាហ៍មុននោះ ត្រូវការឈ្នះខ្លាំងបំផុត។
បើសិនជា ភ្នំពេញក្រោន ចាញ់ក្រុមណាហ្គាវើល លើកនេះ គឺពួកគេ អាចនឹងធ្លាក់ទៅឈរនៅលេខ ៤ ជាបន្តទៀត ព្រោះមិនមែនតែ ណាហ្គាវើល ទេ ដែលមាន ១១ ពិន្ទុ ប៉ុន្តែក្រុមកំពុងឈរនៅលេខ ៣ បឹងកេត ក៏មាន ១១ ពិន្ទុដែរ ហើយលើកនេះ បឹងកេត ក៏មានភាគរយខ្ពស់ក្នុងការឈ្នះ ៣ ពិន្ទុ ពីក្រុមគិរីវង់សុខសែនជ័យ ផងដែរ។
ដោយឡែក លោក សុក វាសនា ដែលមានទុក្ខក្រៀមក្រំ ព្រោះជីដូនលោកឈ្មោះ លឹម ហៀង បានទទួលអនិច្ចកម្មដោយរោគាពាធ ក្នុងអាយុ ៩៣ ឆ្នាំ ហើយបានបូជាកាលពីម្សិលមិញនោះ នឹងត្រូវដឹកនាំក្រុមអាស៊ីអឺរ៉ុប ទៅជួបក្រុមម្ចាស់ជើងឯក ស្វាយរៀង ខណៈការប្រកួតនេះ ស្វាយរៀង មានការជឿជាក់ខ្លាំង ក្នុងការឈ្នះ ៣ ពិន្ទុ ដើម្បីការពារទីតាំងលេខ ១ ដែលពួកគេ ទើបដណ្តើមមកវិញពីក្រុមភ្នំពេញក្រោន។
លោក ជូ សារឿន គ្រូជំនួយក្រុមស្វាយរៀងបានប្រាប់ថា៖ «ទិសដៅសំខាន់របស់យើង គឺត្រូវខំប្រឹងដណ្តើមឲ្យបាន ៣ ពិន្ទុ ពីក្រុមអាស៊ីអឺរ៉ុប ហើយខ្ញុំគិតថា យើងដូចជាមិនពិបាកក្នុងការសម្រេចទិសដៅនេះទេ ព្រោះក្រុមអាស៊ីអឺរ៉ុប ក៏មិនទាន់ស្ថិតនៅក្នុងក្រុមលំដាប់ ដែលយើងគិតថា លំបាកនោះទេ ប៉ុន្តែយើងក៏មិនមើលស្រាលទៅលើគូប្រកួតបាននោះទេ គឺយើងត្រូវលេងដោយប្រុងប្រយ័ត្ន»៕
កម្មវិធីប្រកួតនៅថ្ងៃសៅរ៍
-អង្គរថាយហ្គឺរ v យុវជនបាល់ទាត់បាទី កីឡ.អេសអយូ ៣:៣០
-ទ័ព v នគរបាលជាតិ កីឡដ្ឋានស្តាតចាស់ ៦:០០
-ស្វាយរៀង v អាស៊ីអឺរ៉ុប កីឡ.ខេត្តស្វាយរៀង ៦:០០
៣ ប្រកួត នៅថ្ងៃអាទិត្យ
-គិរីវង់ v បឹងកេត នៅកីឡដ្ឋានគិរីវង់សុខសែនជ័យ ៣:៣០
-វិសាខា v អគ្គិសនីកម្ពុជា កីឡដ្ឋានព្រីសន៍ ៦:០០
-ណាហ្គាវើល v ភ្នំពេញក្រោន កីឡដ្ឋានស្តាតចាស់ ៦:០០
