ភ្នំពេញ: ការប្រកួតវិលជុំសន្សំពិន្ទុខ្សែក្រវាត់ខារ៉ាបាវទម្ងន់ ៥៧ គីឡូក្រាមសង្វៀនអាស៊ីអាគ្នេយ៍នារសៀលថ្ងៃសៅរ៍ ទី ១៩ ខែមករា ឆ្នាំ ២០១៩ នឹងតម្រូវទៅលើកីឡាករវ័យក្មេងកម្ពុជា ២ នាក់រួមមាន លាភ រដ្ឋា មកពីក្លិបដីឡូត៍មានរិទ្ធខេត្តបន្ទាយមានជ័យ និង ធន់ មករា មកពីសមាគមប្រដាល់ក្រសួងការពារជាតិ ខណៈដែលកីឡាករទាំង ២ សុទ្ធតែមានជំនឿចិត្តឈ្នះថៃ ដើម្បីទទួលបាន ៣ ពិន្ទុក្នុងវគ្គជម្រុះលើកដំបូង។
ជាមួយគ្នានេះគ្រូបង្វឹករបស់ថៃ Dek Doeur ដែលជាកីឡាករចំណូលថ្មី មិនធ្លាប់ឃើញសមត្ថភាពប្រកួតនៅស្រុកខ្មែរនោះបានអះអាងថា កូនសិស្សលោកក៏នឹងយកឈ្នះឲ្យបានដូចគ្នា។
ទោះជាយ៉ាងណាកីឡាករកម្ពុជាវ័យក្មេងទាំង ២ សុទ្ធសឹងជាកីឡាករប្រដាល់ដែលមានទឹកចិត្តប្រកួតវាយមិនចេះដកថយ និងប្រកួតអស់ពីសមត្ថភាព ដែលអាចនឹងមានប្រៀបជាងកីឡាករថៃ។
ធន់ មករា នឹងត្រូវប៉ះជាមួយនឹងកីឡាករថៃ Banda Sak ចំណែកកីឡាករលាភ រដ្ឋា នឹងត្រូវជួបជាមួយ Dek Doeur។
ធន់ មករា ជាកីឡាករប្រដាល់មានកណ្ដាប់ដៃល្អ រហ័ស និងធ្ងន់ ខណៈស្នៀតជង្គង់ ទាត់ និង កែងរបស់គេក៏វាយបានយ៉ាងល្អគ្រប់ស្ថានភាពផងដែរ។ ចំណែកលាភ រដ្ឋា មានចិត្តធំ និងមិនញញើតដៃគូឡើយក្នុងពេលប្រកួត ហើយទោះចាញ់ក្នុងការប្រកួតក៏ចាញ់ក្នុងភាពស្វិតស្វាញផងដែរ។
បើតាមគណៈកម្មការផ្គូផ្គងប្រចាំសង្វៀនអាស៊ីអាគ្នេយ៍ កីឡាករ ធន់ មករា មានប្រវត្តិប្រកួតចំនួន ៥៣ លើក ឈ្នះ ៣៩ លើក ចាញ់ ១២ លើក និងស្មើពិន្ទុ ២ លើក។ ចំពោះកីឡាករប្រដាល់ថៃ Banda Sak មានប្រវត្តិប្រកួតបានចំនួន ៥៤ លើក ឈ្នះ ៤៨ លើក និងចាញ់ ៦ លើក។
លោក ធន់ សុភា គ្រូបង្វឹករបស់ ធន់ មករា បានប្រាប់ថា៖ «ការប្រកួតក្នុងព្រឹត្តិការណ៍នេះ ធន់ មករា ហ្វឹកហាត់ត្រៀមបានល្អដោយមានសង្ឃឹមឈ្នះដល់ទៅ ៨០ ភាគរយ»។
លោក ធន់ សុភា បានបន្ថែមថា៖ «ធន់ មករា កំពុងពេញកម្លាំងហាត់បានល្អ ទឹកចិត្តមោះមុតចូលវាយសន្ធាប់តែម្តង និងអាចចេញគ្រប់ស្នៀត ហើយខ្ញុំគិតថាមិនអាចចាញ់បានទេគឺមានទំនុកចិត្តខ្ពស់ក្នុងការដណ្តើមយក ៣ ពិន្ទុក្នុងវគ្គដំបូងនេះ»។
ចំណែកកីឡាករ លាភ រដ្ឋា មានប្រវត្តិប្រកួតចំនួន ៥៥ លើកឈ្នះ ៤៩ លើក ចាញ់ ៥ លើក និងស្មើពិន្ទុ ១ លើក។ ស្របពេលជាមួយគ្នានេះកីឡាករថៃ Dek Doeur មានប្រវត្តិប្រកួតបានចំនួន ៥៧ លើក ឈ្នះ ៥០ លើក និងចាញ់ ៧ លើក។
លោក ថៃ អ៊ូ អ្នកនាំកីឡាករថៃមកប្រកួតបាននិយាយថា៖ «កីឡាករថៃ Dek Doeur មិនសូវជាខ្លាំងប៉ុន្មានទេបើធៀបជាមួយលាភ រដ្ឋា ពោលគឺអាចនិយាយបានថា ក្បាច់គុន និងបទពិសោធប្រហាក់ប្រហែលគ្នា ប៉ុន្តែបញ្ហាចាញ់ ឬឈ្នះ វាអាស្រ័យលើការវាយសម្រុក ឬភាពវៃឆ្លាតក្នុងការវាយដណ្តើមយកពិន្ទុប៉ុណ្ណោះ»។
ទោះជាយ៉ាងណាលោក ថៃ អ៊ូ បានបញ្ជាក់ថា៖ «ប្រសិនបើសមត្ថភាព ប្រហែលគ្នាអ៊ីចឹងកីឡាករកម្ពុជាអាចនឹងមានប្រៀបឈ្នះច្រើនជាង ខណៈដែលអ្នកគាំទ្រលើកទឹកចិត្តគឺជាផ្នែកមួយឲ្យការប្រកួតរបស់កីឡាករកម្ពុជាប្រឹងអស់ពីសមត្ថភាពដើម្បីឈ្នះ»។
ការប្រកួតដណ្ដើមខ្សែក្រវាត់ខារ៉ាបាវរដូវកាលទី ៨ នេះអនុវត្តតាមរូបមន្តចាស់ដែលមានប្រាក់រង្វាន់ចំនួន ៥០០០ ដុល្លារសម្រាប់អ្នកឈ្នះលេខ ១ និងចំណាត់ថ្នាក់លេខ ២ ទទួលបាន ៣០០០ ដុល្លារអាមេរិក ហើយក្នុងកីឡាករម្នាក់ៗត្រូវឆ្លងកាត់ការប្រកួតវគ្គជម្រុះចំនួន ៤ លើកដោយក្នុង ១ លើកទទួលបានតម្លៃខ្លួនចំនួន ៤០០ ដុល្លារ។
ក្នុងពូលកីឡាករកម្ពុជា និងកីឡាករថៃមានការជ្រើសយកតែកីឡាករម្នាក់គត់ទៅប្រកួតវគ្គផ្តាច់ព្រ័ត្រដោយចំណាយរយៈពេលប្រកួតចំនួន ១១ សប្តាហ៍ទើបបញ្ចប់៕