ព័ត៌មាន​កីឡា​ខ្លីៗ


ថៃ​ដណ្តើម​បាន​កន្លែង​ផ្តាច់ព្រ័ត្រ​មួយ​នៅក្នុង​ការ​ប្រកួត World Cup នារី

ប្រទេស​ថៃ​ធានា​បាន​នូវ​កៅអី​ដែល​គេ​ចង់​បាន​បំផុត​មួយ​ក្នុង​ការ​ប្រកួត បាល់ទាត់​ពាន​រង្វាន់​ពិភពលោក​នារី(​Women's World Cup) នា​ឆ្នាំ​ក្រោយ​ដែល​នឹង​ប្រារព្ធ​ធ្វើ​ក្នុង​ប្រទេស​កាណាដា​បន្ទាប់ពី យក​ឈ្នះ​ក្រុម​នារី​វៀតណាម​ក្នុង​លទ្ធផល ២-០ នៅក្នុង​ការ​ប្រកួត​ជម្រុះ​ផ្តាច់ព្រ័ត្រ​ដណ្តើម​ចំណាត់​ថ្នាក់​ទី​៥ នៃ​ការ ប្រកួត​ក្នុង​ក្រុង​ហូជីមិញ​កាលពី​រាត្រី​ថ្ងៃ​ពុធ។

ការ​ស៊ុត បាល់​ចូល​ទី​ពីរ​គ្រាប់​នៅក្នុង​តង់​ទី​ពីរ របស់​ក្រុម​ភ្ញៀវ គឺ​គ្រប់គ្រាន់​ដើម្បី​ការពារ​ការ វាយបក​វិញ​យ៉ាង​ខ្លាំងក្លា​របស់ ក្រុម​ម្ចាស់ផ្ទះ​ដែល​បាន​រក​បាល់ ចូល​ទី​ជា​ការ​លួង​ចិត្ត​ចុងក្រោយ ក្នុង​ពេល​៥​នាទី​ចុងក្រោយ​ដ៏ វីវក់ និង​រំជើបរំជួល៕ IN

អ្នក​ចាំទី​ឥណ្ឌូនេស៊ី សោកស្តាយ​ការ​ស្លាប់​ខ្សែប្រយុទ្ធ

កីឡាករ អ្នក​ចាំទី​ឥណ្ឌូនេស៊ី​ម្នាក់ បាន​និយាយ​ពី​ម្សិលមិញ​ថា លោក​ពិតជា​សោកស្តាយ​ពិតមែន បន្ទាប់ពី​កីឡាករ​ខ្សែប្រយុទ្ធ​ម្នាក់ ដែល​លោក​បាន​ទាត់ ចំពោះ​ក្នុង​អំឡុង​ពេល​ប្រកួត​មួយ នៃ​ការ​ប្រកួត​លីក​កំពូល​របស់​ជាតិ បាន​ស្លាប់។

កីឡាករ Agus Rohman បាន​និយាយ​ថា លោក​បាន​ទទួល​ការ​គំរាមកំហែង​សម្លាប់ បន្ទាប់ពី​កីឡាករ Akli Fairuz វ័យ​២៧​ឆ្នាំ​បាន​ស្លាប់ ប៉ុន្តែ​បាន ទទូច​ថា មិន​ត្រូវ​បន្ទោស​លោក​តែ​ម្នាក់​ទេ និង​បាន​លើក​ឡើង ថា ការ​ព្យាបាល​ដល់​កីឡាករ​រូប​នោះ​មិន​គ្រប់គ្រាន់​៕ IN

គ្រូបង្វឹក​ម៉ិកស៊ិក ជំរុញ​ឲ្យ​ក្រុម ចៀសវាង​សិច នៅ World Cup

អ្នក ចាត់​ការ​ក្រុម​ជម្រើស​ជាតិ​ម៉ិកស៊ិក លោក Miguel Herrera ចង់​ឲ្យ​កីឡាករ​ជា​កូន​ក្រុម​របស់​លោក ចៀសវាង​ការ​មាន​សិច ក្នុង​អំឡុង​ពេល​នៃ​ការ​ប្រកួត​បាល់ទាត់​ពាន​រង្វាន់​ពិភពលោក World Cup នៅ​ប្រេស៊ីល ដោយ​និយាយ​កំប្លែង​ថា វា​មិន​ជា​បញ្ហា​ទេ​បើសិន​ជា​គ្រាន់តែ​មើល ប៉ុន្តែ​មិន​ត្រូវ​ប៉ះពាល់​នារី​ដែល​មាន​តែ​ឈុត​ប៊ីគីនី​នោះ​ទេ។ គ្រូបង្វឹក​ដែល​តឹងរ៉ឹង​នេះ បាន​និយាយ​ថា លោក​នឹង​មិន​ហាម​កីឡាករ​២៣​រូប​របស់​លោក​មិន​ឲ្យ​មាន​សិច​នោះ​ទេ ប៉ុន្តែ​នឹង​ពេញចិត្ត​ឲ្យ​ពួកគេ​តម​បាន​ក្នុង​ការ​ប្រកួត​ពេញ​១​ខែ ដែល​ចាប់ផ្តើម​ពី​ថ្ងៃ ទី​១២ មិថុនា នោះ៕ AFP/IN

ការ​ប្រកួត​កីឡា​ប៉េតង់​អង្គរ បៀរ​នៅ​ថ្ងៃ​ទី​៣១ ឧសភា

ក្រុម កីឡាករ​ធម្មតា ក្រុម​អ្នក​គាំទ្រ និង​អ្នក​ដែល​មាន​បំណង​ចង់​លេង​ប៊ូល​ដើម្បី​ក្តីរីករាយ​ជាមួយ​នឹង​កីឡាករ ជម្រើស​ជាតិ ឆ្នើម​ខ្លះ អាច​ធ្វើការ​សាកល្បង​នៅឯ​ការ​ប្រកួត​ប៉េតង់​អង្គរបៀរ (Angkor Beer Petanque Contest) នៅឯ​កីឡដ្ឋាន​អូឡាំពិក នៅ​ថ្ងៃ​ទី​៣១ ខែ​ឧសភា ឆ្នាំ​២០១៤ ខាង​មុខ​នេះ។

គេហទំព័រ​ភាសា​បារាំង Le Petit Journal និង French Is Good កំពុង​សហការ​គ្នា​រៀបចំ​ព្រឹត្តិការណ៍​គេ​មិន​ដែល ឃើញ​ពី​មុន​នេះ ដោយ​សហការ​ជា​ដៃគូ​នឹង​ស្រារបៀរ​អង្គរ និង​ក្រុមហ៊ុន​ម៉ាក​ឧបករណ៍ ប៉េតង់​ល្បី​ឈ្មោះ Obut ដែល​នឹង​ឧបត្ថម្ភ​សហព័ន្ធ​ប៉េតង់ និង​កីឡា​ប៊ូល​កម្ពុជា ក្នុង​អំឡុង​ពេល​ហ្វឹកហាត់ និង​ការ​ប្រកួត​ជា​អន្តរជាតិ​នានា។

គាំទ្រ​ដោយ​គណៈកម្មាធិការ​ជាតិ​អូឡាំពិក​កម្ពុជា (NOCC) និង CPSBF ការ​ប្រកួត​នេះ​បើក​ចំហ​ចំពោះ​ទាំង​ជនបរទេស និង​ពលរដ្ឋ​ក្នុង​ស្រុក ដែល​មាន​បំណង​លេង​ជាមួយ កីឡាករ​ជម្រើស​ជាតិ​ជា​ក្រុម​បី​នាក់​៕ IN

ក្រុម Spurs ផ្តួល ក្រុម Oklahoma City ដើម្បី​នាំ​មុខ ២-០

កីឡករ​Tony Parker បាន បញ្ចប់​ការ​ប្រកួត​ជាមួយ​២២​ពិន្ទុ ចំណែកឯ​កីឡាករ Danny Green រក​បាន​៧​ពិន្ទុ ពី​ការ​ស៊ុត​ម្តង​បាន​បី​ពិន្ទុ ខណៈ​ក្រុម San Antonio Spurs បាន​ផ្តួល​ក្រុម Oklahoma City ក្នុង​ពិន្ទុ​១១២-១០៧ ដើម្បី​នាំ​មុខ​នៅក្នុង​ការ​ប្រកួត​ជម្រុះ​ជា​ស៊េរី​របស់​ពួកគេ។

កីឡាករ Tim Duncan រក​បាន​១៤​ពិន្ទុ និង​បាល់​ផ្លាត​១២ ហើយ​កីឡាករ Manu Ginobili បាន​ដូរ​ចូល ដើម្បី​ស៊ុត​បញ្ចូល​កញ្រែ្ចង​បាន​១១ ពិន្ទុ​ឲ្យ​ក្រុម Spurs ដែល​បាន យក​ឈ្នះ​ការ​ប្រកួត​មាន​ប្រៀប ពីរ​ប្រកួត​ជាប់​គ្នា​នៅក្នុង​ការ​ប្រកួត Western Conference final series។

ក្រុម Spurs បាន​តាម​ពី​ក្រោយ​ជាមួយ​ពិន្ទុ ២៦-២៤ បន្ទាប់ពី​១៥​នាទី​ដំបូង ប៉ុន្តែ បាន​វាយបក​ស៊ុត​យក​នាំ​មុខ Oklahoma City ៨៨-៥១ វិញ​ក្នុង​១៥​នាទី​ក្រោយ​មក។

កីឡាករ Kevin Durant និង Russell Westbrook នៃ​ក្រុម Oklahoma City ធ្វើ​មិន បាន​គ្រប់គ្រាន់​ទេ​ពី​ថ្ងៃ​ពុធ ខណៈ​កីឡាករ Serge Ibaka អវត្តមាន​ព្រោះ​របួស៕ IN

ព័ត៌មានថ្មីៗ