អ្នកគាំទ្របាននាំគ្នាបង្ហាញទង់របស់ក្លិប Liverpool កន្លងមក តែពេលនេះ ហង្សក្រហម រងការរិះគន់។ AFP
.jpg)
ក្រុងឡុងដ៍៖ ក្រុមហង្សក្រហម Liverpool ត្រូវបានអតីតកីឡាកររបស់ខ្លួន ចោទប្រកាន់ថា បានក្បត់នឹងក្រមសីលធម៌ដែលបានផ្អាកការងារបុគ្គលិក ដោយសារអត់មានពាក់ព័ន្ធនឹងការប្រកួតក្នុងអំឡុងការរាតត្បាតនៃវីរុសកូរ៉ូណា ខណៈមានការព្រមានថា កីឡាករនៅក្របខ័ណ្ឌ Premier League នឹងធ្វើឲ្យប្រាក់ចំណូលរបស់រដ្ឋបាត់ដល់ទៅ ២០០ លានផោន (២៤៥ លានដុល្លារ) បើសិនគោលការណ៍កាត់ប្រាក់ខែ ៣០ ភាគរយ ត្រូវបានដាក់ចេញ។
ក្រុម Liverpool ដែលឈរកំពូលតារាងក្របខ័ណ្ឌ Premier League របស់ប្រទេស អង់គ្លេស បានឲ្យដឹងថា ខ្លួននឹងបំពេញបន្ថែមថវិកា ដែលឧបត្ថម្ភដោយរដ្ឋ ដើម្បីធានាថាបុគ្គលិកដែលត្រូវផ្អាកការងារជាបណ្ដោះអាសន្ននេះទទួលបានប្រាក់ខែពេញ ១០០ ភាគរយតែម្តង។
ក្លិប Liverpool ដែលដឹកនាំដោយលោក Jurgen Klopp គឺជាក្រុមទី ៥ នៅ Premier League បន្ទាប់ពី Newcastle, Tottenham, Bournemouth និង Norwich ដែលបានផ្អាកបុគ្គលិករបស់ខ្លួន ដោយសហការជាមួយរដ្ឋាភិបាល ដោយរដ្ឋាភិបាលជួយ ៨០ ភាគរយ បានន័យថា ខាងក្លិបត្រូវចេញត្រឹម ២០ ភាគរយ ដើម្បីផ្តល់ប្រាក់ខែឲ្យក្រុមការងារ ដែលសម្រាកពីការងារបណ្ដោះអាសន្ននេះ។
ក្រោយក្រុមហង្សក្រហម ចេញនូវវិធានការនេះ ធ្វើឲ្យអតីតកីឡាកររបស់ក្លិបមួយចំនួនមិនយល់ស្របតាមឡើយ ក្នុងនោះខ្សែការពារ Jamie Carragher បានសរសេររិះគន់ខ្លាំងតាមរយៈគណនី ធ្វីធើររបស់ខ្លួនថា៖ «លោក Jurgen Klopp បានបង្ហាញការយល់ចិត្តយល់ថ្លើមគ្រប់គ្នាមករហូត ចាប់តាំងពីមានការរាលដាលមេរោគនេះ ខណៈបណ្ដាកីឡាករសំខាន់ នៅលីកកំពូលនេះ ក៏បាននាំគ្នារួមចំណែកយ៉ាងខ្លាំង ដោយសុខចិត្តកាត់ប្រាក់នឿយហត់របស់ខ្លួន។ តែក្រោយពីនេះ ការគោរព និងបំណងល្អផ្សេងៗ ត្រូវរលាយអស់ហើយ! យ៉ាប់មែនទែន Liverpool»។
Jamie Carrangher បានរិះគន់ចំណាត់ការរបស់ Liverpool។ AFP
ស្រដៀងគ្នានេះ អតីតស៊ុបពើស្តារមួយរូបផ្សេងទៀត គឺ Stan Collymore ក៏បានសម្ដែងអារម្មណ៍មិនសប្បាយចិត្ត តាមបណ្ដាញសង្គមធ្វីធើរ របស់ខ្លួនថា៖ «ខ្ញុំមិនដឹងថា មានអ្នកគាំទ្រ Liverpool ប៉ុន្មានអ្នកដែលទ្រាំបាននឹងទង្វើ ដែលគួរឲ្យបន្ទោសខ្លាំងបំផុត ក្នុងការផ្អាកការងារបុគ្គលិក ដែលមិនជាប់ទាក់ទងនឹងការប្រកួតនាពេលនេះនោះទេ»។
អតីតខ្សែបម្រើម្នាក់ទៀត ដែលធ្លាប់ប្រកបអាជីពនៅទឹកដី Anfield អស់ជាច្រើនឆ្នាំដែរ គឺបុរសសញ្ជាតិអាល្លឺម៉ង់ Dietmar Hamann បានសរសេរសារថា៖ «គួរឲ្យភា្ញក់ផ្អើលខ្លាំងណាស់ ចំពោះព័ត៌មានដែលថា Liverpool បានទាញយកផលចំណេញពីគម្រោង ដែលរដ្ឋាភិបាលជួយចេញ ៨០ ភាគរយ សម្រាប់បុគ្គលិកផ្អាកការងារបណ្ដោះអាសន្ន។ គម្រោងហ្នឹងមិនគួរកើតឡើងឡើយ ព្រោះមើលទៅវាផ្ទុយនឹងក្រមសីលធម៌របស់ក្លិប ដែលខ្ញុំបានដឹង»។
ពាក់ព័ន្ធនឹងបញ្ហាបញ្ឈប់បុគ្គលិកបណ្ដោះអាសន្ននេះ Liverpool បានឲ្យដឹងថា បុគ្គលិកទាំងអស់នឹងទទួលបានប្រាក់ខែ ១០០ ភាគរយពេញ ពោលគឺគ្រប់គ្នាត្រូវបានធានាថា គ្មាននរណាម្នាក់ត្រូវបានកេងបន្លំប្រាក់ឈ្នួលឡើយ ដោយក្លិបបានចេញសេចក្ដីប្រកាសថា៖ «ទោះបីជាការសម្រេចចិត្តជាចម្បង ដែលផ្អាកការងារបុគ្គលិកបណ្ដោះអាសន្នក៏ដោយ ក៏មានការប្ដេជ្ញារួមពីបុគ្គលសំខាន់ៗគ្រប់លំដាប់ថ្នាក់របស់ក្លិប ដោយគ្រប់គ្នាព្យាយាមរកដំណោះស្រាយ ដែលធានាបាននូវការងារឲ្យគ្រប់នយោជិតទាំងអស់នៃក្លិបរបស់យើង អំឡុងពេលមានវិបត្តិដែលមិនធ្លាប់ជួបប្រទះមកពីមុននេះ»។
ជាមួយគ្នានេះ សមាគមកីឡាបាល់ទាត់អាជីព (PFA) បានធ្វើការព្រមានពីការបាត់ចំណូលពន្ធ ២០០ លានផោន (២៤៥ លានដុល្លារ) សម្រាប់រដ្ឋាភិបាលចក្រភពអង់គ្លេស បើសិនជានយោបាយកាត់ប្រាក់ខែរបស់កីឡាករ ៣០ ភាគរយ ត្រូវបានអនុវត្ត។
ក្នុងសេចក្ដីប្រកាសរបស់ខ្លួន ក្រោយពីមានកិច្ចប្រជុំជាមួយគណៈកម្មការទទួលខុសត្រូវក្របខ័ណ្ឌ Premier League សមាគមកីឡាបាល់ទាត់អាជីព (PFA) បានឲ្យដឹងថា៖ «កីឡាករគ្រប់រូបមានបំណងចង់ និងចូលរួមចំណែកផ្នែកហិរញ្ញវត្ថុ ក្នុងពេលវេលាដ៏លំបាកនេះ។ យើងស្វាគមន៍គ្រប់ពេលក្នុងការពិភាក្សាបញ្ហានេះ ហើយយើងរីករាយបន្តការពិភាក្សា»៕ AFP/VN
