ភ្នំពេញៈ សហព័ន្ធកីឡាបាល់ទាត់ អាស៊ីអាគ្នេយ៍ (AFF) បានតាមដានយ៉ាងយកចិត្តទុកដាក់ ចំពោះស្ថានភាពការរាលដាលជំងឺកូវីដ១៩ ហើយបានសម្រេចថា នឹងរៀបចំពេលវេលាជាថ្មីម្ដងទៀត ចំពោះការប្រកួត ក្នុងកម្មវិធីជាច្រើន ដែលគ្រោងនឹងធ្វើក្នុងរយៈពេល ៤ ខែទៀត។
ព្រឺត្តិការណ៍ចំនួន៤ នឹងត្រូវ លើកពេលប្រកួតរហូតដល់កំណត់ពេលថ្មីចុងក្រោយឆ្នាំនេះ ដោយចាប់ផ្ដើមពីកម្មវិធីប្រកួតពានរង្វាន់ AFF Women''s Championship នៅប្រទេស ហ្វីលីពីន ក្នុងខែឧសភា ខណៈ៣ព្រឹត្តិការណ៍ផ្សេងទៀត មានដូចជាការប្រកួតពានរង្វាន់ AFF U18 Women''s Championship ការប្រកួតពានយុវជនអាយុក្រោម១៦ឆ្នាំ (AFF U16 Boys'' Championship) និងប្រកួតជើងឯកយុវជនអាយុក្រោម១៩ឆ្នាំ (AFF U16 Boys'' Championship) ដែលព្រឹត្តិការណ៍ទាំងអស់នេះ ដំបូងឡើយគ្រោងរៀបចំបន្តបន្ទាប់គ្នា នៅប្រទេស ឥណ្ឌូនេស៊ី ក្នុងខែមិថុនា កក្កដា និងសីហា។
ពាក់ព័ន្ធនឹងការប្រកាសនេះ លោកឧត្ដមសេនីយ៍ ខៀវ សាម៉េត ប្រធាន AFF ថ្លែងថា៖ «នេះជាពេលវេលា ដែលមិនធ្លាប់កើតមានពីមុនឡើយ សម្រាប់ពិភព-លោកទាំងមូល រួមទាំងសហ-គមន៍ និងគ្រួសារបាល់ទាត់របស់យើង តែមិនអីទេ យើងនឹងឆ្លងកាត់បញ្ហានេះជាមួយគ្នា ហើយដើម្បីឈ្នះលើពេលវេលាដ៏ពិបាកនេះ ត្រូវការការរួមចំណែករបស់យើងទាំងអស់គ្នា»។
លោកបានបន្តថា៖«ចាប់តាំងពីមានគ្រោះថ្នាក់នៃការឆ្លងជំងឺនេះខ្ពស់ឡើងៗ នៅកន្លែងមនុស្សច្រើន ដូចជាព្រឹត្តិការណ៍ប្រកួតបាល់ទាត់ជាដើម យើងបានពិចារណាថា សម្រេចធ្វើការ-ពន្យារពេល ហើយពេលណា ដែលចាំបាច់ នឹងរំលាយការ-ប្រកួតរបស់យើង ដើម្បីកាត់បន្ថយការមានទំនាក់ទំនងក្នុងសង្គម ក្នុងគោលបំណងការពារសុវត្ថិភាព និងសុខភាពរបស់គ្រួសារ និងសហគមន៍កីឡា បាល់ទាត់របស់យើង»។
កម្មវិធីប្រកួត ៤ផ្សេងទៀត នឹងកើតឡើងដូចការគ្រោងទុកពីដំបូង មានដូចជាការប្រកួតបាល់ទាត់ផ្នែកនារីអាយុក្រោម១៥ឆ្នាំ (AFF U15 Girls Championship) នៅប្រទេសឥណ្ឌូនេស៊ី ខែកញ្ញាខាងមុខ ព្រមទាំងការប្រកួតបាល់ទាត់ក្នុងសាល២ព្រឹត្តិការណ៍ គឺ AFF Futsal Championship និង AFF Futsal Club Championship ហើយនិងការប្រកួតបាល់ទាត់លើឆ្នេរខ្សាច់ AFF Beach Football Championship ដែលទាំងអស់ត្រូវរៀបចំក្នុងប្រទេសថៃ ចុងឆ្នាំនេះ។
ជាមួយគ្នានេះដែរ កម្មវិធីប្រកួត Asean Club Championships (ACC) ដែលគ្រោងធ្វើលឿនជាងគេ ក្នុងឆ្នាំនេះ បានប្ដូរទៅឆ្នាំ២០២១ វិញ ដោយមានការប្រកួតត្រឹម១០ថ្ងៃ លើកម្មវិធីប្រកួតក្នុងតំបន់រយៈពេលជាង ៥ ខែ។ ឥឡូវនេះ ច្បាស់ណាស់ថា ជាមួយនឹងស្ថានភាពទូទៅ និងការរង់ចំការកំណត់ឡើងវិញ នៃលីកថ្នាក់ជាតិរបស់ AFF និងរាល់ការប្រកួតរបស់ AFC ដែលពេលនេះមិនទាន់ធ្វើការសម្រេចនៅឡើយ ហើយច្បាស់ណាស់ថា មិនមានពេលគ្រប់គ្រាន់ ដើម្បីរៀបចំការប្រកួតជើងឯកនៅឆ្នាំនេះ អ៊ីចឹង គ្រប់សមាជិកទាំងអស់អាច ធ្វើការរៀបចំសម្រាប់ឆ្នាំ២០២១។
ប្រធានសហព័ន្ធកីឡាបាល់-ទាត់អាស៊ីអាគ្នេយ៍ លោក ខៀវ សាម៉េត បានធ្វើការសន្យាថា៖ «ដោយសារស្ថានការប្រែប្រួលឥតឈប់ឈរ យើងនឹងបន្តតាមមើលយ៉ាងកៀកបំផុត ហើយនឹងមិនរារែកឡើយ ក្នុងការធ្វើការផ្លាស់ប្ដូរកាលបរិច្ឆេទរបស់យើង ប្រសិនបើចាំបាច់។ គ្រប់ការ-សម្រេចចិត្តរបស់យើង AFF នឹងតែងតែយកសុខុមាលភាពរបស់គ្រួសារ និងសហគមន៍បាល់ទាត់របស់យើងជាចម្បងជានិច្ច»។
លោកឧត្តមសេនីយ៍ បានបន្ថែមថា AFF កំពុងតាមដានឥតប្រិចភ្នែក ចំពោះការវិវឌ្ឍ នៃជំងឺកូវីដ ១៩ ដោយមានការណែនាំពីអង្គការសុខភាពពិភពលោក (WHO) ក្រសួងសុខា-ភិបាល មន្ត្រីរដ្ឋាភិបាល សហព័ន្ធបាល់ទាត់ពិភពលោក (FIFA) និង សហព័ន្ធបាល់ទាត់ទ្វីបអាស៊ី (AFC) ហើយនឹងផ្ដល់ព័ត៌មាននៃការវិវឌ្ឍថ្មី នៅពេលចាំបាច់។
ប្រធាន AFF រូបនេះ បាននិយាយថា៖«យើងត្រូវតែរួមចំណែកទាំងអស់គ្នា ទប់ស្កាត់ការឆ្លងនេះឲ្យនៅទាបបំផុតតាមដែលអាច ដើម្បីឲ្យវីរបុរស-វីរនារី ពោលគឺក្រុមគ្រូពេទ្យទាំងអស់ ដែលកំពុងប្រថុយប្រថានជីវិតរបស់ខ្លួន អាចដោះស្រាយជាមួយនឹងចំនួនអ្នកជំងឺ ដែលធ្ងន់ធ្ងរ និងដើម្បីឲ្យមន្ទីរពេទ្យរបស់យើងខ្វះកន្លែង»។
លោក ខៀវ សាម៉េត បានថ្លែងជាចុងក្រោយថា៖ «វិធានការដែលដាក់ចេញដោយរដ្ឋា- ភិបាលនៃប្រទេសនីមួយៗ នោះអាចទទួលបានផល លុះត្រាតែយើងទាំងអស់គ្នារួមចំណែកកាត់បន្ថយការទាក់ទងគ្នានៅគ្រប់ទីកន្លែងតាមដែលអាចធ្វើទៅបាន»៕ VN