Griezmann (ឆ្វេង) របស់ Barca លោតតែតបាល់ជាមួយ Hermoso របស់ Atletico។ AFP
.jpg)
ក្រុងម៉ា្រឌីដ៖ ក្រុម Atletico Madrid បានបន្ថែមក្ដីសង្ឃឹមឱ្យខ្លួនកាន់តែធំឡើង ក្នុងការឈ្នះពានក្របខ័ណ្ឌ La Liga ជាមួយនឹងជ័យជម្នះលើក្រុម Barcelona ១-០ នៅផ្ទះខ្លួនឯងកាលពីថ្ងៃអាទិត្យ និងព្រមទាំងធ្វើឱ្យក្រុមគូប្រជែងរបស់ខ្លួនជួបនូវការចាប់ផ្ដើមដ៏សែនយ៉ាប់បំផុតបន្តទៀត ក្នុងរយៈពេល ២៩ ឆ្នាំ។
ការបញ្ចប់ទីយ៉ាងស្អាតពីកីឡាករ Yannick Carrasco នៅនាទីទី៤៥+៣ ក្រោយមានឱកាសឆក់បាល់ពីការបង្កើតកំហុសរបស់ខ្សែការពារ Gerard Pique និងអ្នកចាំទី Marc-Andre ter Stegen គ្រប់គ្រាន់ក្នុងការបំបាក់មុខក្រុម Barca ដែលគ្មានអ្វីតបតសោះ ពិសេសកីឡាករឆ្នើម Lionel Messi ដែលមានទម្រង់លេងក្រោមស្តង់ដា អំឡុងការប្រកួតនៅកីឡដ្ឋាន Wanda Metropolitano នេះ។
គ្រាប់បាល់នេះ មិនត្រឹមតែធ្វើឱ្យក្រុម Atletico បានកត់ត្រានូវជ័យជម្នះក្នុងលីគដំបូងរបស់ខ្លួនលើក្រុម Barca ក្នុងរយៈពេល ១០ ឆ្នាំប៉ុណ្ណោះទេ ថែមទាំងជួយឱ្យពួកគេ នាំមុខ ៣ ពិន្ទុដាច់លើក្រុមជើងចាស់ Real Madrid ទាំងខ្លួននៅសល់ ១ ប្រកួតក្នុងដៃទៀតផង ហើយព្រមទាំងនាំឱ្យមាន ២០ ពិន្ទុស្មើក្រុមកំពូលតារាង Real Sociedad ដែលលេងលើសខ្លួន ១ ប្រកួត។
លើសពីនេះទៀត គ្រាប់បាល់ហ្នឹង ក៏បានទម្លាក់ក្រុមគូប្រជែងដ៏តឹងតែងរបស់ខ្លួនឱ្យធ្លាក់ទៅលេខ ១០ ដោយមានតែ ១១ ពិន្ទុប៉ុណ្ណោះ ក្នុងចំណោម ៨ ប្រកួតដំបូង ដែលនេះបានបង្ហាញឱ្យឃើញថា ជាការរកបានពិន្ទុសរុបដ៏អន់បំផុតរបស់ក្រុម Barca ក្នុងដំណាក់កាលដូចគ្នាហ្នឹងនៃរដូវកាលផ្សេងៗ គិតតាំងពីរដូវកាល ១៩៩១-១៩៩២ មក។
គ្រូបង្វឹករបស់ក្រុម Barca លោក Ronald Koeman បានមានប្រសាសន៍ថា៖ «មិនខុសពីគ្រូបង្វឹកដទៃៗដែរ ខ្ញុំជាអ្នកទទួលខុសត្រូវទាំងស្រុង។ យើងដឹងថា ត្រូវតែធ្វើបាននូវលទ្ធផលល្អប្រសើរជាងមុន។ ខ្ញុំនៅតែបន្តមានជំនឿលើកីឡាករ ក្នុងក្រុមដែលមានស្រាប់»។
បន្ថែមពីលើលទ្ធផល ដែលចាញ់ហ្នឹង រឿងដែលធ្វើឱ្យ Barca ខកចិត្តមិនតិចដែរ នោះគឺនៅពេលឃើញកីឡាករ Pique ដើរខ្ចកៗលាយដោយទឹកភ្នែក ដែលក្រោយមកក្លិបប្រាប់ថា មានបញ្ហាជង្គង់ខាងស្ដាំ។
«ថ្ងៃនេះ យើងអាចឈ្នះ តែវាអត់មានកែប្រែអ្វីច្រើនឡើយ។ យើងលេងបានល្អណាស់ ហើយខ្ញុំរំភើបមែនទែននឹងក្រុមមួយនេះ»។ នេះជាសម្ដីរបស់លោក Diego Simeone ដែលដឹកនាំក្រុម Atletico ប្រកួតមិនចាញ់ក្នុងលីគរហូត ២៤ លើកហើយ។
ដោយសារក្រុម Real ប្រកួតត្រឹមស្មើ ១-១ ជាមួយក្រុមម្ចាស់ផ្ទះ Villarreal ដែលកំពុងតែឡើងជើងដែរ ខណៈការរបូតបាត់ពិន្ទុបន្ថែមទៀតរបស់ក្រុមការពារជើងឯកនេះ ហាក់ឱ្យជាប្រផ្នូលថា នេះអាចជារដូវកាលរបស់ក្រុម Atletico ក៏ថាបាន។
កីឡាករ Mariano Diaz ជួយឱ្យក្រុម Real នាំមុខមុន ក្រោយការប្រកួតប្រព្រឹត្តទៅបានត្រឹមតែ ១០៥ វិនាទី តែក្រោយមក ក្រុមរបស់លោក Zinedine Zidane ដូចជាថមថយកម្លាំង ហើយទីបំផុត ក្រុម Villarreal បានបង្ហាញថា ពួកគេសមនឹងបានពិន្ទុដែរ ដោយការវាយសម្រុករឿយៗរហូតបានបាល់ពិន័យ ១១ ម៉ែត្រ ខណៈ Gerard Moreno ក៏មិនបានខ្ជះខ្ជាយឱកាសដោយការបំប៉ោងសំណាញ់ទីឱ្យក្រុមតាមស្មើវិញ ១-១ ដែលជាលទ្ធផលផ្លូវការតែម្ដង។
គ្រូបង្វឹក លោក Zidane បានសម្ដែងអារម្មណ៍សោកស្ដាយ ក្រោយក្រុមបាត់បង់ ២ ពិន្ទុនេះ ដោយបាននិយាយថា៖ «មានអារម្មណ៍ថា ដូចជាបានរង្វាន់ដ៏តូច ១ អ៊ីចឹង។ យើងសមតែបានលទ្ធផលល្អជាងហ្នឹងពីការប្រកួត ដែលយើងបានលេង។ ខ្ញុំមានអារម្មណ៍មួម៉ៅបន្តិច ដោយសារលទ្ធផលមិនដូចអ្វី ដែលយើងប៉ង នោះគឺ ៣ ពិន្ទុ»។ AFP/VN
