ក្រុងម៉ា្រឌីដ៖ ក្រុមអ្នកមានបុណ្យ Barcelona នៅតែអាចរក្សាក្ដីសង្ឃឹមស្ដួចស្ដើងរបស់ខ្លួនបានបន្តទៀត ហើយរុញទម្លាក់ក្រុម Espanyol ពីក្របខ័ណ្ឌ La Liga កាលពីថ្ងៃពុធ ដោយសារ ១ គ្រាប់ របស់ខ្សែប្រយុទ្ធ Luis Suarez ដែលធានាបាននូវជ័យជម្នះឲ្យក្រុមរបស់ខ្លួននៅផ្ទះខ្លួនឯង ក្នុងជំនួបរវាងក្រុមនៅតំបន់កាតាឡានតែ ១។
ការប្រកួតដែលធ្វើឡើងយ៉ាងប្រយ័ត្នប្រយែងនៅឯកីឡដ្ឋាន Camp Nou នេះ ចាប់ផ្ដើមក្ដៅគគុកនៅ ៦ នាទីដំបូងនៃវគ្គទី២ ពេលកីឡាករ ២ រូបនៃក្រុមទាំង ២ គឺខ្សែប្រយុទ្ធ Ansu Fati របស់ក្រុមម្ចាស់ផ្ទះ Barca និងខ្សែបម្រើ Pol Lozano ទទួលបានកាតក្រហម ដែលធ្វើឲ្យទាំងសងខាងសល់សមាជិក ១០ នាក់។
១ គ្រាប់របស់ក្រុមអ្នកមានបុណ្យកើតឡើងពីការរួមចំណែកនៃកីឡាករតំបន់លើទាំង ៣ ដោយកីឡាករសញ្ជាតិបារាំង Antoine Griezmann បានប្រើកែងជើងបញ្ជូនបាល់ឲ្យកីឡាករអន្តរជាតិអាហ្សង់ទីន Lionel Messi ស៊ុត តែមិនផុតពីខ្សែការពារមុននឹងកីឡាករ Suarez របស់អ៊ុយរូហ្គាយ រត់ទៅថែមបាល់ដែលខ្ទាតមកវិញនោះ បំប៉ោងសំណាញ់ទីបានសម្រេចនៅនាទីទី ៥៦។
ជ័យជម្នះ ១-០ ពិតមែននៅឆ្ងាយហៅមិនឮពីលទ្ធផលដ៏មហិមា ៤-១ លើក្រុម Villarreal កាលពីថ្ងៃអាទិត្យ ប៉ុន្តែវាបានជួយបង្ខិតក្រុម Barca ឲ្យតាមតែ ១ ពិន្ទុចំពោះក្រុមកំពូលតារាង Real Madrid ដែលសល់ការប្រកួត ១ លើកក្នុងដៃ ដោយត្រូវប៉ះក្រុម Alaves នៅផ្ទះខ្លួនឯង។
ដោយឡែកក្រុម Espanyol ដែលរើខ្លួនមិនរួចពីបាតតារាងនឹងត្រូវធ្លាក់ពីលីកលំដាប់កំពូលរបស់អេស្ប៉ាញហើយ ក្រោយរងបរាជ័យក្នុងការប្រកួតនេះ ដោយសារថា ពួកគេមាន ១១ ពិន្ទុ តាមពីក្រោយក្រុមដែលនៅទីសុវត្ថិភាព ខណៈការប្រកួតនៅសល់តែ ៣ ដងទៀតប៉ុណ្ណោះ ដូច្នេះមានន័យថា បើទោះឈ្នះការប្រកួតនៅសល់ទាំងអស់ ក៏មិនអាចមានពិន្ទុឡើងផុតពីតំបន់ត្រូវកាត់ចោលដែរ។
ចំណងជើងអត្ថបទទំព័រមុខរបស់កាសែត Mundo Deportivo ដែលចេញផ្សាយកាលពីព្រឹកថ្ងៃព្រហស្បតិ៍បានសរសេរថា៖ «ស្លាប់ ឬរស់» ហើយការដាក់ចំណងជើងបែបនេះ ដោយសារថា ក្រុមទាំង ២ សុទ្ធតែការជ័យជម្នះដូចគ្នា។ ក្រុម Barca ត្រូវការឈ្នះ ដើម្បីតាមប្រជែងពានជាមួយក្រុម Real ខណៈក្រុម Espanyol ចង់បាន ៣ ពិន្ទុ ដើម្បីពន្យារអាយុជីវិតរបស់ខ្លួនបន្តទៀត។
សម្រាប់ការប្រជែងពានរង្វាន់វិញ មនុស្សជាច្រើនយល់ថា ក្រុមដែលមានសិទ្ធិខ្ពស់ជាងគេ ក្នុងការឈ្នះពានក្របខ័ណ្ឌ La Liga រដូវកាលនេះ គឺក្រុម Real ដោយសារបើគិតលើប្រវត្តិជួបគ្នា (head-to-head) គឺល្អជាងក្រុម Barca ហើយបើគិតលើគូប្រកួត ដែលក្រុមទាំង ២ ត្រូវប្រឈមជាមួយសម្រាប់ការប្រកួត ដែលនៅសល់វិញ ឃើញថា ក្រុមរបស់លោក Zinedine Zidane នៅតែមានសង្ឃឹមខ្ពស់ដដែល ក្នុងការយកជ័យជម្នះ។
តែកីឡាករ Suarez សង្ឃឹមថា នឹងមានរឿងអស្ចារ្យកើតឡើងចុះ ដោយកីឡាករវ័យ ៣៣ ឆ្នាំ បាននិយាយថា៖ «យើងត្រូវតែឈ្នះការប្រកួត ដែលនៅសល់ទាំង ៣ លើក។ អ្វី ដែលក្រុម Real សម្រេចបាន គឺជារឿងរបស់ពួកគេ។ វាជារឿងអស្ចារ្យណាស់ បើសិនជាពួកគេជ្រុះបាត់ពិន្ទុ។យើងគ្រាន់តែបន្តការងាររបស់ពួកយើង ចំណែកពួកគេធ្វើបានលទ្ធផលយ៉ាងណាជារឿងរបស់ពួកគេ»៕ AFP/VN