ក្រុងឡុងដ៍ៈ ខ្សែប្រយុទ្ធ Harry Kane ជឿជាក់ថា ក្លិប Tottenham Hotspur អាចឈ្នះគ្រប់ការប្រកួតទាំងអស់ដើម្បីឈ្នះពានអង់គ្លេស Premier League ក្រោយពីបានពង្រឹងសមត្ថភាពក្លិបរបស់គេក្នុងរដូវកាលដោះដូរកីឡាកររួចមក។
ក្លិប Tottenham ឬ Spurs ជាម្ចាស់ជើងឯករង Champions League បានបើកយុទ្ធនាការក្របខ័ណ្ឌ Premier League ជាមួយជោគជ័យ ៣-១ លើក្លិបទើបល្បីឈ្មោះ Aston Villa នៅកីឡដ្ឋាន Tottenham Hotspur ពីថ្ងៃសៅរ៍។
ក្រុម Spurs បានមានឱកាសជិតនឹងលើកពាន Premier League ម្ដងទៅហើយក្រោមការដឹកនាំរបស់លោក Mauricio Pochettino ដែលក្នុងនោះបានជាប់លេខ ២ នៅរដូវកាលឆ្នាំ ២០១៦-១៧ និងបានលេខ ៣ ស្ថិតនៅរដូវកាលចន្លោះឆ្នាំ ២០១៦ និងឆ្នាំ ២០១៨។
ទោះយ៉ាងណាក៏ដោយ ក្លិប Spurs បានបង្កើនសមត្ថភាពក្រុមរបស់ខ្លួនក្រោយពីមិនបានទិញកីឡាករថ្មីរយៈពេល ២ រដូវកាលជាប់ៗគ្នា ហើយកីឡាករដែលបានទិញនោះរួមមានកីឡាករ Tanguy Ndobele កីឡាករ Giovani Lo Celso និងកីឡាករ Ryan Sessegnon។
តារាបាល់ទាត់ Kane ប្រចាំក្លិប Spurs មានទំនុកចិត្តថា ក្លិប Spurs អាចយកឈ្នះម្ចាស់ជើងឯក Man City និងក្លិប Liverpool គ្រប់ពេលនៅរដូវកាលថ្មីនេះក្រោយពីទទួលបានជោគជ័យលើក្លិប Villa។
តារាបាល់ទាត់រូបនេះបាននិយាយថា៖ «យើងបានជួបគ្នាមួយភ្លែតពីឆ្នាំមុន ប៉ុន្តែពួកគេបានទៅមុខក្រោយពីខែមករា។ យើងត្រូវច្បាស់ថា យើងត្រូវចាប់ផ្ដើមដោយល្អព្រោះក្លិប Liverpool ទទួលជោគជ័យកាលពីយប់ថ្ងៃសុក្រ ហើយក្លិប Man City ជោគជ័យកាលពីរសៀលថ្ងៃសៅរ៍ដូច្នេះវាសំខាន់ដែលយើងត្រូវបន្តបែបនេះជាបន្តទៀត»។
កីឡាករ Kane បានបន្តថា៖ «យើងមានទំនុកចិត្តទាំងស្រុងថា យើងពិតជាអាចឈ្នះគ្រប់ការប្រកួតទាំងអស់ ប៉ុន្តែនៅមានផ្លូវឆ្ងាយត្រូវដើរខាងមុខទៀតដូច្នេះហើយយើងបានទិញកីឡាករថ្មីថែមទៀតដើម្បីពង្រឹងសមត្ថភាពក្រុមពីព្រោះយើងមានការប្រកួតថែមទៀត ដើម្បីដណ្ដើមកៅអី ហើយនោះជាអ្វីដែលយើងមាន»។
ប្រធានក្រុមរូបនេះបានបន្ថែមថា៖ «យើងមានក្រុមល្អ និងស្រេកឃ្លានជ័យជម្នះព្រោះគ្រប់គ្នាស័ក្តិសម និងត្រៀមខ្លួនទៅមុខជានិច្ច ហើយកីឡាករត្រូវតែព្យាយាមបង្កើតឥទ្ធិពល ហើយពួកគេសម្រេចបានមែន។ ពិតជាសំខាន់សម្រាប់យើងប្រសិនបើយើងនឹងមានរដូវកាលល្អមួយ។ ជាការពិតវាទើបតែចាប់ផ្តើមទេឥឡូវនេះ ប៉ុន្តែពេញ ១ រដូវរងានៅពេលមានការប្រកួតកាន់តែច្រើននោះ យើងត្រូវការអ្នករាល់គ្នាចូលរួមវិភាគទានឲ្យបានច្រើនតាមដែលអាចធ្វើបាន»។
កីឡាករដដែលនេះបាននិយាយថា៖ «ខ្ញុំគិតថា វាពិតជានឹងជួយយើងនៅពេលយើងចាប់ផ្ដើមដើរចូលក្នុងការប្រកួតកាន់តែច្រើនឡើងៗ ហើយយើងពិតជាមិនមានឱកាសដើម្បីឃើញកីឡាករ Ryan និង Gio ចូលរួមហ្វឹកហាត់ជាមួយយើងនៅឡើយទេ ប៉ុន្តែជាការពិត ខ្ញុំពិតជាកំពុងទន្ទឹងរង់ចាំរឿងនោះនៅសប្ដាហ៍ក្រោយនេះ ហើយខ្ញុំច្បាស់ណាស់ថា ពួកគេនឹងចង់មកបង្កើនឥទ្ធិពលកាន់តែខ្លាំងឡើងផងដែរ ព្រោះគ្រប់គ្នានៅទីនេះកំពុងព្យាយាមដើរឲ្យត្រូវគោលដៅ ហើយនោះជាអ្វីដែលយើងកំពុងតែព្យាយាមធ្វើបែបនោះឯង»៕ SN