ក្រុមជយលាភីទាំងកុមារ និងមនុស្សធំនៃការប្រកួតគំនូរ White Canvas Cambodia ឆ្នាំ ២០២០ រដូវកាលទី១។ រូបថត សហការី
ភ្នំពេញ៖ ទីបំផុតការប្រកួតប្រជែងស្នាដៃគំនូរ White Canvas Cambodia 2020 រដូវកាលទី១ ដែលរៀបចំដោយក្រុមហ៊ុន Social Compass Cambodia បានរកឃើញម្ចាស់ជយលាភីរបស់ខ្លួនហើយ ខណៈការប្រកាសលទ្ធផល និងចែករង្វាន់ជូនដល់ជយលាភីនោះបានធ្វើឡើងនៅឯវិចិត្រសាលសិល្បៈនៃបរិវេណសណ្ឋាគារ iRoHa Garden Hotel កាលពីល្ងាចថ្ងៃទី ២៤ ខែ តុលា ឆ្នាំ ២០២០ កន្លងមក។
បើតាមការបញ្ជាក់ពីលោក ណាកាមូរ៉ា ហ៊ីដេតាកា (Nakamura Hidetaka) ជានាយកក្រុមហ៊ុន Social Compass Cambodia បានឱ្យដឹងពីការបែងចែករង្វាន់ជយលាភីនៃការប្រកួតគំនូរ White Canvas Cambodia 2020 ថា៖ «យើងបែងចែករង្វាន់ជយលាភីនៃការប្រកួតនេះជា ២ ផ្នែកនៃក្រុមវិចិត្រករ គឺជយលាភីកុមារ និងជយលាភីមនុស្សធំ ហើយយើងក៏មានក្រុមគណៈកម្មការកាត់សេចក្តីនៃការប្រកួតគំនូរនេះ យើងមានលោក ប៉ោយ ឈុនលី មកពីសាលាហ្វារពន្លឺសិល្បៈ ខេត្តបាត់ដំបង និងលោក សេង វិសាល ជាគ្រូបង្រៀនសិល្បៈគំនូរ នៅសាលាសិល្បៈគំនូរយ៉ាម៉ាដា ក្នុងរាជធានីភ្នំពេញ។ រង្វាន់ជយលាភីសំខាន់សម្រាប់ក្រុមវិចិត្រករ និងវិចិត្រការិនី គឺមានរង្វាន់ធំ Gold Prize រង្វាន់ Silver Prize និងរង្វាន់ Bronze Prize ដែលមានទាំងកុមារ និងមនុស្សធំ។ ក្រៅពីនេះយើងក៏មានរង្វាន់ផ្សេងៗទៀតផងដែរ សម្រាប់លើកទឹកចិត្តរួមសិល្បករ-សិល្បការិនីគំនូរ ដែលរួមមានរង្វាន់ Asian Prize រង្វាន់ Social Compass រង្វាន់ Eastern Culture Foundation Prize រង្វាន់ Embassy Prize រង្វាន់ Hope Prize និងរង្វាន់ Next Generation Prize ជាដើម»។
សម្រាប់មនុស្សធំ រង្វាន់ជយលាភី Gold Prize បានទៅវិចិត្រការិនី គឿម កូឡាប (Koeurm Kolab) ជាមួយនឹងស្នាដៃដែលមានចំណងជើងថា «ម្ភៃម្ភៃ ឬ Covid-19» មកពីខេត្តបាត់ដំបង ដែលអតីតជាសិស្សសាលាសិល្បៈហ្វារពន្លឺសិល្បៈ និងបច្ចុប្បន្នជាគ្រូបង្រៀនសិល្បៈ និងសិល្បករគំនូរផងដែរ ខណៈឯរង្វាន់ Silver Prize បានទៅលើវិចិត្រការិនី ខ្ចី ទូច (Khchao Touch) ខណៈរង្វាន់ Bronze Prize បានទៅលើវិចិត្រករលោក ឈឺម ហៃ (Chhim Hai)។
សម្រាប់កុមាររង្វាន់ Kids Gold Prize បានទៅកុមារា ឡូហ្សា (Loza) រង្វាន់ Kids Silver Prize បានទៅកុមារ ឈិន រតនា (Chhen Rattana) និងរង្វាន់ Kids Bronze Prize បានទៅយុវតី ភោគ សុគន្ធវារី (Phork Sokunveary)។
វិចិត្រការិនី គឿម កូឡាប នាពេលទទួលជយលាភី Gold Prize ពីគណៈប្រតិភូ។ រូប សហការី
វិចិត្រការិនី គឿម កូឡាប ដែលទើបឈ្នះពាន Gold Prize ដោយទទួលបានលិខិតវិញ្ញាបនបត្រ ១ ទឹកប្រាក់រង្វាន់ ១ ពាន់ ដុល្លារ និងកុំព្យូទ័រយួរដៃផលិតដោយកូនខ្មែរម៉ាក Koompi ១ គ្រឿង ដែលត្រូវបានគេប្រកាសលទ្ធផលកាលពីល្ងាចថ្ងៃទី ២៤ ខែ តុលា ឆ្នាំ ២០២០ នោះ បកស្រាយពីអត្ថន័យផ្ទាំងគំនូរខ្លួនដែរថា៖ «ហេតុផលដែលនាងខ្ញុំសម្រេចជ្រើសរើសយកប្រធានបទខ្លួនស្តីពីជំងឺកូវីដ ១៩ នេះ ដោយសារតែវាជាបញ្ហាសង្គមមួយ ដែលកំពុងតែវាយប្រហារមនុស្សនៅលើសកលលោកតែម្តង មិនមែនតែប្រទេសកម្ពុជា នោះទេ ហើយមកទល់ពេលនេះ វានៅតែបន្តគំរាមកំហែងមនុស្សលើសកលលោកដដែល និងមិនទាន់ដឹងថា វានឹងត្រូវបញ្ចប់ពេលណានោះទេ។ សម្រាប់គំនូរនេះ នាងខ្ញុំបានប្រើពេលគូរវា ខណៈពេលជំងឺនេះចាប់ផ្តើមកើតមានឡើង រហូតពេលដាក់ប្រកួត។ អត្ថន័យនៃផ្ទាំងគំនូរនេះ តាមរយៈតួអង្គស្រ្តីម្នាក់អង្គុយនៅលើកៅអីពាក់ម៉ាស់ក្នុងទឹកមុខសោកសៅ ភ្នែកសម្លឹងមើលរូបថតគ្រួសារ វ៉ាលិស និងមើលតាមបង្អួចកញ្ចក់ ដែលបានកើតឡើងពេលស្ថានភាពប្រទេសនានានៅលើសកលលោកជួបវិបត្តិជំងឺកូវីដ ១៩ គឺបន្ទប់ធ្វើចត្តាឡីស័ក។ ចំពោះការសម្លឹងរូបគ្រួសារ វ៉ាលី និងមើលតាមបង្អួចកញ្ចក់ មានន័យថា ស្រ្តីរូបនេះមានក្តីសង្វេគខ្លួន ខណៈពេលបែកគ្រួសារ ដោយសារភាពភ័យខ្លាចឆ្លងជំងឺកូវីដ ១៩ ហើយក៏បានប្រៀបធៀបខ្លួនទៅនឹងក្រុមសត្វតូចៗដែលនៅខាងក្រៅបន្ទប់ចត្តាឡីស័កនោះ ហាក់មានសេរីភាពជាងខ្លួននាងទៅវិញនាពេលនេះ»។
លោក ប៉ោយ ឈុនលី ពេលបញ្ជាក់ពីស្នាដៃស័ក្តិសមទទួលរង្វាន់ Gold Prize។ រូប សហការី
វិចិត្រការិនី គឿម កូឡាប ក៏បានបន្តបរិយាយទៀតថា៖ «ចំណែករូបភាពផ្សេងៗទៀត មានដូចជា ដបអាល់កុល ដបជែល ដែលនៅក្បែរស្រ្តីនោះ គឺចង់បញ្ជាក់ថា នាពេលបច្ចុប្បន្នមនុស្សគ្រប់រូប ចាប់យកការប្រុងប្រយ័ត្នខ្ពស់ជាមួយការរីករាលដាលឆ្លងជំងឺកូវីដ ១៩ ដូច្នេះដបអាល់កុល និងដបជែល ជារបស់ចាំបាច់បំផុតត្រូវដាក់តាមខ្លួន ដើម្បីបង្ការ និងជួយបញ្ចៀសការឆ្លងជំងឺ។ ចំណែកឯក្រដាសរាយប៉ាយ នៅលើកម្រាលឥដ្ឋនោះវិញ វាជាក្តីទុក្ខសោករបស់មនុស្ស ដែលកំពុងតែជាប់បំណុលធនាគារ អត់មានការងារធ្វើ ឬការបិទអាជីវកម្មរបស់ក្រុមហ៊ុនមួយចំនួន នាអំឡុងពេលមានវិបត្តិកូវីដ ១៩ នេះ»។
ចំណែកឯលោក ប៉ោយ ឈុនលី ជាគ្រូបង្រៀនសិល្បៈគំនូរ និងគំនូរជីវចលនៅសាលាហ្វារពន្លឺសិល្បៈ និងលោក សេង វិសាល ជាគ្រូបង្រៀនគំនូរនៅសាលាសិល្បៈយ៉ាម៉ាដា ដោយអ្នកទាំង ២ គឺជាសមាជិកនៃក្រុមគណៈកម្មការវាយតម្លៃ និងជ្រើសរើសស្នាដៃជាប់រង្វាន់ជយលាភីសម្រាប់ការប្រកួតគំនូរ White Canvas Cambodia 2020 នេះ ក៏បានបង្ហើបឱ្យដឹងពីរបៀបនៃការសម្រេចជ្រើសរើសស្នាដៃ និងប្រគល់រង្វាន់ធំទាំង ៣ មានរង្វាន់ Gold Prize រង្វាន់ Silver Prize និងរង្វាន់ Bronze Prize ផងដែរ។
ជាពិសេសនោះ សម្រាប់ការសម្រិតសម្រាំងជ្រើសរើសយកស្នាដៃរបស់វិចិត្រការិនី គឿម កូឡាប ដែលឈ្នះរង្វាន់ធំ Gold Prize លោក ប៉ោយ ឈុនលី ក៏បានបញ្ជាក់ថា៖ «ចំពោះស្នាដៃរបស់វិចិត្រការិនី គឿម កូឡាប ដែលបានឈ្នះរង្វាន់ធំនៅក្នុងការប្រកួត White Canvas Cambodia 2020 នេះ បានគោរពនូវគោលការណ៍ទាំង ៥ ដែលជាលក្ខខណ្ឌចាំបាច់ យើងបានប្រើដើម្បីចម្រាញ់រកស្នាដៃល្អត្រឹមត្រូវ មិនលម្អៀង ដោយប្រការណាមួយឡើយ។ ដូច្នេះស្នាដៃគំនូរនេះ ពិតជាស័ក្តិសមនឹងទទួលបានរង្វាន់ Gold Prize »៕
