កុនដុំដំបូងរឿង«ពោះធំ» របស់ផលិតកម្មSastra Film ដែលពន្យារពេលចាក់បញ្ចាំង និង តារាសម្តែងស្រីវ័យក្មេង អាង សុជាតា ហៅឈូឈូ។ រូបថត ហ្វេសប៊ុក និង ហ៊ាន រង្សី
.jpg)
ភ្នំពេញៈ ប្រសិនបើគ្មានវត្តមាននៃមេរោគថ្មីកូរ៉ូណា ឬ «កូវីដ១៩» ដែលកំពុងឆ្លងរីកដាលពាសពេញពិភពលោក និងបានយាយីក្នុងប្រទេសកម្ពុជា ដែរនោះទេ ខ្សែភាពយន្តដុំដំបូងរបស់ផលិតកម្ម Sastra Film រឿង «ពោះធំ» នឹងត្រូវចាក់បញ្ចាំងនៅតាមរោងកុននានាទូទាំងប្រទេសកម្ពុជា ចាប់ពីថ្ងៃទី ២៦ ខែមីនា ឆ្នាំ២០២០ ម្សិលមិញនេះហើយ។
ប៉ុន្តែការចាក់ខ្សែភាពយន្តនៅតាមរោងកុន គឺជាសកម្មភាពប្រមូលផ្តុំមួយនៃក្រុមមនុស្សដែលជារូបភាពមួយងាយនឹងការឆ្លងមេរោគកូរ៉ូណា ឬកូវីដ ១៩ ហើយស្របពេលដែលរាជរដ្ឋាភិបាលចេញសេចក្តីជូនដំណឹងមិនឲ្យមានលេចចេញជារូបភាពនៃការជួបជុំ ឬប្រមូលគ្នាបែបនោះ ទើបខាងផលិតកម្ម Sastra Film សម្រេចពន្យារពេលនៃការចាក់បញ្ចាំងខ្សែភាពយន្តដុំដំបូងរបស់ខ្លួន ដោយរង់ចាំរហូតទៅដល់ពេល ដែលមានសុវត្ថិភាពពីការយាយីនៃវីរុសនេះ ទើបមានការចាក់បញ្ចាំង។
បើតាមការបញ្ជាក់ពីលោកស្រី ប៊ុន ចាន់និមល ជាចាងហ្វាងផលិតកម្ម Sastra Film បានឲ្យភ្នំពេញប៉ុស្តិ៍ដឹងថា៖ «ដើម្បីចៀសវាងពីការឆ្លងមេរោគកូរ៉ូណា ឬកូវីដ១៩ ទោះបីជាកុនដំបូងក្តី យើងសុខចិត្តពន្យារពេលនៃការចាក់បញ្ចាំងនៅថ្ងៃនេះ [តាមគម្រោងគឺចាក់បញ្ចាំងនៅថ្ងៃទី២៦ ខែមីនា ឆ្នាំ២០២០]។ តែកាលៈទេសៈនៃការចាក់បញ្ចាំងកុននេះស្ថិតក្នុងស្ថានភាព ដែលប្រទេសយើងកំពុងជួបនឹងវិបត្តិសង្គមព្រោះតែកូវីដ១៩ នោះ ទើបយើងរង់ចាំពេលសមស្របសិន ហើយប្រសិនបើចាក់បញ្ចាំងនៅពេលនេះ វានឹងក្លាយជារូបភាពមួយនៃការប្រមូលផ្តុំមនុស្ស ខុសនឹង-គោលការណ៍បង្ការឆ្លងជំងឺកូវីដ១៩ ដែលសេចក្តីជូនដំណឹងមិនឲ្យមានការជួបជុំ ឬប្រមូលផ្តុំ របស់រដ្ឋា-ភិបាល»។
ចាងហ្វាងផលិតកម្ម Sastra Film បន្តថា៖ «ដូច្នេះ យើងសូមមេត្តាចិត្តពីបងប្អូនប្រិយមិត្ត ដែលតែងតែតាមដានរាល់វណ្ណកម្មភាពយន្តទាំងអស់របស់ Sastra Film នោះ សូមខន្តីចិត្តបន្តិច ក្នុងការរង់ចាំទស្សនាខ្សែភាពយន្តដុំដំបូងរបស់យើងរឿង «ពោះធំ» នេះបន្តិចទៀតសិន។ ដោយឡែកបងប្អូន ក៏អាចចូលទស្សនាកុនខ្លីៗ ផ្សេងៗទៀតរបស់យើងបានតាមគេហទំព័ររបស់យើងសិនបានផងដែរព្រោះយើងក៏មានកុនខ្លីថ្មីៗ ជាច្រើនទៀតដែរ សម្រាប់បងប្អូនប្រិយមិត្ត ដែល និយមតាមដានទស្សនាតាមរយៈផលិតកម្ម Sastra Film។ សង្ឃឹមថា យើងទាំងអស់គ្នា អាចឆ្លងផុតភាពលំបាកជាមួយគ្នា ហើយក៏សូមថែរក្សាសុខភាពទាំងអស់គ្នា ដោយសារការឧស្សាហ៍លាងសម្អាត ឬអនាម័យរាងកាយទាំងអស់គ្នា ដើម្បីគេចផុតពីការឆ្លងមេរោគកូវីដ១៩»។
គួរបញ្ជាក់ដែរ ផលិតកម្ម Sastra Film ត្រូវបានមហាជនទទួលស្គាល់ពីគុណភាពនៃការផលិតកុនខ្លីៗផ្នែកអប់រំ ខណៈផលិតកម្មបានផលិតកុនទាំងកុនខ្លី ដោយរាប់ទាំងកុនដុំដំបូងរឿង «ពោះធំ» នេះដែរនោះ បានចំនួនសរុបជាង ៥០រឿងហើយ នៅក្នុងរយៈពេលជាង ១ឆ្នាំ។
លោកស្រី ប៊ុន ចាន់និមល បញ្ជាក់ឲ្យដឹងពីការផលិតកុនដុំដំបូងរឿង«ពោះធំ» ដែលមានតួស្រីសំខាន់គឺជាតារាសម្តែងស្រីវ័យក្មេង យុវតី អាង សុជាតា ហៅឈូឈូ ផងដែរថា៖ «កុនដុំដំបូងនេះ បានចំណាយពេលជាង ៥ ខែ ទាំងការថត និងកាត់ត ទើបបានសមិទ្ធផលសម្រេច ដែលនឹងត្រូវចាក់បញ្ចាំងនៅថ្ងៃទី ២៦ ខែមីនា នេះ ហើយវាមានថិរវេ-លា៩៦នាទី»៕
