ភ្នំពេញ៖ ទើបតែរីករាយរឿងបើកអាជីវកម្ម ២ គឺនាំយកផលិតផលរក្សាសម្រស់ពីក្រៅប្រទេស និងមានកសិដ្ឋានចិញ្ចឹមឃ្មុំលក់ទឹកឃ្មុំធម្មជាតិ និងទឹកត្រចៀកកាំ កាលដើមឆ្នាំនេះសោះ ក៏ស្រាប់តែតារាសម្តែងស្រីមេម៉ាយកូន ១ អ្នកនាង សុខ សោម៉ាវត្តី មកបង្ហើរសាររឿងពិបាកក្នុងចិត្តគួរឲ្យងឿងឆ្ងល់។
តារាស្រីដែលមានទេពកោសល្យប៉ិនប្រសប់ក្នុងការសម្តែងអាចបត់បែន គ្រប់កាយវិការ តាមតម្រូវការអ្នកដឹកនាំចង់បាន សុខ សោម៉ាវត្តី ក៏បង្ហោះសារអមដោយរូបថត ១ សន្លឹក ឈរកាច់រាងរំលេចភាពសិចស៊ី មុខរថយន្តទំនើប ពោលពាក្យក្នុងចិត្តចេញមកថា៖ «ពិបាកចិត្ត តែអត់ដឹងថា ខ្លួនឯងពិបាកចិត្តរឿងអី។ មានអ្នកអ៊ីចឹងដែរអត់?»។
រំពេចនោះក៏មានអ្នកចូលទៅខមម៊ិនភ្លាមថា៖ «គ្រាន់តែពិបាកចិត្ត សិចស៊ីយ៉ាងហ្នឹងលោក។ ស្អាតណាស់លោកយាយកំពូលស្នេហ៍។ សុំសរសើរប្អូនស្រីអាយុច្រើនហើយនៅតែស្អាត»។
ទោះយ៉ាងណាតារាសម្តែងស្រី និងពិធីការិនីទូរទស្សន៍ អ្នកមេម៉ាយកូន ១ តែសម្រស់ស្អាត ក្រមុំមិនដូរ ដែលជាទូតសុច្ឆន្ទៈនៃក្រុមហ៊ុនភេសជ្ជៈអូអ៊ិឈិ អ្នកនាង សុខ សោម៉ាវត្តី បានបញ្ជាក់រឿងសារនោះថា៖ «អូ! តាមពិតទៅសារនោះ នាងខ្ញុំគ្រាន់តែសរសេរបង្ហោះលេងទេបង កុំគិតក្នុងចិត្តធ្វើអី!»។
នាពេលសួរបញ្ជាក់ថា ឬមួយមានរឿងពិបាកចិត្តក៏ដោយសារតែសម្បូរអ្នកតាមសុំស្រឡាញ់ច្រើនទេដឹងនោះ តារាស្រីរូបនេះ ឆ្លើយភ្លាមថា៖ «អត់ទេបង! គ្មានអ្នកណាគេមកស្រឡាញ់ខ្ញុំនោះទេ!»។
កាលដើមឆ្នាំ ២០២០ នេះ តារាសម្តែងស្រីមេម៉ាយកូន ១ ចាយសម្រស់ សុខ សោម៉ាវត្តី បង្ហោះសាររអ៊ូរទាំរឿងក្លាយជាថៅកែស្រីក្នុងអាជីវកម្មក្រៅរបរសិល្បៈថា «ពេលក្លាយជាម្ចាស់ក្រុមហ៊ុន ទើបដឹងថា ខ្លួនឯងមានការងារច្រើន ដែលត្រូវធ្វើហត់ តែសប្បាយចិត្ត»។
តារាស្រីដែលកំពុងតែល្បីថា មានសម្ព័ន្ធភាពបេះដូងនឹងកំលោះសង្ហាកីឡាករបាល់ទាត់ លី វ៉ាហេដ នោះធ្លាប់ប្រាប់ភ្នំពេញប៉ុស្តិ៍ថា៖ «គិតមកដល់ត្រឹមឆ្នាំ ២០២០ នេះ សម្រាប់ការបើកមុខរបររកស៊ីនោះ នាងខ្ញុំមាន ២ អាជីវកម្ម។
អាជីវកម្មទី ១ បានដំណើរការយូរហើយ គឺលក់ផលិតផលរក្សាសម្រស់។ ខណៈអាជីវកម្មទី២ ទើបតែចាប់ផ្តើមដំណើរការក្នុងឆ្នាំនេះ ផ្តោតលើការលក់ផលិតផលអាហារសុខភាព គឺទឹកឃ្មុំ និងទឹកត្រចៀកកាំ។ អាជីវកម្មទី ១ ខ្ញុំចូលភាគហ៊ុនជាមួយនឹងបងប្រុស និងប្អូនស្រី ដែលដំណើរការរលូន មានអតិថិជនស្គាល់ជាច្រើនមកហើយ។ ចំណែកឯអាជីវកម្មទី២ នាងខ្ញុំ និងលោក លី វ៉ាហេដ ចូលហ៊ុនគ្នា ដោយយើងបង្កើតកសិដ្ឋានចិញ្ចឹមឃ្មុំនៅឯម្តុំតំបន់ ស្រុកក្រូចឆ្មារ ខេត្តត្បូងឃ្មុំ»៕