ភ្នំពេញ៖ ក្រៅពីប្រាង្គប្រាសាទបុរាណដ៏សម្បូររុងរឿង ទឹកដីសៀមរាប បានទាក់ទាញភ្ញៀវទេសចរមកទទួលបទពិសោធសិល្បកម្មប្រពៃណី រួមទាំងសិល្បៈស្មូនដីពីបរមបុរាណ និងនាំយកស្នាដៃស្មូនរបស់ខ្លួនត្រឡប់ទៅផ្ទះវិញទុក្ខជាអនុស្សាវរីយ៍។
លោក ញឹប បញ្ញា ជាប្រធានផ្នែកផលិតកម្មនៃមជ្ឈមណ្ឌលសេរ៉ាម៊ិច និងវិចិត្រសិល្បៈខ្មែរ បានឱ្យដឹងថា មជ្ឈមណ្ឌលចង់បញ្ជូនជំនាញសិល្បៈស្មូនទៅមនុស្សជំនាន់ក្រោយ ដើម្បីអភិរក្ស និងផ្តល់អនាគតភ្លឺស្វាងដល់ពលរដ្ឋក្នុងសហគមន៍។
លោកនិយាយថា៖ «យើងកំពុងប្រើជំនាញហត្ថកម្ម និងផលិតផលដែលមានគុណភាពខ្ពស់។ យើងនឹងសប្បាយចិត្ត ប្រសិនបើមាននរណាម្នាក់ចង់ក្លាយជាផ្នែកមួយនៃគម្រោងរបស់យើង ហើយមកទស្សនានូវមជ្ឈមណ្ឌលសិល្បៈរបស់យើង»។
ស្ថាបនិកមជ្ឈមណ្ឌល Serge Rega បានមកដល់កម្ពុជាក្នុងនាមជាភ្ញៀវទេសចរនៅឆ្នាំ ១៩៩៩ លោកដិតដាមនូវស្នាមញញឹមប្រជាជន និងវប្បធម៌ខ្មែរ។ ក្រោយបន្តស្វែងយល់ពីប្រវត្តិសាស្ត្រខ្មែរ លោកមានការសោកស្ដាយដែលចំណេះដឹងពីសិល្បៈស្មូន ត្រូវបានបាត់បង់ក្នុងរបបខ្មែរក្រហម។
បុរសជនជាតិបែលហ្ស៊ិកដែលស្រឡាញ់សិល្បៈស្មូនដី និងសេរ៉ាម៊ិចរូបនេះ បានវិលត្រឡប់មកកម្ពុជាជាថ្មីក្នុងឆ្នាំ ២០០១ ក្នុងបំណងបង្កើតមជ្ឈមណ្ឌលសិល្បៈស្មូនដីបែបប្រពៃណីបុរាណខ្មែរ បូកបញ្ចូលសិល្បៈសូនដីបែបសហសម័យនៅទឹកដីសៀមរាបអង្គរ។
ដោយធ្វើការជាមួយសិល្បករស្មូនកម្ពុជា ២-៣ នាក់ទៀត សិប្បកម្មស្មូនត្រូវបានបង្កើតឡើង នឹងវិវឌ្ឍក្លាយជាមជ្ឈមណ្ឌលសេរ៉ាម៊ិច និងវិចិត្រសិល្បៈខ្មែរនៅឆ្នាំ ២០០៦ ដោយផ្ដល់ឱកាសការងារដល់ប្រជាជនសហគមន៍ ជាពិសេសជនពិការ។
លោកបានបន្តថា៖ «ពួកយើងមានថ្នាក់បង្រៀនស្មូនដី និងបង្រៀនផាត់ពណ៌ជារៀងរាល់ថ្ងៃសម្រាប់មនុស្សពេញវ័យ និងកូនក្មេងចាប់ពីអាយុ ៣ ឆ្នាំឡើងទៅ ហើយមិនចាំបាច់មានចំណេះដឹងអំពីសេរ៉ាម៊ិចពីមុនទេ»។
ថ្នាក់បង្រៀនស្មូនដីដោយគ្រូជាជនពិការ នឹងជួយឱ្យភ្ញៀវទេសចរទទួលបានបទពិសោធដោយផ្ទាល់នូវដំណើរការបុរាណនៃការបង្កើតសេរ៉ាម៊ិច ដោយប្រើប្រាស់ដីឥដ្ឋក្នុងស្រុក និងកង់របស់ស្មូនរចនាបែបបុរាណ។
លោក ញឹប បញ្ញា បន្តថា៖ «ថ្នាក់បង្រៀនស្មូនដីនេះ បានឱ្យអ្នកចូលរួមធ្វើនូវចានអង្គរ និងប្រើកង់របស់ជាងស្មូន។ បន្ទាប់ពីបញ្ចប់គ្រូរបស់យើងនឹងបង្ហាញបន្ថែមអំពីឆ្លាក់ខ្មែរ ដើម្បីធ្វើឱ្យវាកាន់តែប្លែកដោយប្រើឧបករណ៍ឆ្លាក់ និងគ្រឿងស្មូនពិសេស»។
សម្ភារសិល្បៈទាំងអស់នឹងត្រូវបានផ្ដល់ជូនទាំងអស់។ មគ្គុទេ្ទសក៍ក្នុងស្រុក និងគ្រូស្មូន គឺជាអ្នកណែនាំក្នុងការចាប់ផ្តើមថ្នាក់ស្មូនដីនេះ។ នៅចុងបញ្ចប់នៃថ្នាក់អ្នកចូលរួមនឹងទទួលបានចានស្មូន (ធ្វើដោយដៃរបស់ពួកគេ) និងសញ្ញាបត្រជាងស្មូនខ្មែរ។
អ្នកគ្រប់គ្រងផលិតកម្មរូបនេះបានមានប្រសាសន៍ថា៖ «ថ្នាក់រៀនស្មូន និងផាត់ពណ៌របស់យើងចំណាយពេល ១ ម៉ោង ៤៥ នាទី។ តម្លៃពីមុនគឺ ២៥ ដុល្លារ។ ប៉ុន្ដែឥឡូវនេះយើងមានការបញ្ចុះតម្លៃ ៣០% សម្រាប់ថ្នាក់ទាំង ២។ ថ្នាក់នីមួយៗគឺត្រឹមតែ ១៧,៥ ដុល្លារសម្រាប់មនុស្សម្នាក់»។
សាលាជារៀងរាល់ថ្ងៃ ដោយអនុវត្តវិធានការរក្សាអនាម័យ និងគម្លាតសង្គមយ៉ាងតឹងរ៊ឹងពីក្រសួង។
ក្រៅពីរៀចំទឹកលាងដៃនៅច្រកចូល លោក បញ្ញា បានបញ្ជាក់ថា៖ «យើងក៏បានដាក់ចម្ងាយរវាងកង់ និងកៅអីស្មូន។ យើងក៏កំពុងតែមានការពាក់ម៉ាស់ និងផ្តល់ជូនម៉ាស់ដល់អតិថិជនផងដែរ ប្រសិនបើពួកគេត្រូវការ»។
វិបត្តិកូវីដបានធ្វើឱ្យចំនួនភ្ញៀវបរទេសថយចុះយ៉ាងខ្លាំង។
ទោះយ៉ាងណាក៏ដោយ ប្រធានផ្នែកផលិតកម្មនៃមជ្ឈមណ្ឌលសេរ៉ាម៊ិច បានឱ្យដឹងថា៖ «យើងមានអ្នកគាំទ្រពីភ្ញៀវជាតិជាច្រើននាពេលបច្ចុប្បន្ន និងភ្ញៀវក្នុងស្រុកកាន់តែច្រើនក្នុងរយៈពេល ៦ ខែចុងក្រោយនេះ»។
លោកបានថ្លែងទាំងអំណរថា៖ «តាមរយៈការអនុវត្តសិល្បៈទាំងនេះ យើងកំពុងធានាឱ្យមានការបង្កើតឡើងវិញ និងរស់រានមានជីវិតនៃសេរ៉ាម៊ិចធ្វើពីថ្មម៉ាបបុរាណខ្មែរ ដែលធ្លាប់មាននូវហានិភ័យនៃការបាត់ខ្លួនបន្ទាប់ពី ១ ពាន់ឆ្នាំ»។
មជ្ឍមណ្ឌលសេរ៉ាម៊ិច និងវិចិត្រសិល្បៈខ្មែរមានទីតាំងស្ថិតនៅផ្ទះលេខ ០២០៧ ផ្លូវលំ ភូមិទ្រាំង ឃុំស្លក្រាម ក្រុងសៀមរាបអង្គរ។
មជ្ឈមណ្ឌលស្មូនដី និងហាងសិល្បកម្មស្មូន ក៏នឹងត្រូវបើកដំណើរការនៅរាជធានីភ្នំពេញនៅថ្ងៃទី ១ ខែ ធ្នូ ឆ្នាំ ២០២០ ដែលស្ថិតនៅផ្ទះលេខ ១៦ វិថីព្រះបាទជ័យវរ្ម័នទី៧ (១៧២) ខណ្ឌដូនពេញ និងចាប់ផ្ដើមបើកថ្នាក់បង្រៀនសិស្សឆាប់ៗនេះផងដែរ។
ព័ត៌មានបន្ថែម ទំនាក់ទំនងទូរស័ព្ទ លេខ ០១៧ ៨៤៣០១៤ អ៊ីមែល booking@khmerceramics.com និងហ្វេសប៊ុក Khmer Ceramics៕
ហ៊ុន សុភារ៉ា