ក្រុងស៊ីដនី៖ បុរសអូស្ដ្រាលីម្នាក់ត្រូវបានប្រទះឃើញនៅរស់រានមានជីវិត និងសុខុមាលភាពល្អក្រោយពីវង្វេង ៣ សប្ដាហ៍ ក្នុងព្រៃក្រពើស្ថិតនៅភាគខាងជើងផុតនៃប្រទេស។ នេះបើយោងតាមប៉ូលិសបាននិយាយកាលពីថ្ងៃអង្គារ។
លោក មីលេន ឡេមិក បានបាត់ខ្លួនក្រោយពីរថយន្ដរបស់លោកខូចកាលពីថ្ងៃទី ២២ ខែធ្នូ ខណៈធ្វើដំណើរកាត់ព្រៃ ដែនទ្រី ភាគឦសានរដ្ឋឃ្វីនលែន ប្រទេស អូស្ត្រាលី។
ដំបូងប៉ូលិសបារម្ភថា លោក ឡេមិក អាយុ ២៩ ឆ្នាំ ត្រូវបានក្រពើស៊ី ខណៈតំបន់នោះសម្បូរទៅដោយក្រពើ និងល្បីជាព្រៃដ៏គ្រោះថ្នាក់បំផុត។
ប៉ូលិសបានប្រើគ្រប់មធ្យោបាយទាំងការជិះយានរុករកលើដី បើកនាវាលុកលុយតំបន់ទឹក និងប្រើដ្រូនស្វែងរកពីលើអាកាស។
តែក្រោយការរុករករយៈពេលប៉ុន្មានថ្ងៃមក បើទោះជាប៉ូលិសមិនមានតម្រុយពីបុរសបាត់ខ្លួនក៏ដោយ ក៏ពួកគេមិនបានសម្គាល់ឃើញក្រពើណាមានពោះធំចម្លែក ដែលទំនងជាលេបអាហារជាមនុស្សរស់ឡើយ។
ទីបំផុត ប៉ូលិសបានរកឃើញបុរសរូបនោះនៅថ្ងៃចន្ទ ចម្ងាយជាច្រើនគីឡូម៉ែត្រពីរថយន្ដខូចរបស់ខ្លួន។
ប៉ូលិសបានឲ្យដឹងក្នុងសេចក្ដីថ្លែងការណ៍ថា៖ «គាត់មានសុវត្ថិភាព ដោយជាក់ស្ដែង គាត់អាចនៅរស់ក្នុងព្រៃក្រពើរយៈពេល ៣ សប្ដាហ៍»។
ប៉ូលិសបាននិយាយថា លោក ឡេមិក បានរស់រានមានជីវិតក្នុងព្រៃដោយទទួលទានផ្លែឈើ និងប៊ឺរី។
លោក មីលេន បានប្រាប់ប៉ូលិសថា លោកឆ្លៀតដើរលេងចុះឡើង ខណៈពេលរង់ចាំត្រាក់ទ័រមកជួយរថយន្តខូចរបស់លោក ប៉ុន្តែមានមតិសង្ស័យថា លោកមានបំណងពួនប៉ូលិសទៅវិញ៕ AFP/HR