ក្រុងដេនប៉ាសា: ១ ថ្ងៃក្រោយពីដែនកោះទេសចរណ៍បាលីដ៏ល្បីល្បាញនៅឥណ្ឌូនេស៊ីប្រែជាស្ងាត់ជ្រងំពេញ ១ ថ្ងៃ ដើម្បីប្រារព្ធទិវា «ទិវាស្ងប់ស្ងាត់» នៅថ្ងៃបន្ទាប់ស្រាប់តែមនុស្សរាប់រយនាក់ដង្ហែគ្នាធ្វើពិធីងូតភក់ជម្រះកាយឡើងវិញ ក្រោយពីប្រពៃណីនេះត្រូវបានផ្អាកប្រារព្ធអស់ ៦០ ឆ្នាំកន្លងមក។
ពិធីងូតភក់ដែលអ្នកភូមិហៅថា មេប៊ុង ប៊ុងហ្គាន (Mebuug-buugan) ត្រូវបានប្រារព្ធឡើងតាមជំនឿបែបប្រពៃណីថា វានឹងលាងជម្រះនូវគ្រោះអាក្រក់នានា។ មនុស្សប្រុសស្រី និងកុមារនាំគ្នាស្លៀកសារុង និងជួតក្បាលរួចនាំគ្នាក្បង់ភក់ខាប់ៗរួចយកមកពាសលើមុខ និងខ្លួនប្រាណនៅតំបន់ព្រៃកោងកាង ស្ថិតក្នុងភូមិ កេដុងហ្គាណាន ជាយក្រុងដេនប៉ាសាកាលពីចុងសប្ដាហ៍។
ពិធីបុណ្យងូតភក់រំដោះគ្រោះភ័យនេះត្រូវបានធ្វើឡើងក្រោយពីអ្នកកោះបាលីកាន់សាសនាហិណ្ឌូ អ្នកមិនមែនហិណ្ឌូសាសនិកព្រមទាំងភ្ញៀវទេសចរនាំគ្នាសំងំនៅក្នុងផ្ទះស្មិងស្មាធិ៍ ពិចារណាលើទង្វើរបស់ខ្លួន។ សូម្បីតែជើងហោះហើរ អគ្គិសនី និងអ៊ីនធើណិតក៏ត្រូវបានផ្ដាច់ផងដែរ។ នៅថ្ងៃបន្ទាប់ចូលមកដល់ពិធីបុណ្យងូតភក់កាលពីចុងសប្ដាហ៍ អ្នកចូលរួមកាលពីអតីតកាលសុទ្ធតែអាក្រាតកាយ។ ចាប់ពីពាក់កណ្ដាលសតវត្សរ៍ទី ២០ មកប្រជាជនចាប់ផ្ដើមបិទបាំងប្រាណ និងកេរ្តិ៍ខ្មាស។
ពិធីបុណ្យងូតភក់នេះត្រូវបានផ្អាកអស់ ៦ ទសវត្សរ៍នឹងទើបតែត្រូវបានប្រារព្ធឡើងវិញក្នុងរយៈពេល ៣ ឆ្នាំចុងក្រោយនេះ។
នៅពេលដែលពួកគេយកភក់មកប៉ាតមុខមាត់ខ្លួនប្រាណ អ្នកចូលរួមនាំគ្នាបួងសួងសុំសេចក្ដីសុខ និងសំណាងល្អមុននឹងនាំគ្នាដើរជាក្បួនសំដៅទៅជម្រះកាយនៅឆ្នេរសមុទ្រក្បែរនោះជាកិច្ចបង្ហើយ៕