សកម្មភាពនៅវត្តបទុមសូរិយាខេត្តតាកែវ (ឆ្វេង) និងសកម្មភាពព្រះអនុគណស្រុកខ្សាច់កណ្តាល ខេត្តកណ្តាល (ស្តាំ)។ រូប ហ្វេសប៊ុក
.jpg)
ភ្នំពេញ៖ ខណៈប្រជាពលរដ្ឋខ្មែរសឹងតែគ្រប់ទិសទី កំពុងតែជួបវិបត្តិសេដ្ឋកិច្ចគ្រួសារ ដែលបានបង្កឡើងដោយជំងឺកូវីដ ១៩ នោះ ហើយឥទ្ធិពលនេះក៏បានជះបន្តដល់ជីវភាពព្រះសង្ឃ គង់នៅតាមទីអារាមនានាផងដែរ គឺភិក្ខុសង្ឃជួបវិបត្តិខ្សត់ចង្ហាន់ និងរាំងស្ទះដំណើរការសាងសង់នៃសមិទ្ធផលក្នុងអារាម ព្រោះពុទ្ធបរិស័ទភ័យខ្លាចការឆ្លងជំងឺនេះ ជាពិសេស ឧបាសក ឧបាសិកាក៏ត្រូវបានផ្អាកការធ្វើសមាទានសីលដែរ។
បើតាមសង្ឃដីកា ព្រះគ្រូឃោសានុរក្ខិតោ ផាត់ សុខនឹម ព្រះចៅអធិការវត្តពិជ័យរង្សី នៅក្នុងភូមិអញ្ជែងលើឃុំពុកឫស្សី ស្រុកខ្សាច់កណ្តាល ខេត្តកណ្តាល ឲ្យដឹងថា៖ «តាំងពីមានការរាលដាលនៃជំងឺកូវីដ ១៩ នេះ មកសឹងតែគ្រប់ទីអារាម នៅស្រុកខ្សាច់កណ្តាល មានសភាពខ្សត់ពុទ្ធបរិស័ទមកបំពេញបុណ្យកុសល ទាំងនៅថ្ងៃរក្សាសីល និងរដូវកាលធ្វើបុណ្យទាននានា។ ប្រការសំខាន់នោះ ភិក្ខសង្ឃរាងខ្សត់ចង្ហាន់ជាងមុន»។ ព្រះសង្ឃវិញ ក្នុងស្ថានភាពបច្ចុប្បន្ននៃការរីករាលដាលជំងឺកូវីដ ១៩ នេះ ក៏តម្រូវឲ្យព្រះសង្ឃគ្រប់វត្តក្នុងស្រុកផ្អាកនិមន្តបិណ្ឌបាត ខណៈក៏ទទួលបានការជួយសម្រាលទំនុកបម្រុងពីព្រះឃោសធម្ម លន់ សុគន្ធា ព្រះអនុគណស្រុកខ្សាច់កណ្តាល និងសហការី បាននិមន្តចុះសួរសុខទុក្ខសមណសិស្ស ដែលសម្រាកគង់សិក្សានៅវត្តនានា និងណែនាំព្រះសង្ឃឲ្យចេះធ្វើអនាម័យលាងដៃ នឹងទឹកអាល់កុល ឬសាប៊ូ ការសម្អាតប្រាណ របស់ប្រើប្រាស់សុវត្ថិភាព ចំណីអាហារជាដើម និងបាននាំយកនូវគ្រឿងឧបភោគ និងបរិភោគ មកប្រគេនដល់ព្រះគ្រូចៅអធិការវត្តនានាទៀតផង»។
សកម្មភាពបង្កបង្កើនផលកសិកម្មដាំបន្លែបន្លុកសម្រាប់ត្រៀមទុកជាស្បៀងក្នុងគ្រាមានវិបត្តិកូវីដ១៩ របស់ព្រះសង្ឃគង់នៅវត្តសិរីសាគរដូនស្តើង ស្ថិតនៅខេត្តព្រៃវែង។ រូបថត ហ្វេសប៊ុក
ចំណែកឯព្រះភិក្ខុធម្មសេនា ហាក់ សៀងហៃ ដែលគង់នៅវត្តកំផែង សង្កាត់ស្វាយប៉ោ នៅក្រុង និងខេត្តបាត់ដំបងឯណោះ ក៏មានសង្ឃដីកាស្រដៀងគ្នាដែរថា៖ «ស្ថានភាពនាពេលវិបត្តិកូវីដ ១៩ បាននាំឲ្យមានបញ្ហាចម្បងទៅដល់ព្រះសង្ឃ គឺខ្សត់ចង្ហាន់ ខណៈពុទ្ធបរិស័ទក៏ខ្សត់ ហើយពួកគាត់ជាប្រភពសេដ្ឋកិច្ចសំខាន់សម្រាប់ព្រះសង្ឃ នាពេលមកធ្វើបុណ្យកុលសនោះ។ ព្រះសង្ឃលែងហ៊ានចេញនិមន្តបិណ្ឌបាតគង់តែនៅក្នុងវត្ត មិនទៅជួបជុំតាមទីប្រជុំជន ក្នុងពិធីបុណ្យនានា ព្រោះខ្លាចប្រឈមនឹងការឆ្លងមេរោគកូរ៉ូណា។ យ៉ាងណាខាងអារាមអាត្មាផ្ទាល់ ក៏បានណែនាំភិក្ខុសង្ឃ ឲ្យមានអនាម័យ ដោយការលាងដៃសម្អាតនឹងសាប៊ូ ឬប្រើអាល់កុល ទៅតាមសេចក្តីណែនាំពីក្រសួងសុខាភិបាល និងធ្វើតាមការណែនាំរបស់អង្គការសុខភាពពិភពលោករក្សាគម្លាតគ្នាចៀសវាងការឆ្លងជំងឺកូវីដ ១៩ នេះដែរ»។
ដោយឡែកបើតាមបណ្តុំរូបភាពនានានៅទីអារាមមានឈ្មោះ «វត្តសិរីសាគរ ដូនស្ដើង » ស្ថិតនៅក្នុងខេត្តព្រៃវែងឯណោះវិញ ឃើញសកម្មភាពព្រះសង្ឃក្នុងវត្ត ខិតខំប្រឹងប្រែងបង្កបង្កើនផលដំណាំកសិកម្មជាបន្លែ ឬផលានុផលផ្សេងៗ ដើម្បីទុកជាស្បៀងចម្អិនចង្ហាន់សម្រាប់ភិក្ខុសង្ឃអារាមខ្លួន គួរឲ្យសរសើរ។ តាមគេហទំព័រផ្ទាល់ខ្លួនដែលដាក់ឈ្មោះថា «វត្តសិរីសាគរដូនស្ដើង» បានបង្ហោះសារថា៖ «ពួកយើងឆ្លៀតដាំបន្លែធម្មជាតិជាច្រើន សម្រាប់អាហារប្រចាំថ្ងៃ ដើម្បីបង្កើតប្រព័ន្ធភាពសាំ ក្នុងសព៌ាង្គកាយប្រឆាំងនឹងអា Covid-19 ចង្រៃ។ បើផ្សារបិទទ្វារក៏យើងមិនបារម្ភដែរ ព្រោះពួកយើងបានត្រៀមរួចជាស្រេចហើយក៏អាចចែករំលែកបានខ្លះទៀត»។
សកម្មភាពបង្កបង្កើនផលកសិកម្មដាំបន្លែបន្លុកសម្រាប់ត្រៀមទុកជាស្បៀងក្នុងគ្រាមានវិបត្តិកូវីដ១៩ របស់ព្រះសង្ឃគង់នៅវត្តសិរីសាគរដូនស្តើង ស្ថិតនៅខេត្តព្រៃវែង។ រូបថត ហ្វេសប៊ុក
ឯសកម្មភាពមួយទៀតនៅវត្តឈ្មោះថា « វត្តបទុមសុរិយា» ដែលស្ថិតនៅក្នុងឃុំខ្វាវ ស្រុកសំរោង ខេត្តតាកែវ តាមរយៈសារ និងបណ្តុំរូបភាពរបស់ព្រះសង្ឃ ១ អង្គ ដែលប្រើព្រះនាមជាគណនីហ្វេសប៊ុកឈ្មោះថា «ភិក្ខុ ខាត់ សុថុល វត្តបទុមសុរិយា» បានបង្ហោះរូបពុទ្ធបរិស័ទ ញាតិញោមទាំងជិត និងឆ្ងាយមកបំពេញបុណ្យកុសលជាហូរហែ តែមើលទៅក៏ដូចជាមិនសូវសម្បូរសប្បាយនោះឡើយ។
គណនីហ្វេសប៊ុក «ភិក្ខុ ខាត់ សុថុល វត្តបទុមសុរិយា» បង្ហើរសារអមដោយរូបភាពថា៖ «០៦/០៤/២០២០ សូមអគុណដល់ អ្នកមីង អូន និងកូន ដែលបានប្រគេនចង្ហាន់ និងបច្ច័យ សូមជូនពរមីង និងកូន សូមរកទទួលទានមានបាន ជួបតែសុខចម្រើនគ្រប់ពេលវេលា។ សូមអនុមោទនាបុណ្យ! ០៦/០៤/២០២០ សូមអរគុណដល់ញោម ឧបាសិកា យឹម សារ៉ាន់ និងកូនចៅនៅភ្នំពេញ ញោម យឹម សារី និងកូនចៅ នៅផ្សារបង្កែសី ដែលបានប្រគេនទេយ្យទានជាច្រើនមានសាច់ក្រក ២០ គីឡូ និងបច្ច័យ ១០០ ០០០ ៛ សូមជូនពរញាតិញោម និងកូនចៅ រកទទួលទានមានបានជួបសុខចម្រើនគ្រប់ពេលវេលា។ សូមអនុមោទនាបុណ្យ!»៕
