តារាស្រី មាន សូនីតា បានលាភក្នុងគ្រាមានវិបត្តិកូវីដ ១៩ ក្លាយជាទូតសុច្ឆន្ទៈក្រុមហ៊ុនផលិតផលរក្សារាងកាយ TRE។ រូបថត ហ្វេសប៊ុក
.jpg)
ភ្នំពេញ៖ ខណៈពេលដែលសិល្បករ-សិល្បការិនី ទាំងជាតារាសម្ដែង និងតារាចម្រៀង ជាច្រើនរូបកំពុងតែធ្លាក់ប្រាក់ចំណូលយ៉ាងគំហុកព្រោះតែស្ថានភាពផ្លាស់ប្តូរដោយវិបត្តិកូវីដ ១៩ ដោយសារតែម្នាក់ៗ បាត់បង់ការងារសិល្បៈ ស្ទើរតែទាំងស្រុង ហើយសំងំក្នុងផ្ទះរៀងៗខ្លួននោះ បែរជាតារាស្រីរាងស្រឡូនស្រស់ស្អាត កញ្ញា មាន សូនីតា មានរហ័សនាមថា «រាជិនីក្រមា» បែរជាទទួលបានលាភធំជាប្រាក់ចំណូលរាប់ម៉ឺនដុល្លារ តាមរយៈការចុះកុងត្រា ជាមួយនឹងក្រុមហ៊ុនមួយឈ្មោះថា TRE ដែលចែកចាយផលិតផលថែរក្សារាងកាយ ២ ផលិតផលគឺតំណាប់ និងសម្បុកត្រចៀកកាំ។
កញ្ញា មាន សូនីតា ទើបតែបានចុះកុងត្រាការងារដ៏ធំមួយទាក់ទងផ្នែកឯកទេសថែរក្សាសម្រស់ឈ្មោះថា TRE បានជ្រើសរើសធ្វើជាតារាតំណាងរបស់ខ្លួន (តារាទូតសុច្ឆន្ទៈ) ដែលមានរយៈពេលដល់ទៅ ៣ ឆ្នាំ ដែលតារាស្រីស្អាតរូបនេះ ត្រូវបានបង្ហើបថាមានតម្លៃខ្លួនជិតប្រមាណ ១០ ម៉ឺនដុល្លារ ឯណោះ ហើយបើតាមប្រភពមួយបានឲ្យដឹងថា ចំពោះប្រាក់ចំណូលនៃការងារថ្មីនេះហើយ ដែលបាននិងកំពុងធ្វើឲ្យកញ្ញា មាន សូនីតា គេចផុតពីវិបត្តិសេដ្ឋកិច្ច ក្រោមឥទ្ធិពលនៃការរីករាលដាលជំងឺកូវីដ ១៩។
តារាសម្តែងស្រី មាន សូនីតា។ រូប យូសុះ អាប់ឌុលរ៉ាស់ហ៊ីម
តារាស្រីមានសំឡេងផ្អែមស្រាលស្រទន់ កញ្ញា មាន សូនីតា បានឲ្យដឹងថា តាមពិតកូវីដ ១៩ ក៏បានធ្វើឲ្យមានការជះផលអាក្រក់ដល់ការងារសិល្បៈនាងផងដែរ ព្រោះការងារសិល្បៈមួយចំនួនត្រូវបានគេពន្យារពេល ហើយមុខជំនួញលើគម្រោង «ស្រលាញ់» ក៏បានប៉ះពាល់ផងដែរ ប៉ុន្តែមិនទាន់ធ្ងន់ធ្ងរប៉ុន្មាននោះទេ គឺអាចនៅគ្រប់គ្រងបាន។
កញ្ញាបញ្ជាក់ថា ការរងប៉ះពាល់ទៅលើអាជីព និងអាជីវកម្មដែលដំណើរការរួចទៅហើយនេះ ក៏ធ្វើឲ្យនាងបានបង្កើតសមិទ្ធផលថ្មីៗខ្លះដែរ ទើបនាងមិនពិបាកចិត្តខ្លាំងពេកទេ។ នាងក៏បានបង្ហាញអារម្មណ៍សប្បាយចិត្តដែរថា TRE គ្រានេះ ព្រោះនៅក្នុងស្ថានភាពវឹកវរនេះ ការងារថ្មីប៉ះប៉ូវបានខ្លះលើការធ្លាក់ចុះចំណូលដោយសារតែមានវិបត្តិមេរោគសាហាវ និងកំពុងគំរាមកំហែងពិភពលោក។
ទោះបីជាយ៉ាងណាក្តី កញ្ញា មាន សូនីតា មិនចង់ធ្វើអត្ថាធិប្បាយទៅលើរឿងតម្លៃខ្លួនរបស់នាងឡើយ ប៉ុន្តែនាងគ្រាន់តែសារភាពថា៖ «នាងខ្ញុំ ពិតជាបានចុះកុងត្រាលើរយៈពេល ៣ ឆ្នាំមែន លើផលិតផលចំនួន ២ នោះ គឺតំណាប់ និងសម្បុកត្រចៀកកាំ។ ការងារនេះទើបមានការព្រមព្រៀងគ្នាកាលពីពេលថ្មីៗនេះហើយវាក៏ជាការងារធំទី ១ ក្នុងឆ្នាំ ២០២០ សម្រាប់រូបនាងខ្ញុំ ជាពិសេសគឺអំឡុងពេលដែលគ្រប់គ្នាកំពុងតែរងផលវិបាកដោយសារតែកូវីដ ១៩ នេះ»។
តារាសម្តែងស្រី រាជិនីក្រមា រូបនេះ ក៏អះអាងថា ការងារថ្មីនេះជាការប៉ះប៉ូវផ្លូវចិត្តរបស់នាង ដែលកំពុងបាត់បង់ការងារមួយចំនួន ដោយសារតែកូវីដ ១៩ ហើយកំពុងគំរាមគំហែងពិភពលោកយ៉ាងខ្លាំងក្លាផងដែរនោះ។
នាងក៏បានបញ្ជាក់ថា ពេញចិត្តខ្លាំងណាស់ ចំពោះការព្រមព្រៀងជាមួយនឹង TRE ពេលនេះ ប៉ុន្តែក៏មានការបារម្ភខ្លះៗផងដែរ គឺមានទាំងសប្បាយចិត្ត និងក្តីបារម្ភដូចគ្នាតែម្តង៕
