យានជំនិះរបស់ទេពធីតាបុត្រីកបិលមហាព្រហ្ម និងទេវតាតំណាងទាំង ១២ ឆ្នាំ កំពុងតែក្លាយជាប្រធានបទក្តៅក្នុងបណ្តាញសង្គម។ រូបថត ហ្វេសប៊ុក
.jpg)
ភ្នំពេញ៖ គ្រាន់តែរូបភាពតារាចម្រៀងស្រីលំដាប់កំពូល ជ្រកនៅទ្រនំថោនកញ្ញា មាស សុខសោភា គ្រងឈុតសម្លៀកបំពាក់នៃទេពធីតាមហាសង្ក្រាន្តឆ្នាំថ្មីឆ្នាំជូតព្រះនាងព្រះនាម «គោរាគទេវី» ដែលជាបុត្រីទី ២ របស់កបិលមហាព្រហ្ម មានយានជំនិះ គឺជាសត្វខ្លា បង្ហោះភ្លាមនោះ ក៏កើតមានការជជែកគ្នា យ៉ាងក្តៅគគុកពេញតាមបណ្តាញសង្គម ដោយសារតែមានការភាន់ច្រឡំគ្នារវាងយានជំនិះរបស់ទេពធីតាទាំង ៧ អង្គ ជាបុត្រីកបិលមហាព្រហ្ម និងទេវតាប្រចាំឆ្នាំទាំង ១២។
ក្រោយពីបង្ហោះរូបរបស់តារាចម្រៀងស្រីកញ្ញា មាស សុខសោភា បង្ហាញគ្រងឈុតផ្សេងៗនៃសម្លៀកបំពាក់របស់ទេពធីតា ចេញម៉ូដដោយក្រុមហ៊ុនសម្អាងការមួយឈ្មោះ Hang Embellishment មក គេឃើញមានទាំងអ្នកចូលទៅចុច Like និង Comment សរសើរផង និងមានអ្នក Comment រិះគន់ផងពាក់ព័ន្ធនឹងយានជំនិះរបស់ទេពធីតាសង្ក្រាន្តឆ្នាំជូតព្រះនាង «គោរាគទេវី» ដែលជាសត្វខ្លា ខណៈទេវតាតំណាងឆ្នាំជូត មានយានជំនិះ គឺជាសត្វកណ្តុរនោះ។
ក្រុមអ្នករិះគន់បានលើកឡើងថា៖ «អ្នករៀបចំកំពុងវង្វេងវីវក់ច្រឡំសត្វអស់! សត្វកណ្តុរ ក្លាយជាសត្វខ្លា ដោយសារមេរោគកូវីដ ១៩ វាកូរខ្លាំងពេកទៅ។ ឆ្ងល់ឆ្នាំជូត ម៉េចចេញជាខ្លាអ៊ីចឹង? ទើបតែដឹងថាឆ្នាំជូតគេជិះខ្លា ចេញមក រាងភ្លាវ អូ!ភ្លេច ថាសម័យកូរ៉ូណា» និងសារថា៖ «ចុម ឆ្នាំជូត ចេញខ្លា ចុះឆ្នាំខាល ជិះអ្វីវិញ អាយដល? ក្រែងឆ្នាំថ្មីនេះ ទេវតាជិះសត្វកណ្តុរឬ? ម៉េចបានទៅជាសត្វខ្លាទៅវិញ?»។
ដោយសាររឿងនេះមានលើកយកមកជជែកគ្នាយ៉ាងក្តៅគគុកពេញបណ្តាញសង្គម ហើយមិនមានអ្នកអាចបកស្រាយការពិតក្បួនតម្រាវប្បធម៌ប្រពៃណីខ្មែរនោះ ទើបឃើញមានម្ចាស់គណនីហ្វេសប៊ុកឈ្មោះថា Khmer Architectural និងយោងតាមសំណៅដើមនៃឯកសារមហាសង្ក្រាន្តខ្មែរ ដែលមានក្នុងគេហទំព័រវីគីភីឌា បកស្រាយជម្រះមន្ទិលនៃការភាន់ច្រឡំខាងលើនេះ មានលក្ខណៈស្របគ្នា។
គណនី Khmer Architectural និងឯកសារមហាសង្ក្រាន្តខ្មែរ ដែលមានក្នុងគេហទំព័រវីគីភីឌា បានបំភ្លឺថា៖ «សូមបងប្អូនខ្មែរយើងបែងចែកឲ្យដាច់រវាងឆ្នាំទាំង ១២ ជាមួយបុត្រីទាំង ៧ របស់កបិលមហាព្រហ្ម មិនមែនឆ្នាំជូត ជិះកណ្តុរទេណា! យានជំនិះបុត្រីទាំង ៧ គឺមិនមែនសត្វឆ្នាំទាំង ១២ នេះទេ។ ខ្ញុំបាទសូមធ្វើការបកស្រាយចម្ងល់ដែលថា ហេតុអ្វីទេវតាឆ្នាំជូត បែរជាគង់ផ្ទំបើកព្រះនេត្រលើខ្នង ពាហនៈព្យាឃៈ (សត្វខ្លា)ទៅវិញ? ទី១ អំពីបុត្រីកបិលមហាព្រហ្ម គ្រប់គ្នាតែងតែគិតថា រាល់ពេលចូលឆ្នាំទេវតា ដែលទ្រង់នឹងយាងចុះមកគ្រងជម្ពូរទ្វីប តែងមានយានជំនិះជាសត្វតំណាងឲ្យឆ្នាំនោះឯង។ ឧទាហរណ៍ ឆ្នាំជូតជិះកណ្តុរ ឆ្នាំឆ្លូវជិះគោ ឆ្នាំខាលជិះខ្លាជាដើម តែការពិតមិនដូច្នោះឡើយ ព្រោះថាបុត្រីកបិលមហាព្រហ្មមានតែ ៧ អង្គ ទេ មិនមែន ១២ អង្គ តាមឆ្នាំទាំង ១២ នោះឡើយ។ ទេពធីតាទាំង ៧ អង្គនោះ តែងឆ្លាស់វេនគ្នាទទួលភារកិច្ចបន្តបន្ទាប់ក្នុងការគ្រប់គ្រងភពផែនដីនេះ ដែលកំណត់ទៅតាមថ្ងៃនីមួយៗប្រចាំសប្តាហ៍»។
ប្រភពដដែលនេះបន្តថា៖ «សម្រាប់ថ្ងៃអាទិត្យ ទេវតានាមនាង «ទុង្សាទេវី» ដែលមានយានជំនិះ ជាសុបណ្ណរាជ (ស្តេចគ្រុឌ) ថ្ងៃចន្ទ ទេវតានាមនាង «គោរាគទេវី» ដែលមានយានជំនិះជាព្យគ្ឃ: ឬពាហនៈព្យាឃៈ (ខ្លាធំ) ខណៈថ្ងៃអង្គារ ទេវតានាមនាង «រាក្យសាទេវី» ដែលមានយានជំនិះជាអស្សតរ (សេះ) ឬ សុករ: (ជ្រូក)។ ចំណែកថ្ងៃពុធ ទេវតានាមនាង «មណ្ឌាទេវី» ដែលមានយានជំនិះជាគទ្រភ (លា) ថ្ងៃព្រហស្បត្តិ៍ ទេវតានាមនាង «កិរិណីទេវី» ដែលមានយានជំនិះជាគជសារ (ដំរី)។ ចំពោះថ្ងៃសុក្រ ទេវតា នាមនាង «កិមិរាទេវី» ដែលមានយានជំនិះជាមហិសារាជ (ស្តេចក្របី) រីឯថ្ងៃសៅរ៍ ទេវតានាមនាង «មហោទរាទេវី» ដែលមានយានជំនិះជាមយូរ (ក្ងោក)។ ដោយសារក្នុងឆ្នាំជូតនេះ សង្ក្រាន្តចូលមកចំថ្ងៃចន្ទ គឺត្រូវវេននាង «គោរាគទេវី» ហេតុដូច្នេះហើយទើបបានទេពធីតាឆ្នាំនេះ ជិះខ្លាចុះមកនោះ»៕
សម្រាប់ព័ត៌មានលម្អិតពីមហាសង្ក្រាន្តខ្មែរ នោះអាចចូលតាមគេហទំព័រ៖ https://bit.ly/2xR0ao2
