ហ្គេមនេះបានជួយលើកទឹកចិត្តពួកគេក្នុងការតស៊ូលើសមរភូមិពិត។ រូបថត AFP
.jpg)
ក្រុងទ្រីប៉ូលី: វាជាថ្ងៃឈប់សម្រាកពីការបាញ់ប្រហារនៅខ្សែត្រៀមជួរមុខក្នុងប្រទេសលីប៊ី ហើយលោក អាប់ដេ ឡាហ្ស៊ីស និងសមមិត្ដដាក់អាវុធចុះដោយចាប់យកទូរស័ព្ទដៃរួចបន្ដឆាកប្រយុទ្ធហ្គេម PUBG ទៀត។
កែវភ្នែករបស់យុទ្ធជនកំពុងសម្លឹងមើលអេក្រង់ទូរស័ព្ទ ខណៈពួកគេលេងបាញ់ហ្គេមប្រហារគ្នាស៊ីសាច់ហុតឈាមដែលម្ចាស់ជើងឯកគឺជាអ្នករស់រានមានជីវិតចុងក្រោយគេ។
វីដេអូហ្គេមអនឡាញដែលមានអ្នកលេងច្រើននាក់នេះស្ថិតក្នុងចំណោមហ្គេមពេញនិយមបំផុតជាមួយវត្ដមានចំនួនដោនឡូដជាង ៣៦០ លាន។
សភាអ៊ីរ៉ាក់បានបោះឆ្នោតកាលពីខែមុនហាមប្រាមការលេងហ្គេមប្រភេទនេះដោយសំអាងលើ «សកម្មភាពហិង្សា» ហើយវាក៏ស្ថិតនៅក្រៅច្បាប់ក្នុងប្រទេសនេប៉ាល់ និងរដ្ឋហ្គូចារ៉ាត់ប្រទេសឥណ្ឌាផងដែរ។
យុទ្ធជននៅលីប៊ីនាំគ្នាលេងហ្គេម PUBG យ៉ាងជក់ចិត្តក្រោយសមរភូមិ។ រូបថត AFP
នៅលីប៊ីហ្គេម PUBG ពិតជាល្បីខ្លាំងជាពិសេសនៅខ្សែត្រៀមជួរមុខនៃជាយក្រុង និងជុំវិញទីក្រុងទ្រីប៉ូលីជាទីដែលកងកម្លាំងស្មោះស្ម័គ្រនឹងរដ្ឋាភិបាលសម្ព័ន្ធជាតិដឹកនាំដោយអន្ដរជាតិបានវាយប្រហារជាមួយក្រុមកងកម្លាំងជាតិលីប៊ីរបស់សេនាប្រមុខ Haftar នៅរយៈពេលប៉ុន្មានខែនេះ។
លោក អាប់ដេឡាហ្ស៊ីស បាននិយាយក្នុងសំឡេងស្អកៗថា៖ «យើងលេងវា ពេលយើងត្រឡប់មកពីសមរភូមិវិញ ហើយជួនកាលលេងនៅខ្សែត្រៀមជួរមុខថែមទៀត»។
មហាមេដ សាហ្វី អាយុ ១៩ ឆ្នាំពាក់មួកប៉ារ៉ា និយាយកាត់ថា៖ «វាលើកទឹកចិត្ដយើង ពេលយើងលេងវាមុនពេលចេញទៅសមរភូមិ»។
លោក អាប់ដេឡាហ្ស៊ីស និយាយថា៖ «វាមានលក្ខណៈខុសប្លែកគ្នាឆ្ងាយរវាងជីវិតពិត និងជីវិតក្នុងហ្គេម។ ក្នុងវីដេអូហ្គេមពេលអ្នកស្លាប់ អ្នកអាចរស់ឡើងវិញ។ ក្នុងជីវិតពិត វាគ្មានលើកទី ២ ឡើយ»។
យ៉ាងណាមិញមហាមេដ ប្រាថ្នាជីវិតពិតលើសមរភូមិពិតជាងដោយលោកថា៖ «ក្នុងវីដេអូហ្គេមពេលយើងជួបទុក្ខ សុំរកជំនួយ គ្មាននរណាមកជួយយើងទេ តែនៅសមរភូមិពិតមានគ្នាជួយយើង»៕ HR
