យុវវ័យអង់គ្លេសថតរូបសែលហ្វ៊ីក្បែរជញ្ជាំងនំដូណាត់។ រូបថត AFP
.jpg)
ក្រុងឡុងដ៍៖ អង្គុយកាច់រាងក្នុងអាងងូតទឹកពេញដោយបាល់ពណ៌ផ្កាឈូក ឬបោះផ្កាក្រដាសចម្រុះពណ៌ ក្រុមយុវវ័យអាយុខ្ទង់ ២០ ឆ្នាំ នាំគ្នាផ្ដិតយកតថភាពក្នុងបន្ទប់ស្ទូឌីយោតូចមួយនៃទីក្រុងឡុងដ៍បង្ហោះបង្អួតភ្នែកអ្នកប្រើប្រាស់បណ្ដាញសង្គម។
រោងចក្រសែលហ្វ៊ី ឬ Selfie Factory ឯ Westfield ជាមជ្ឈមណ្ឌលផ្សារទំនើបដ៏ធំមួយបំផុតមួយនៅអឺរ៉ុប បានទទួលភ្ញៀវរាប់ពាន់នាក់ចូលតាមបន្ទប់ស្ដង់រចនាប័ទ្មប្លែកៗចំនួន ២០ សម្រាប់អ្នកនិយមថតរូបសែលហ្វ៊ីបង្ហោះលើបណ្ដាញសង្គម។
ផ្ទៃក្រោយសម្រាប់ថតរូបទាំងនោះរួមមាន ជញ្ជាំងនំដូណាត់ ខ្លាឃ្មុំធេដឌីដ៏ធំមួយ អាងបាល់យក្សមួយ បន្ទប់បាយទសវត្សរ៍ឆ្នាំ ១៩៥០ កញ្ចុំផ្កាក្រដាសចម្រុះពណ៌ និងបូពណ៌ក្រហមជាជម្រើសដ៏សម្បូរបែប។
អ្នកម្ដាយនាំគ្នាថតរូបទារកអង្គុយជាមួយខ្នើយរូបទូរស័ព្ទពណ៌លឿង ខណៈយុវវ័យអង្គុយលើអាងងូតទឹក ឬកាច់រាងក្បែរជញ្ជាំងនំដូណាត់។
សម្រាប់ការលេង និងថតរូបគ្រប់បន្ទប់ អ្នកចូលរួមត្រូវបង់ប្រាក់ ១២,៥០ ដុល្លារ។ AFP
កញ្ញា មូលលី ប្រ៊ីយ៉ាន អាយុ ១៩ ឆ្នាំ មកពីស្ទេវេនណេក ខាងជើងក្រុងឡុងដ៍ និយាយថា៖ «ខ្ញុំចូលចិត្ដគ្រប់បន្ទប់ទាំងអស់។ វាច្បាស់ជាស្អាតលើអ៊ីនស្ដាក្រាមរបស់ខ្ញុំ និងខុសប្លែកពីអ្វីដែលខ្ញុំធ្លាប់បង្ហោះកន្លងមក»។
ការចូលលេង និងថតតាមបន្ទប់នានា រួមទាំងរូបភាពផ្ទៃក្រោយជាច្រើនទៀតនោះ មានតម្លៃ ១២,៥០ ដុល្លារ។ យុវវ័យ គឺជាអតិថិជនពេញនិយមជាងគេ តែជូនកាលភ្ញៀវខ្ទង់ ៦០ ក៏បង្ហាញខ្លួនផងដែរ។
លោក វីល បូវើរ ប្រាប់ AFP ថា៖ «មនុស្សម្នាមកទីនេះ និងចំណាយពេលមួយម៉ោងលេងកម្សាន្ដ និងថតរូបជាច្រើនសន្លឹកទៅតាមចិត្ដចង់»។
យុវជនវ័យ ២៦ ឆ្នាំរូបនេះ និយាយថា លោក និងសង្សារព្យាយាមស្វែងរកទីកន្លែងស្អាតៗសម្រាប់បង្ហោះលើអ៊ីនស្ដាក្រាមពេលធ្វើដំណើរកម្សាន្ដ តែគ្មានអ្វីក្រៅពីហ្វូងគោប៉ុណ្ណោះ។
ទាំងនេះបានជំរុញចិត្ដលោកបង្កើតផ្ទៃក្រោយអ៊ីនស្ដាក្រាមក្រោមដំបូលតែមួយ។ លោក បូវើរ ថា៖ «ជំនាន់យើងនេះចូលចិត្ដបង្ហោះរូបភាព និងតែងតែលំបាករកអ្វីប្លែកៗ»៕ AFP/HR
