អ្នកចូលរួមប្រកួតញ៉ាំម្ទេស ដេកត្រាំក្នុងអាងទឹកក្ដៅឧណ្ហៗនារដូវរងា។ AFP
ក្រុងយីឈុន: ពី ១ ឆ្នាំទៅ ១ ឆ្នាំ ការប្រកួតទទួលទានម្ទេសនៅចិន កាន់តែទទួលបានប្រជាប្រិយភាព ដោយចំនួនអ្នកចូលរួមចេះតែកើន ហើយការប្រកួតក៏ត្រូវបានរៀបចំតាមតំបន់ជាច្រើនដងក្នុង ១ ឆ្នាំ។
ការប្រកួតកាលពីថ្ងៃទី៩ ខែធ្នូ កន្លងទៅថ្មីៗនេះ អ្នកចូលរួមជាច្រើននាក់ទាំងស្រីទាំងប្រុសបាននាំគ្នាដេកត្រាំក្នុងអាងម្ទេសធំៗអណ្ដែតព្រាតក្រហមច្រាល ទាំងក្នុងដៃម្នាក់ៗមានកាន់ចានម្ទេសខ្នាតធំរៀងៗខ្លួន។
អាងទឹកក្ដៅក្រាលដោយម្ទេសធំៗនេះ ស្ថិតនៅតំបន់ល្បីមានទេសភាពស្អាត មីងយេ ឈានហ្គូ ទីរួមក្រុងវិនតាង ទីក្រុងយីជុន ខេត្តជាំងស៊ី ភាគកណ្ដាលប្រទេសចិន។
ស័ក្ដិសមទៅនឹងអាកាសធាតុនៃ រដូវរងា បេក្ខជន បេក្ខនារីគ្រាន់តែឮសញ្ញាចាប់ផ្ដើមភ្លាម ម្នាក់ៗក៏នាំគ្នាទំពាម្ទេសធំៗឥតប្រណី។ អ្នកឈ្នះពីការប្រកួតអាចញ៉ាំម្ទេសធំៗបាន ២០ គ្រាប់ក្នុង ១ នាទីតែគាត់ពុំទទួលបានរង្វាន់អ្វីធំដុំទេ៕
