ខេត្តត្បូងឃ្មុំ៖ ចាប់តាំងពីខែសីហា ឆ្នាំ ២០១៨ មកទល់ពេលនេះ កូនខ្មែរដំបូងដែលបានរកឃើញគំនិតច្នៃសំរាមប្លាស្ទិកឲ្យទៅជាប្រេងម៉ាស៊ូត ទើបតែចរាចរណ៍លក់នៅលើទីផ្សារជាង ១ ០០០ លីត្រ តែប៉ុណ្ណោះ ដោយសារចង្វាក់ផលិតកម្មមានខ្នាតតូចគឺ ១ ថ្ងៃ ផលិតបានជាង ១០ លីត្រ ខណៈលោក ឃុន ស៊ីវ មានផែនការគ្រោងផលិតឲ្យបានចំនួន ១៥០ លីត្រ ក្នុង ១ ថ្ងៃ ទើបអាចបម្រើតាមតម្រូវការក្នុងស្រុក ក្រោយពីលោកបានសរសេរគម្រោងស្នើទៅម្ចាស់ជំនួយនៅឯប្រទេស បារាំង មានទឹកប្រាក់ ១០ ម៉ឺនដុល្លារ សម្រាប់ធ្វើទីកន្លែងចម្រាញ់សំរាមប្លាស្ទិកខ្នាតធំនេះឲ្យបាន។
លោក ឃុន ស៊ីវ (Khun Sive) វ័យ ៤១ ឆ្នាំ បច្ចុប្បន្នកំពុងតែរស់នៅក្រុងកំពង់ចាម ខេត្តកំពង់ចាម និងជាជំនួយការប្រធានអង្គការ (OBT) នៅក្នុងសហគមន៍ជីរោទិ៍ ដែលមានទីតាំងស្ថិតនៅក្នុងភូមិជីរោទិ៍ក្រោម ២ ឃុំជីរោទិ៍ទី ១ ស្រុក និងខេត្តត្បូងឃ្មុំ កាលដំបូង ក្នុងតួនាទីជាអ្នកកាន់គម្រោងស្រាវជ្រាវ និងផែនការអាជីវកម្មនោះ ប្រាប់ភ្នំពេញប៉ុស្តិ៍ថា៖ «នាពេលឆាប់ៗនេះ យើងអាចនឹងមានចង្វាក់ផលិតកម្មខ្នាតធំ អាចផលិតបានប្រេងម៉ាស៊ូត ១៥០ លីត្រ ក្នុង ១ ថ្ងៃបាន ក្រោយពីខ្ញុំបានសរសេរគម្រោងស្នើម្ចាស់ជំនួយនៅប្រទេស បារាំង មានទឹកប្រាក់ ១០ ម៉ឺនដុល្លារ សម្រាប់ធ្វើទីកន្លែងចម្រាញ់សំរាមប្លាស្ទិកនេះ ដើម្បីបម្រើតម្រូវការក្នុងស្រុក។ ខណៈពេលកន្លងមក យើងផលិតបានតិចតួច ដោយសារយើងមានទីកន្លែងចម្រាញ់មានទំហំតូច ហើយភាគច្រើនប្រេងម៉ាស៊ូតនោះសម្រាប់យើងប្រើប្រាស់ប្រចាំថ្ងៃនៅឯអង្គការបណ្តុះបណ្តាលថ្នាក់មូលដ្ឋាន (OBT) តែប៉ុណ្ណោះ។ ដោយឡែកយើងក៏បានជូនប្រេងម៉ាស៊ូតនេះ ទៅដល់សាលាក្រុងភ្នំពេញ ដើម្បីយកទៅជួយដកស្រង់ពិសោធលើការប្រើប្រាស់ប្រេងម៉ាស៊ូត ដែលច្នៃពីសំរាមប្លាស្ទិកនេះផងដែរ កាលពីវេទិកាជាតិអេកូទេសចរណ៍លើកទី ១»។
លោក ឃុន ស៊ីវ ដែលមានចំណេះដឹងត្រឹមកម្រិតថ្នាក់ទី ៤ តែជាមនុស្សឧស្សាហ៍ ព្យាយាមសិក្សាស្រាវជ្រាវតាមយូធូបចំណាយពេលស្រាវជ្រាវជាង ១ ឆ្នាំ ដើម្បីយកសំរាមប្លាស្ទិកទាំង ៦ ប្រភេទមកច្នៃជាប្រេងម៉ាស៊ូត ដើម្បីរួមចំណែកកាត់បន្ថយការបំពុលបរិស្ថានផងដែរ។
លោក ឃុន ស៊ីវ ពន្យល់ពីប្រភេទសំរាមប្លាស្ទិក និងរបៀបចម្រាញ់ប្រេងម៉ាស៊ូតពីសំរាមប្លាស្ទិកនេះដែរថា៖ «សព្វថ្ងៃនេះ ប្លាស្ទិកមានច្រើនជាង ៧០ ប្រភេទ ដោយក្នុងនោះប្រភេទ ដែលប៉ះពាល់ដល់បរិស្ថានបំផុតមាន ៧ ប្រភេទ។ ក្នុងចំណោមប្លាស្ទិក ៧ ប្រភេទនោះ មាន ៦ ប្រភេទ ដែលអាចយកមកច្នៃជាប្រេងម៉ាស៊ូតមានដបទឹកសុទ្ធ ដបប្រេងឆា ដបសាប៊ូ គម្របទឹកសុទ្ធ កែវកាហ្វេជ័រ និងប្រអប់ស្នោជាដើម។ សំរាមប្លាស្ទិកនេះ បានចម្រាញ់ចេញជាប្រេងម៉ាស៊ូត ត្រូវឆ្លងកាត់ ៣ ដំណាក់កាល គឺដំណាក់បំបែកធាតុ ការចម្រាញ់ និងការបន្សុទ្ធ»។
លោក ឃុន ស៊ីវ បានបន្តថា៖ «ក្នុង ១ ថ្ងៃ យកប្លាស្ទិកចំនួន ៣០ គីឡូក្រាមអាចចម្រាញ់ជាប្រេងម៉ាស៊ូតបានប្រមាណជាង ១០ លីត្រ ហើយប្រេងម៉ាស៊ូត ដែលច្នៃពីសំរាមប្លាស្ទិកនេះ មានចំហេះខ្លាំងជាងប្រេងម៉ាស៊ូតធម្មតា។
ប្រេងម៉ាស៊ូតតាមស្ដង់ដារបស់វាគឺក្នុង ១ លីត្រ គឺមានចំហេះ ០.៨៣២ ក្រាម ចំណែកឯម៉ាស៊ូតដែលខ្ញុំធ្វើហ្នឹងនៅក្នុង ១ លីត្រ មានចំហេះ ០.៧៧៥ ក្រាមប៉ុណ្ណោះ។
បើតាមក្បូនប្រេងមួយណាស្រាលជាង មួយហ្នឹងមានចំហេះខ្លាំងជាង។ ប៉ុន្តែបើតាមក្នុងឯកសារ ដែលខ្ញុំបានស្រាវជ្រាវ គឺគេបាននិយាយថា ប្រេងម៉ាស៊ូត ចម្រាញ់ពីសំរាមប្លាស្ទិកនោះ វាមានសារជាតិពុលខ្លាំងជាងប្រេងម៉ាស៊ូតស្ដង់ដា។ តែទោះបីជាយ៉ាងណា វាក៏មានភាពប្រសើរជាង យើងចោលសំរាមប្លាស្ទិកទៅដីផ្ទាល់ ដែលមានផលប៉ះពាល់ ១០០ ភាគរយដល់បរិស្ថាន ខណៈប្រេងច្នៃពីប្លាស្ទិកនេះមានត្រឹម ៨០ ភាគរយប៉ុណ្ណោះ»។
មុនពេលច្នៃសំរាមប្លាស្ទិក ធ្វើជាប្រេងម៉ាស៊ូត នៅខែសីហា ឆ្នាំ ២០១៨ លោក ឃុន ស៊ីវ ក៏ធ្លាប់បានច្នៃសំរាមប្លាស្ទិក ធ្វើជាឥដ្ឋកូរ៉ូឡាផងដែរ គឺឆ្នាំ ២០១៧ ខណៈសព្វថ្ងៃនេះ លោកបានបម្រើការងារនៅអង្គការជាង ២ ឆ្នាំហើយ។
លោកក៏បង្ហើបពីរូបមន្តនៃការធ្វើឥដ្ឋការ៉ូឡាពីសំរាមប្លាស្ទិកដែរថា៖ «សម្រាប់ឥដ្ឋការ៉ូឡា ចម្រាញ់ពីប្លាស្ទិកនោះ យើងប្រើខ្សាច់ ៣ គីឡូ បូកជាមួយនឹងជ័រប្លាស្ទិក ១ គីឡូ ដោយសារគម្រោងនេះ ខ្ញុំបានធ្វើតាំងពីឆ្នាំ ២០១៧ មក។ ថ្ងៃខាងមុខខ្ញុំក៏គ្រោងកែច្នៃឥដ្ឋមួយប្រភេទថ្មីឈ្មោះថា «ឥដ្ឋបរិស្ថាន» ផងដែរ៕