អ្នកស្រី ង្វៀង ធី ធុយេន ជាអ្នកផលិតតុក្កតាបញ្ញវន្តដែលមិនសូវទាក់ចិត្ដក្មេងសម័យថ្មី។ រូបថត VNS
.jpg)
ក្រុងហាណូយ៖ ដោយពិធីបុណ្យពាក់កណ្ដាលសរទរដូវកាន់តែខិតជិតមកដល់នៅថ្ងៃទី ១៥ នៃខែចន្ទគតិទាំង ៨ ដែលត្រូវនឹងថ្ងៃទី ១៣ ខែ កញ្ញា នេះ អ្នកស្រី ង្វៀង ធី ធុយេន កំពុងតែមមាញឹកក្នុងការច្នៃផលិតបញ្ញវន្តក្រដាស។
អ្នកស្រី ធុយេន ជាអ្នកសិល្បៈម្នាក់ក្នុងចំណោមមនុស្សតិចតួចដែលបន្ដអាជីពជាអ្នកផលិតតុក្កតាបុរាណសម្រាប់ឲ្យក្មេងលេងក្នុងឱកាសបុណ្យប្រចាំឆ្នាំនេះ។
អ្នកស្រីចំណាយពេលវេលាជាច្រើនក្នុងការផលិតតុក្កតាដោយអង្គុយបិទឫស្សីតូចៗ កាត់សម្លៀកបំពាក់តូចៗ និងបិទដំឡើងរូបយ៉ាងយកចិត្តទុកដាក់។ បញ្ញវន្ត ដែលពលរដ្ឋវៀតណាមហៅថា ធៀន ស៊ីហ្គាយ គឺជានិមិត្តរូបបុគ្គលមានចំណេះដឹងខ្ពង់ខ្ពស់។
បញ្ញវន្តក្រដាសត្រូវបានពាក់មួក និងសម្លៀកបំពាក់ប្រពៃណី ដូចជាអ្នកដែលបំពេញការងារមុខងាររាជការ។
កាលពីអតីត ពលរដ្ឋវៀតណាមដាក់តាំងបង្ហាញរូបទីងមោងបញ្ញវន្តក្រដាសក្នុងអំឡុងពេលរៀបចំពិធីជប់លៀងនៃបុណ្យពាក់កណ្ដាលសរទរដូវ ដើម្បីលើកទឹកចិត្ដកុមារខិតខំសិក្សារៀនសូត្រ និងទទួលជោគជ័យក្នុងឆាកជីវិត។
តុក្កតាបញ្ញវន្តវៀតណាមប្រើគ្រោងឫស្សី សម្លៀកបំពាក់បុរាណ។ VNS
ឈុតបញ្ញវន្តក្រដាស ដែលមានតួអង្គបញ្ញវន្ត ១ រូប រួមនឹងអ្នកបម្រើ ២ នាក់ ត្រូវបានដាក់តាំងបង្ហាញលើថាស អមជាមួយនឹងផ្លែឈើ និងចំណីអាហារផ្សេងៗសម្រាប់កុមារទទួលទាន និងលេងនារាត្រីបុណ្យឆ្លង។
តួអង្គបញ្ញវន្តក្រដាសត្រូវបានរក្សាទុកនៅក្បែរទីកន្លែងសិក្សារបស់កុមារ ឬតម្កល់នៅទីសក្ការៈរបស់គ្រួសាររហូតដល់ដំណាច់ឆ្នាំចន្ទគតិ។
នៅទីបញ្ចប់នៃពិធីបុណ្យ ឬដំណាច់ឆ្នាំចន្ទគតិ តុក្កតាឫស្សីតូចៗនឹងត្រូវដុតចោល។
អ្នកស្រី ធុយេន ដែលបានស្នងប្រពៃណីផលិតបញ្ញវន្តក្រដាសពីដូនតា បាននិយាយថា មុខមាត់បញ្ញវន្តត្រូវបានផលិតឡើងពីដីឥដ្ឋ និងសម្ងួតក្រោមកម្ដៅថ្ងៃ និងផាត់ពណ៌មុខមាត់។
ក្រុមគ្រួសារជួបជុំគ្នាក្នុងឱកាសបុណ្យពាក់កណ្ដាលសរទរដូវ។ VNS
អ្នកស្រី បានឲ្យដឹងទៀតថា៖ «គ្រោងខ្លួនរបស់បញ្ញវន្តផលិតឡើងពីឫស្សី ហើយគ្រោងនោះត្រូវតែមានតុល្យភាព ដែលអាចដាក់ឲ្យឈរត្រង់ខ្លួនបាន។ គន្លាក់បត់ត្រូវបានភ្ជាប់ជាមួយដែកលួស»។
ក្រោយពីធ្វើគ្រោងខ្លួនរួច អ្នកស្រីចាប់ផ្ដើមបិទក្រដាស។ តួអង្គបញ្ញវន្តត្រូវបានស្រោបសម្លៀកបំពាក់ក្រណាត់ពណ៌ស្រស់ៗ។
អ្នកស្រី ធុយេន បានបន្ដថា៖ «ក្មេងៗសម័យនេះកាន់តែចាប់អារម្មណ៍ចំពោះឧបករណ៍អេឡិចត្រូនិក តុក្កតាបែបបុរាណលែងសូវជាចំណូលចិត្ដពួកគេទៀតហើយ។ យ៉ាងណា ខ្ញុំនៅតែបន្ដធ្វើរូបសិប្បកម្មទាំងនេះ ដើម្បីថែរក្សាប្រពៃណីបុរាណដូនតា»។
ពិធីបុណ្យពាក់កណ្ដាលសរទរដូវ គឺជាព្រឹត្ដិការណ៍ដ៏សំខាន់សម្រាប់ពលរដ្ឋវៀតណាម ក្នុងឱកាសក្រុមគ្រួសារអាចជួបជុំ ឪពុកម្ដាយប្រៀនប្រដៅកូនចៅ ហើយកូនធំៗជូនកាដូដល់ឪពុកម្ដាយ និងសាច់ញាតិចាស់ទុំក្នុងគ្រួសារ៕ VNS/HR
