សិល្បករ និងសិល្បការិនី និងបុគ្គលិកអូផេនស្ទូឌីអូកម្ពុជាដែលត្រូវបានបង្កើតឡើងដោយស្ថាបនិក ឡូរ៉េន អ៊ីអ៊ិដា ។ សហការី
ភ្នំពេញ៖ ដោយមើលឃើញ ថា ស្ថានភាពនៃការរីករាលដាលជំងឺកូវីដ១៩ នៅពុំទាន់ធូរស្បើយឆាប់ៗ ហើយបាត់បង់ឱកាសនៃការតាំងពិព័រណ៍ស្នាដៃវិចិត្រកម្ម ឬស្នាដៃគំនូរនានា ដែលបានធ្វើឱ្យប៉ះពាល់ខ្លាំងដល់ជីវភាពប្រចាំថ្ងៃរបស់ក្រុមវិចិត្រករនោះ ទើបស្ថាបនិក អូផេនស្ទូឌីអូកម្ពុជា បង្កើតមូលនិធិសប្បុរសធម៌ រកប្រាក់ជួយសម្រួលជីវភាពពួកគេចំនួន ៣ ខែ។
មូលនិធិរៃអង្គាសប្រាក់សប្បុរសធម៌នេះ ដើម្បីប្រមូលប្រាក់ទៅជួយដល់វិចិត្រករ និងបុគ្គលិក ធ្វើការងារនៅ អូផេនស្ទូឌីអូកម្ពុជា មានចំនួនសរុបចំនួន ១០ រូប ដោយប្រើរយៈពេល ១ ខែ ខណៈការទទួលប្រាក់សប្បុរសធម៌ បានចាប់ផ្តើមតាំងពីដើមខែឧសភា ឆ្នាំ ២០២១ ហើយគោលដៅរៃអង្គាសប្រាក់ចំនួន ១ ម៉ឺនដុល្លារ។
ស្ថាបនិកអូផេនស្ទូឌីអូកម្ពុជា សញ្ជាតិអាមេរិក ដើមកំណើតជប៉ុន កញ្ញា ឡូរ៉េន អ៊ីអ៊ិដា បានប្រាប់ភ្នំពេញប៉ុស្តិ៍ឱ្យដឹងថា៖ «យើងទទួលបានជោគជ័យខ្លាំង សម្រាប់ការគិតទុកជាមុន ដើម្បីបង្កើតមូលនិធិសប្បុរសធម៌នេះ ដោយពេលនេះ [ទី ៦ ខែឧសភា ឆ្នាំ ២០២១ ទទួលចំនួន ១១ ៧៧៥ ដុល្លារ] ខណៈមូលនិធិយើងទទួលរយៈពេល ១ ខែ គឺរហូតដល់ចុងខែឧសភានេះតែម្តង»។
សិល្បការិនី ហ៊ុល កញ្ញា កំពុងធ្វើកិច្ចការសិល្បៈនៅស្ទូឌីយោ។ សហការី
សិល្បការិនីដែលរស់នៅទឹកដីកម្ពុជាយូរឆ្នាំរូបនេះបានបន្តថា៖ «ប្រាក់មូលនិធិនេះ យើងនឹងប្រើប្រាស់ ដើម្បីជួយដល់វិចិត្រករយើងចំនួន ៦ រូប រួមមាន លោក ម៉ន ជា, លោក វ៉ាន់ ឆវ័ន្ត, លោក គីម សាន, លោក ឈើន ចាន់នី, កញ្ញា ហ៊ុល កញ្ញា និងលោក ហម រិទ្ធិ និងបុគ្គលិកបម្រើការយើងនៅ Open Studio Cambodia ចំនួន ៤ រូបទៀតផងដែរ»។
កញ្ញា ឡូរ៉េន អ៊ីអ៊ិដា ស្ថាបនិកអូផេនស្ទូឌីអូកម្ពុជា បន្តថា៖ «យើងនឹងជូនប្រាក់ ២០០ ដុល្លារ ក្នុង ១ ខែ សម្រាប់ម្នាក់ [វិចិត្រករ/បុគ្គលិក] ដោយឧបត្ថម្ភរយៈពេល ៣ ខែ ចាប់ពីខែមិថុនា ឆ្នាំ ២០២១ ទៅ។ យើងក៏ត្រូវចំណាយប្រាក់ថ្លៃជួលអគារពិព័រណ៍នៅខេត្តសៀមរាប ៤០០ ដុល្លារ ក្នុង ១ ខែ ហើយក្រៅពីនេះ យើងនឹងយកប្រាក់ដែលសេសសល់ ដើម្បីទុកចំណាយលើគម្រោងថ្មីមួយនាពេលអនាគតជួយក្រុមវិចិត្រករផងដែរ»។
គួរបញ្ជាក់ដែរថា អូផេនស្ទូឌីអូកម្ពុជា (Open Studio Cambodia) ត្រូវបានបង្កើតឡើងដោយវិចិត្រករដើមកំណើតជប៉ុន សញ្ជាតិអាមេរិក កញ្ញា ឡូរ៉េន អ៊ីអ៊ិដា មកពីទីក្រុងស៊ីថល រដ្ឋវ៉ាស៊ីនតោន សហរដ្ឋអាមេរិក។
អូផេនស្ទូឌីអូកម្ពុជា មានទីតាំងស្ថិតនៅភូមិកណ្តាល ក្រុងសៀមរាប ខេត្តសៀមរាប តាំងពីឆ្នាំ ២០១៨ មក ដោយមានបំណងជួយរកទីផ្សារលក់ស្នាដៃគំនូរ ឬស្នាដៃវិចិត្រកម្មរបស់ក្រុមវិចិត្រករខ្មែរក្រីក្រ ពិការ និងខ្វះលទ្ធភាពរៀនជំនាញសិល្បៈតែមានទេពកោសល្យសិល្បៈ ដោយបច្ចុប្បន្នមានវិចិត្រករចំនួន ៦ រូប (ស្រីម្នាក់) និងបុគ្គលិកបម្រើការងារចំនួន ៤ រូបផងដែរ៕
សិល្បករ ហម រិទ្ធិ និងស្នាដៃសិល្បៈគំនូររបស់លោក។ សហការី
សិល្បករ វ៉ាន់ ឆវ័ន្ត និងស្នាដៃគំនូររបស់លោក។ សហការី
លោក គីម សាន និងស្នាដៃសិល្បៈគំនូរដ៏រស់រវើករបស់លោក។ សហការី
